Alańǵa qatysýshylar azamattyq bastamalardy júzege asyrý men qoldaýdyń ózekti máselelerin, sonyń ishinde basym baǵyttardy, zamanaýı tásilderdi, úzdik tájirıbelerdi talqylap, barlyq múddeli taraptardy eskere otyryp, azamattyq belsendilikti damytý turǵysynda qolaıly jaǵdaılar qalyptastyrýdyń usynystaryn ázirledi.
Sharaǵa Azamattyq bastamalardy qoldaý ortalyǵynyń basqarma tóraıymy Lıma Dıas moderatorlyq jasady.
Alań jumysyn ashqan ol azamattyq qoǵamdy jańa jaǵdaıda damytýdyń ózekti tetikteri men tásilderin aıqyndaý qajet ekendigin atap ótti.
«Qazaqstanda azamattyq belsendilikti damytý jáne qoldaý – memlekettik saıasattyń basym mindetteriniń biri. Memleket basshysy Qasym-Jomart Toqaev 2021 jylǵy 1 qyrkúıektegi Qazaqstan halqyna Joldaýynda jergilikti ózin-ózi basqarýdy, azamattyq mádenıetti aýyldyq jerlerde damytýdyń mańyzdylyǵyn atap ótken bolatyn. Aldaǵy jyldary grant berýshi uıymdardyń jumysynda ózgerister jáne olardy qoldaýdyń jańa tetikteri engiziledi dep kútilýde. Osylaısha, Ulybrıtanııanyń qaıyrymdylyq qorlary qaýymdastyǵy (ACF) koronavırýstyq ınfeksııanyń kommersııalyq emes sektorǵa áserine qatysty júrgizgen saýalnamasyna sáıkes, barlyq respondentter (96%), jańa granttyq baǵdarlamalardy iske qosý, qarjylandyrýdy ulǵaıtý jáne/nemese azaıtý arqyly koronavırýstyq pandemııaǵa baılanysty óz qyzmetin qandaı-da bir jolmen qaıta qurǵandyǵyn, úmitkerler men olardyń jobalaryn irikteý tásilin ózgertkendigin málimdedi. Demek, azamattyq qoǵamdy jańa jaǵdaıda damytýdyń ózekti tetikteri men tásilderin aıqyndaýdyń qajettiligi bar», dedi L.Dıas.
Saraptamalyq alań barysynda úkimettik emes, korporatıvtik jáne halyqaralyq sektorlardyń aldyńǵy qatarly uıymdarynyń ókilderi baıandamalary tyńdaldy.
Kezdesýde spıkerler retinde Qazaqstandaǵy Eýropalyq Odaq О́kildiginiń baǵdarlamalyq menedjeri Iýrıı Skaskevıch, Jańa jobalardy ilgeriletý jónindegi strategııalyq bastamalar agenttiginiń (RF) korporatıvtik ofısiniń strategııalyq basqarý jáne ishki aýdıt ortalyǵynyń dırektory Andreı Pysın, saıası sholýshy jáne jýrnalıst Nıkıta Shatalov, Qazaqstandaǵy amerıkandyq zańgerler qaýymdastyǵynyń azamattyq qoǵam jónindegi tehnıkalyq menedjeri Aıgúl Kaptaeva, Qazaqstandaǵy "Chevron" kompanııasynyń áleýmettik ınvestısııalar jónindegi keńesshisi Leıla Aıtmýhanova, Áleýmettik kásipkerlik jáne áleýmettik baǵdarlamalar salasyndaǵy táýelsiz sarapshy Janar Jaqsylyqova, «Qoǵamdyq mańyzy bar bastamalardy damytý qory» JQ tóraǵasy Ermek Májıtov, «Áleýmettik taldaý jáne seriktestik ortalyǵy» QQ ókili Konstantın Kovtýnes sóz sóıledi.
Alań uıymdastyrýshylary is-shara ÚEU men donorlyq uıymdar arasyndaǵy dıalog pen ózara is-qımyldy nyǵaıtýǵa, ortaq problemalardy sheshýge, sondaı-aq, Qazaqstan qoǵamyn qoldaý men damytýdyń tıimdi tásilderin qalyptastyrý úshin áleýmettik bastamalardy iske asyrýda resýrstardy jumyldyrý joldaryn izdeýge aıtarlyqtaı yqpal etetindigine senimdi.
Eske salaıyq, Almatyda Táýelsizdiktiń 30 jyldyǵyna arnalǵan «Qoǵam men memlekettiń turaqty damýy múddesindegi áriptestiktiń 30 jyly» atty mereıtoılyq X Azamattyq forým ótýde.
