«Birneshe aıdan keıin, kelesi jyldyń naýryzynda bizdiń partııamyzǵa 15 jyl tolady. Partııa Qazaqstan tarıhynda tuńǵysh ret balamaly negizde ótkizilgen prezıdenttik saılaý qarsańynda meniń reformalarymnyń baǵytyn qoldaıtyn jalpyhalyqtyq koalısııanyń arqaýynda qurylǵan bolatyn. Halyqtyń qalaýyna sáıkes basty saıası kúshke aınalǵan pikirlester odaǵy dál sol kezde qalyptasqan edi! Bizdiń jas demokratııamyz da dál sol kezde áleýetin aıqara ashqan edi!» – bul sózderdi Elbasymyz – «Nur Otan» partııasynyń Tóraǵasy Nursultan Nazarbaev partııanyń HV seziniń minberinen aıtqan bolatyn. Sodan beri de tórt aıdan astam ýaqyt óte shyqty. Dál erteń, 1 naýryzda partııanyń qurylǵanyna dál 15 jyl tolǵaly otyr. Búginde oılap otyrsaq, «Nur Otannyń» dún-dúnıeni jańǵyrtyp jetetin kóktemniń alǵashqy kúninde dúnıege kelýiniń ózinde sımvoldyq mán bar sııaqty kórinedi. Iá, «Nur Otan» saıası arenaǵa shyqqaly beri memlekettiń damý tarıhynda kóp jańalyq, kóp jaqsylyq boldy. Bola da beredi. Búkil halyqtyń qoldaýyna ıe bolǵan partııanyń isi qashanda baıandy.
Eldiń saıası ómirindegi mereıli oqıǵanyń qarsańynda el gazeti «Egemen Qazaqstan» partııa Tóraǵasynyń partııa týraly ár jyldarǵy tolǵamdarynan úzindilerdi oqyrman nazaryna usynýdy jón kórdi. Elbasymyzdyń bul sózderi «Nur Otan» partııasynyń Qazaqstannyń búgingi bıik beleske kóterilýinde atqarǵan rólin, alar ornyn aıshyqty ashady.
Partııa qurylǵan 1999 jyly jaǵdaı kúrdeli edi. Elimiz Azııadaǵy qarjy daǵdarysynyń saldarlaryn bastan keship jatty. Qazaqstan munaıǵa, qorǵasynǵa, myryshqa, alıýmınııge álemdik baǵalardyń túsip ketýinen zııan shegýmen boldy. Daǵdarys keıbir kórshiles memleketterdiń qarjy júıesiniń kúıreýine ákelip soqtyrdy. Sol tusta Qazaqstannyń kóptegen kásiporyndaryna bankrot bolý qaýpi tóngen edi.
Syrtqy shepterdegi jaǵdaı da kádimgideı qaýipti qalyptasty. Ońtústik jaq betten halyqaralyq lańkesterdiń tikeleı shabýylynan Ortalyq Azııa memleketteriniń aýmaqtyq tutastyǵy synaqqa tústi. Kóptegen adam qurban boldy. Tutastaı alǵanda óńir dúbirge tolyp turdy.
Biz ótken onjyldyqtyń aıaq jaǵynda jalaqy men zeınetaqynyń uzaq ýaqyt keshigip tólenýi qoǵamda eleýli shıelenis týǵyzǵanyn ashyq aıtýǵa tıispiz.
Qoǵamda áleýmettik qarsylyq deńgeıi joǵary bolyp turdy.
Dál sol kezde Memleket basshysynyń ishki jáne syrtqy saıasatyn qoldaıtyndyǵy jóninde ashyq málimdegen ondaǵan myń adamdardyń partııa aıasynda toptasýy óziniń turaqtandyrýshy rólin atqardy. «Otan» partııasy el basshylyǵynyń turaqty makroekonomıkalyq ahýaldy saqtaý, otandyq óndirisshilerdi qorǵaý, salyq salasynda tártip ornatý jónindegi qolǵa alǵan sharalaryn qoldady. Qazaqstannyń 2030 jylǵa deıingi Damý strategııasy sizderdiń de uzaqmerzimdi partııalyq baǵdarlamalaryńyzǵa aınaldy.
