Saraptamalyq saýaldamalar formatynda órbigen zertteýde qalanyń qarapaıym turǵyndary men sarapshylar pikiri tyńdaldy. Olardyń kózqarasy negizinde anyqtalǵan problemalar strategııalyq sessııalarda talqylandy. Mundaı sessııalardyń qalada altaýy ótkizilgen. Onda megapolıstegi áleýmettik, ekologııalyq, saıası máselelermen qatar, halyqaralyq jáne aımaqtyq áleýmettik shıelenisterdiń Almaty qalasyna yqpaly da zerdelendi. Mıllıondar toǵysqan megapolıs turǵyndaryn ekologııa, tazalyq, bıýrokratııalyq problemalar kóbirek alańdatatyny anyqtalǵan.
Joba jetekshisi B.Nálibaev saıası mádenıet turǵyndar kóp bile bermeıtin taqyryp ekenin, munymen tek ǵalymdar aınalysatynyn jetkizip, desek te bul qala turǵyndarynyń saıası ómiriniń jańarýyna aıryqsha yqpal etetin uǵym dep esepteıdi. Onyń aıtýynsha, saıası mádenıet taqyrybyn aıshyqtaýǵa belgili ǵalymdar men joǵary bilim oshaqtary da ún qosqan.
Aıtalyq, «Jastardyń saıası mádenıetin arttyrý joldary» atty kóshpeli semınar-trenıngterge túrli mamandyq ıeleri qatysty. Olardyń arasynda saıasattaný mamandyǵy boıynsha bilim alatyn stýdenttermen qatar, halyqaralyq qatynastar, jýrnalıstıka, tipti ınjenerlik kýrsta oqıtyndar bar. Bul saıası mádenıetti meńgerý mamandyq túrimen shektelmeıtininiń aıǵaǵy.
«Máńgilik Qazaqstan» qoǵamdyq qorynyń joba jetekshisi B.Nálibaevtyń sózine qaraǵanda, elimizdegi sońǵy jyldardaǵy saıası úderister osyndaı jobalardyń paıda bolýyna túrtki bolyp otyr.
– Bul jobanyń ataýy «Halyqtyń saıası mádenıetin arttyrýǵa baǵyttalǵan taqyryptyq is-sharalar ótkizý» dep atalady. Al semınar-trenıngterdiń maqsaty – bolashaǵynan zor úmit kúttiretin saıasattanýshylardy irikteý. Almaty qalasy saıası ózgeristerdiń epıortalyǵynda ornalasqan. Mundaǵy oqıǵalar qalǵan óńirlerge tikeleı áser etedi. Megapolıske jyl saıyn aımaqtardan ártúrli jastaǵy adamdar aǵylyp kelip jatyr. Áleýmettik jáne saıası shıelenister ýshyqpas úshin osyndaı is-sharalar jıi ótýi kerek dep sanaımyz, – deıdi B.Nálibaev.
Tórt jerde uıymdastyrylǵan semınar-trenıngterge bes saıasattanýshy tartylǵan. Barlyǵy buǵan deıin saıası mádenıet taqyryby boıynsha ǵylymı jumystarmen aınalysqan mamandar. Mysaly, Jeńisbek Tólen, Nurken Aıtymbetov, Nurbolat Nyshanbaı syndy trenerler osy taqyrypta dıssertasııalyq eńbek jazǵan. Sonymen qatar olar qaladaǵy joǵary oqý oryndarynda pedagogıkalyq qyzmet atqarady.
Megapolıs turǵyndarynyń kóńil kúıine obektıvti túrdi zertteý júrgizý nátıjesinde «osaldyqtar matrısasy» men jol kartasy ázirlenip, jaýapty mekemelerge joldanbaq. Bul zertteýlermen aınalysyp jatqan áleýmettanýshy-ǵalym Elnur Muqashev onyń qanatqaqty joba ekenin aıtady. «Anyq qorytyndy alý úshin biz fokýs-toptarǵa ártúrli sanattaǵy turǵyndardy jınadyq. Olardyń arasynda jas ta, kári de, jumysbasty da, jumyssyz da, qazaq tildi de, orys tildi de, ártúrli ult ókilderi de, qalada burynnan turyp jatqan jáne jaqynda ǵana osynda kóship kelgen azamattar da bar. Zertteýge qaladaǵy barlyq aýdan turǵyndary qamtyldy. Mundaı ártúrlilik zertteý obektıvtiligin qamtamasyz etý úshin óte mańyzdy» deıdi ol.
Saraptamalyq saýaldamaǵa qaladaǵy kúrdeli máselelerdi jiti biletin bilikti sarapshylar tartylǵan. Olardyń árqaısysymen jeke suhbat júrgizilgen. Jumys tártibine baılanysty fokýs-top músheleri sııaqty, olardyń aty-jónderi de qupııa saqtalady. Alaıda olardyń pikirleri negizinde «osaldyqtar matrısasy» daıyndalyp, jol kartasy ázirlenbek.
ALMATY
