Oblystyq mádenıet basqarmasy uıymdastyrǵan dástúrli óner baıqaýyna elimizdiń ár óńirinen kelgen 18 ónerpaz qatysty. Kileń kúmis kómeı ánshiler bas qosqan dástúrli án merekesinde Nurjannyń buryn kóp aıtylmaı kelgen «Kóken-aı», «Bátımaǵa», «Ara-aı», «Asyl-aı», «Jan sáýlem», «Nazym» atty shyǵarmalary shyrqaldy. Baıqaýǵa qatysqan jyrshy-termeshiler Nurjannyń nazymdary men ánderin oryndaýmen qatar, burynnan ózderiniń án qorjynynda júrgen mýzykalyq shyǵarmalaryn shyrqap, dástúrli ánge sýsap qalǵan kórermen qaýymnyń qulaq quryshyn qandyrdy.
Baıqaýǵa qatysýshylardyń ónerin belgili jyraý, folklor zertteýshi Almasbek Almatov bastaǵan qazylar alqasy baǵalap otyrdy.
– Qostanaı óńirinde osy kúzdiń ózinde jurtty eleń etkizerlik eki birdeı aýqymdy shara bolyp ótti. О́tken aıda Ybyraı Altynsarınniń 180 jyldyǵyna arnalǵan respýblıkalyq alaman aıtysqa arnaıy kelip qatystym, endi mine, sáti túsip Tobyl qalasyndaǵy jyrshy-termeshiler baıqaýyna taǵy kelip otyrmyn. Munyń ózi Tobyl-Torǵaı óńirindegi dástúrli ónerimizdiń damýy erekshe ekenin kórsetedi. Búgingi baıqaýǵa da ár óńirdegi dástúrli jyr-terme mektepteriniń ókilderi kelip, óner kórsetip jatyr. О́nerpazdardyń olqysy joq, kileń myqtylar. Bir eskere ketetin dúnıe, mundaı baıqaýlarda jyrshylardy bólek, termeshilerdi bólek baǵalaý kerek, áıtpese qazylarǵa qıyn tıip jatyr, – dedi áıgili jyraý.
Oblystyq mádenıet basqarmasynyń basshysy Erlan Qalmaqov bul eskertpeniń oryndy ekenin, aldaǵy jyly ótetin baıqaýda qaperge alynatynyn aıtty.
Baıqaýdyń bas júldesin Qyzylorda oblysynan kelgen kúmis kómeı jyrshy Malıka Aldamjarova jeńip aldy. 1-orynǵa elordalyq jas daryn Birjan Aıtahmetov ıe boldy. Al baıqaýǵa Almaty qalasynyń atynan qatysqan Jasulan О́temuratovqa 2-oryn buıyrsa, shymkenttik ónerpaz Qylyshbek Synadaı men elordalyq Uldana Nurtýǵan úshinshi oryndy ózara bólisti. О́nerpazdardyń bárine Nurjan ánderi baıqaýynyń arnaıy músinshesi men aqshalaı syılyq tabys etildi.
Qostanaı oblysy