Búginde ekonomıkadaǵy jaǵdaı sapaly túrde ózgerdi. Tek 5 jyldyń ishinde IJО́-niń ósimi 53 paıyzdy qurady. 5 jylda jalaqy 2 ese ósti, al jumyssyzdyq deńgeıi 2 ese tómendedi. Tek 2003 jyldyń ózinde jumysqa tartylǵan turǵyndardyń sany 400 myń adamǵa artty. 2004 jyldyń qańtarynan bastap memlekettik apparat pen áskerı qyzmetshilerdiń jalaqysy 50 paıyzǵa ósirildi. Sonyń ózinde salyqtar tómendetildi.
5 jyl buryn mundaı bolatynyna sený qıyn edi. «Otannyń» saıası qoldaýy reforma tabysynyń mańyzdy belgileriniń birine aınaldy. Sondyqtan da eldiń damýyndaǵy tabystar partııanyń da tabystary bolyp tabylady.
2004 jylǵy 12 naýryz
Barlyq ekonomıkalyq jáne saıası toptardyń esine salaıyn: olar qarjylyq jáne saıası turǵydan ıe bolǵan múmkindikterdiń bári barlyq osy jyldary memleket júrgizgen saıasattyń arqasynda ǵana keldi. Barlyǵyna qoǵamdyq turaqtylyq arqasynda ǵana qol jetti. Turaqsyzdandyrýdyń kez kelgen áreketi Qazaqstannyń memlekettiligi men táýelsizdigine qater retinde qabyldanýǵa tıis. Sondyqtan janjaldy model emes, tek syndarly yqpaldastyq qana yńǵaıly bolyp tabylady. Sondaı yqpaldastyqtyń eń aýqymdy múmkindikterin qoǵamdy demokratııalandyrýdyń jańa belesi beredi, biz buǵan búgin qadam bastyq. Biz buǵan, qoǵamǵa budan bylaıǵy reformalardyń oılastyrylǵan ári dáıekti baǵdarlamasyn usyna otyryp, kámil senemiz.
Jáne búgin biz taǵy bir anyq túsinip, qabyldaýǵa tıis daýsyz aqıqat mynaý: kez kelgen memlekettiń tıimdiligi onyń naqty saıası qurylysyna qaramastan, ol tómendegi maqsattardy dáıekti de oıdaǵydaı ustanatynyna qarap baǵalanady, olar:
– saıası turaqtylyq;
– memleket tutastyǵyn saqtaý;
– táýelsizdikti saqtaý;
– bolashaq damý áleýetin jasaý.
Táýelsiz memleketimiz – Qazaqstan Respýblıkasy naq osy asqaq tarıhı maqsattarǵa adal.
Tutas alǵanda eldiń saıası júıesin odan ári jańǵyrtý jolynda sheshetin mindetteri sondaı.
«Otan» partııasynan men qýatty jańǵyrtýdyń saıası kúshin kóremin, ol qoǵamdy damytýdyń jańa belesinde júrgiziletin reformalardyń budan bylaıǵy tabystaryn qamtamasyz etedi.
2004 jylǵy 15 maýsym
Partııa ıdeologııasynyń negizinde ne bolýy tıis?
Partııa «Qazaqstan-2030» Strategııasyna arqa súıeýi tıis dep sanaımyn. Ol sondaı-aq, Qazaqstanda turatyn barlyq ulttar adamdarynyń múddelerin bildirýshi bolyp, ultaralyq jáne konfessııaaralyq turaqtylyq ıdeıasyn dáripteýi tıis. Bul baǵytty ultaralyq jáne konfessııalyq ortada shıelenistiń ósýin arandatýǵa qabiletti radıkaldyq dinı jáne ultshyldyq ıdeıalardyń artýy túrindegi búldirýshi qubylystardy qatań beıtaraptandyryp, qaǵıdattyq turǵyda júrgizý qajet.
