Ortalyq kommýnıkasııalar qyzmetinde ótken baspasóz konferensııasy barysynda jýrnalıster Mańǵystaý oblysynyń ákimi Nurlan Noǵaevtan Mańǵystaýdaǵy qýańshylyq aldaǵy ýaqytta qaıtalanbaý úshin qandaı sharalar qabyldanyp jatqanyn jáne bıyl óńirde qansha maldyń qyrylǵanyn surady.
Mańǵystaý oblysynyń ákimi aldymen qabyldanyp jatqan sharalarǵa toqtaldy.
«Jaratqannyń isine aralasý kúpirlik bolar. Kelesi jyly jańbyr jaýady dep eshkim aıta almaıdy. Buǵan deıin aıtqanymdaı, qýańshylyq 2-3 jyl boıy jalǵasyp keledi. Boljamdar boıynsha kelesi jyly da osyndaı jaǵdaı bolýy múmkin. Degenmen mal baǵý mádenıeti jáne ońtaılandyrý máseleleri boıynsha aýylsharýashylyq kásipkerlermen kezdesý ótkizdik. Memleket óz tarapynan qajetti qoldaýlardy kórsetip keledi», dedi ol.
Noǵaev atap ótkendeı, shyǵyn bolǵan maldy óteýge respýblıkalyq bıýdjetten 1,9 mlrd teńge qarajat bólingen.
«Málimet boıynsha 1 209 mal qyrylǵan. Onyń 950-i Aýyl sharýashylyq mınıstrliginiń qaramaǵyndaǵy bazaǵa tirkelmegen. Negizi ár mal basy bazaǵa tirkelýi kerek. Bul veterınarııalyq tekserister kezinde mal shyǵynynyń aldyn alýǵa septigin tıgizedi», deıdi oblys ákimi.
Nurlan Noǵaev baıandaǵandaı, oblysqa 77 myń tonna shóp jáne 53 myń tonna jem jetkizilgen. Qazirgi kúni 70 myń tonna shóp jetkizilip, iri eldi mekenderge taratyldy. Sondaı-aq 41 myń tonna jem basqa óńirlerden oblysqa jetkizildi.
