Buǵan deıin Omarovanyń saılanýyna úzildi-kesildi qarsy bolǵan senator Pet Týmı bul joly da alǵan betinen qaıtqan joq, ol kandıdattyń ótken ómirine qatysty jaǵymsyz málimetter jarııalady.
Onyń aıtýynsha, Omarovanyń ıdeıasy sosıalıstik kózqarasty beıneleıdi.
«Osyndaı kózqarasy bar adamdy Amerıkanyń ulttyq jáne basty retteýshi bankin basqarýǵa taǵaıyndaý alańdaýǵa jáne qorqýǵa turarlyq jaǵdaı», dedi ol.
Ogaıo shtatynyń demokraty Sherrod Braýn respýblıkashylarǵa Omarovanyń KSRO-da óskenin aıtyp, aqparattyq shabýyl jasaǵan.
Tyńdaý barysynda Lýızıana shtatynyń senatory Djon Kennedı: «Sizdi ne professor, ne joldas dep atarymdy bilmeımin», dedi. Osylaısha ol Omarovanyń KSRO-da týyp-óskenin, komsomol qatarynda bolǵanyn meńzedi.
«Men Keńes Odaǵynda týyp-óstim. Onda barlyq adam osy uıymnyń múshesi boldy. Bul mekteptegi qalypty jaǵdaı», dep qysqa jaýap berdi Sáýle Omarova.
Sonymen qatar Kennedı Omarovanyń atalǵan uıymnan resmı túrde shyqqanyna qyzyǵýshylyq tanytyp, Omarovany kandıdatýradan jazbasha túrde bas tartýyn talap ete bastaǵanda, Sherrod Braýn: «Ol keńes azamattyǵynan bas tartty», ˗ dedi.
«Men kommýnıst emespin. Bu ıdeologııany qoldamaımyn. Men eshqashan ózimdi osyndaı topqa jatqyzǵan emespin jáne marksıstik nemese kommýnıstik pikirtalastarǵa qatysqan joqpyn», dep jaýap berdi. Sóziniń sońynda: «Men bul elge keldim. Amerıkalyq bolǵanymdy maqtan etemin», dedi Qazaqstan týmasy.
Eske salaıyq, keshe amerıkalyq BAQ-tar Sáýle Omarovanyń 1995 jyly Vıskonsın shtatynda urlyq jasaǵanyn jarysa jazǵan bolatyn. Ol kezde 28 jasta bolǵan áıel 214 dollar turatyn taýardy qoldy qylǵan. Onyń ishinde tórt jup aıaq kıim, eki bótelke átir sý, eki belbeý jáne shulyq bar.