Ulttyń taǵdyry, onyń mádenıeti, tili men dástúrlerine degen shynaıy qamqorlyqtyń basqa halyqtardyń dál osyndaı qajettilikterine nuqsan keltirýmen eshqandaı ortaqtyǵy joq.
Bizge ınvestısııalar kelip jatyr, bizdi qurmetteıdi, qoǵamda saltanat qurǵan turaqtylyq pen kelisimge tánti bolady. Demek, ózimizdiń damýymyzǵa kómektesetin bizdiń asa mańyzdy ıgiligimiz naq osy bolyp tabylady. Kelińizder, ony birlese saqtaıtyn bolaıyq.
Jumystyń osy zamanǵy túrleri men ádisterin paıdalana otyryp, partııanyń ıdeologııalyq jumysyn kúsheıtý qajet.
Partııaǵa el basshylyǵynyń Qazaqstannyń básekege qabilettiligin arttyrýǵa baǵyttalǵan bastamasyna, atap aıtqanda, álemniń básekege barynsha qabiletti elý eliniń qataryna kirý strategııasyna tabandylyqpen qoldaý kórsetýdi qamtamasyz etýi qajet.
О́z halqynyń órkendeýi týraly oılaıtyn partııaǵa budan asqaq, budan góri rýhtandyratyn ne bolýy múmkin?
2006 jylǵy 4 shilde
Sońǵy onjyldyqtarda búkil álemdegi saıası úderister birneshe eselene kúrdelendi. Sondyqtan qazirgi zamanǵy saıası kóshbasshyǵa kásibı-múddelester komandasy asa qajet.
«Nur Otan» partııasy sońǵy jyldar boıyna men úshin osyndaı senimdi tirekke, kásibı de qalyptasqan komandaǵa aınalyp otyr.
«Nur Otan» eldiń búkil halqynyń múddelerin beıneleıtin obektıvti kóshbastaýshy partııaǵa aınaldy.
Biz birigý úderisteri men iri saılaý naýqandarynyń kezeńderinen tabysty óttik. Endi bizdiń jınaqtalǵan tájirıbe men kúsh-jigerdi kókeıkesti áleýmettik mindetterdi sheshýge, sondaı-aq, partııany odan ári sapaly nyǵaıtýǵa paıdalanýymyz kerek.
«Nur Otannyń» damýynda jańa beles bastaldy.
Partııa Qazaqstandaǵy júıeli ózgeristerdiń naqty alǵa aparýshysy, eldegi buqaralyq saıası jumystardyń eń tıimdi tetigi bolýǵa tıis.
«Nur Otan» damýdyń uzaqmerzimdi baǵytynyń sabaqtastyǵyn qamtamasyz etip qana qoımaı, sonymen birge el damýynyń jańa strategııalyq ıdeıalaryn da týyndatýy kerek.
Qazirgi tabysty elderdiń tájirıbesi olardyń damýyndaǵy serpilisterdiń kóp jaǵdaıda negizgi saıası partııanyń kóshbasshylyǵy men tıimdiligi esebinen qamtamasyz etilgenin kórsetip berip otyr.
Japonııa, Shvesııa, Sıngapýr, Malaızııa, Úndistan, Meksıka sııaqty elderdiń damý tájirıbesi betburysty saıası jáne ekonomıkalyq reformalar kezeńinde jetekshi partııasy bar kóppartııaly júıeniń basqarýdyń ońtaıly modeli bolyp tabylǵanyn kórsetip berdi.
Biz Qazaqstanda dál osyndaı buqaralyq, tıimdi, qazirgi zamanǵy partııany qurdyq.
...О́sip-órkendegen jáne qýatty Qazaqstan – biz bastaǵan jańǵyrýlardyń maqsaty men mazmuny. Men elimizdiń nyǵaıyp, tolysqanyn, halyqaralyq bedeliniń óskenin kórgen kezde maqtanysh sezimine bólenemin. Munda «Nur Otan» partııasy mańyzdy ról atqarady.
