Kıno • 19 Qarasha, 2021

Almatyda IX halyqaralyq «Bastaý» kınofestıvali ótedi

30 qarasha men 4 jeltoqsan aralyǵynda Almatyda IX halyqaralyq «Bastaý» stýdenttik jáne debıýttik fılmder kınofestıvali ótedi, dep habarlaıdy Egemen.kz.

Botakóz BAQBERGEN

Jyl saıyn ótetin kıno merekesin Almaty qalasy ákimdiginiń, T.Júrgenov atyndaǵy Qazaq ulttyq óner akademııasynyń, Turan Ýnıversıtetiniń, Ulttyq kınony qoldaý memlekettik ortalyǵynyń jáne Sh.Aımanov atyndaǵy «Qazaqfılm» kınostýdııasynyń qoldaýymen «Tanaris Production» kınokompanııasy uıymdastyrady.

Festıvaldiń negizgi maqsaty – Eýropa men Azııanyń jas kınematografısteri arasynda yntymaqtastyq ornatý, olardyń jumystaryn qoldaý jáne ilgeriletý, túrli janrdaǵy kınofılmderdi jasaýǵa degen qyzyǵýshylyqty arttyrý.

«Bastaý» kınofestıvali - jas rejısserler men ssenarısterge óz jobalaryn iske asyrý úshin biregeı alań. Kınofestıvaldiń konkýrstyq baǵdarlamasy 3 bólimnen turady:

Tolyqmetrajdy fılmder baıqaýy - Bastau DEBUTS,
Qysqametrajdy fılmder baıqaýy - Bastau SHORTS,
Derekti fılmder baıqaýy - Bastau DOCS.

Festıval Dáýren Qamshybaevtyń baıqaýdan tys kórsetiletin debıýttik kartınasy – «Zere» fılminiń ulttyq premerasymen ashylady. Buǵan deıin bul fılm tek Brazılııadaǵy São Paulo International Film Festival halyqaralyq kınofestıvaline qatysqan. Kartınada basty rólderde tanymal juldyzdar Berik Aıtjanov, Murat Bısenbın, Adına Bajan jáne Olga Landına oınaıdy.

Sondaı-aq, konkýrstan tys Aıjan Qasymbektiń «Ot» kartınasy kórsetiledi. Fılmniń álemdik premerasy jaqynda ǵana Pýsandaǵy (Ońtústik Koreıa) halyqaralyq kınofestıvalde ótti. Sonymen qatar, bıyl fılm Germanııadaǵy Film Festival Cottbus jáne Sıngapýrdaǵy Singapore International Film Festival kınofestıvalderine qatysty. Al basty róldi somdaǵan Tólepbergen Baısaqalov Sochıdegi X Russian British Sochi international film festival & Awards 2021 kınofestıvalinde jáne Los-Andjelestegi Asian World Film Festival kınofestıvalinde eki birdeı marapatty jeńip aldy.

Sonymen qatar, baıqaýdan tys Ádilhan Erjanovtyń jańa fılmi, «Eýrazııa patshaıymdary» derekti fılmi jáne Samat Nuralıevtiń «Mýltıfrýkty» anımasııalyq kartınasy kórsetiledi.

Bólek baǵdarlamalar sheńberinde: Bastau FOCUS – Aýǵanstanda shyǵarylǵan fılmder, AROUND THE WORLD - iri halyqaralyq kınofestıvalderdiń júldegerleri jáne BASTAU CENTRAL ASIA - Ortalyq Azııa elderiniń jańa fılmderi usynylady.

Ashylý saltanaty 30 qarasha kúni Abaı atyndaǵy Qazaq ulttyq opera jáne balet teatrynda ótedi. Festıvaldiń negizgi alańy - Chaplin Cinemas kınoteatrlar jelisi.

«Bastaý» IX Halyqaralyq stýdenttik jáne debıýttik fılmder kınofestıvaliniń kestesin - https://bastauiff.com/ saıtynan kóre alasyzdar.