«Nur Otan» búginde bizdiń saıası júıemizdiń keskin-kelbeti. Búginde naq osy «Nur Otanǵa» Qazaqstannyń taǵdyry úshin jaýapkershiliktiń bar salmaǵy júktelip otyr. Nurotandyqtarǵa búkil elimiz qaraıdy.
Biz – saıasat pen ekonomıkada synnan ótken kúshpiz. Biz birtutaspyz, qýattymyz jáne sondyqtan el bizden jańa tabystar men jeńister kútedi.
2008 jylǵy 17 qańtar
Kezinde basqa ilgeri elderdegi – Sıngapýrdaǵy, Ońtústik Koreıadaǵy, Japonııadaǵy sııaqty bizdiń elde de demokratııa progresshil, kóshbasshy partııamen – «Nur Otanmen» birge dúnıege kelgen bolatyn. «Nur Otannyń» qalyptasý tarıhy – demokratııanyń álemdik tájirıbesiniń ajyraǵysyz bóligi.
Birinshi sezdiń qalaı ótkeni jadymyzda birjola jattalyp qaldy. Ol kezde bizdiń batyl armandarymyzdyń ózi qazirgi jetistikterimizge de ilese almaı jatatyn. Qazir osy zalda men ózimniń Birinshi sezde aıtqan sózderimdi qaıtalamaqshymyn, ol sózder 15 jyl ótkende de kókeıkestiligin joımaǵan:
«Meniń qymbatty joldastarym, sizderge Otan dep soqqan júrekterińiz úshin úlken alǵysymdy aıtamyn. Sizderdiń halyqtyń qadir-qasıetin oılaıtyndaryńyz, memlekettilikti saqtaý men nyǵaıtý jolynda bárińiz bir úıdiń balasyndaı jumylǵandaryńyz úshin rahmet deımin!».
Men ózimmen birge jańa eldi ornatysqan barlyq qazaqstandyqtarǵa eńbegi men tózimdiligi úshin alǵysymdy bildiremin! Aıryqsha alǵysymdy menimen birge bizdiń partııamyzdy qurysqan seriktesterime arnaımyn! «Nur Otan» partııasyn órkendetýge úles qosqandardyń bárine alǵys aıtamyn!
Bizdiń partııa – «Qazaqstan-2050» Jalpyulttyq demokratııalyq koalısııanyń biriktirýshi kúshi. Búginde «Nur Otan» – Qazaqstannyń HHI ǵasyrda tabysty qadamdar jasaýyn qamtamasyz etetin saıası kóshbasshylyqtyń basty tetigi! Qazir bizde halqymyzdy jańa jeńisterge senimdi jeteleý úshin ne qajettiniń bári bar. Eń bastysy, barlyq qazaqstandyqtardyń zor senimi men qoldaýy. Bul – «Nur Otannyń» HHI ǵasyrdaǵy saıası kóshbasshylyǵynyń negizgi bastaýy. Qazir partııa resýrstaryn durys bólý kerek. Ár nurotandyqtyń partııalyq jaýapkershiligin kúsheıtý qajet. Biz partııa jumysynyń qýatyn úsh qaıtara eselendirýge tıispiz.
...«Nur Otannyń» baǵdarlamalyq qujattary ár kezde de naqtyly boldy, sondyqtan olar nátıjeli bolyp keldi.
Biz eshqashan qurǵaq qııalǵa berilgen emespiz.
Biz eshqashan bulyńǵyr mindetter qoıyp, bos ýádeler bergen joqpyz.
Biz árbir sózimizdi ár kezde de shynaıy eńbekpen jáne naqty istermen aıǵaqtap otyramyz.
Men ár kezde de solaı bolatynyna senimdimin!
О́ıtkeni, «Nur Otan» – kóshbasshy partııa!
2013 jylǵy 19 qazan
