Bul bastama «Samuryq-Qazyna» AQ 2022-2031 jyldarǵa arnalǵan Damý strategııasynda aıqyndaldy. Qujat Tuńǵysh Prezıdent – Elbasy Nursultan Nazarbaevtyń tóraǵalyǵymen ótken Qordy basqarý Keńesiniń otyrysynda bekitildi.
«Samuryq-Qazyna» AQ strategııa, turaqty damý jáne sıfrlyq transformasııa jónindegi basqarýshy dırektory Erlan Durmaǵambetov atap ótkenindeı, Qor ǵylymı qoǵamdastyqpen yntymaqtastyqty nyǵaıtyp, kompanııalardyń tehnologııalyq jańartylýyn jáne ınnovasııalardyń engizilýin qamtamasyz etetin tıimdi ári turaqty mehanızmdi iske asyrmaq. Ol úshin «Samuryq-Qazynada» ǵylymı-tehnıkalyq bastamalar Ortalyǵy qurylyp, Ǵylymı-tehnıkalyq keńes jumys isteıdi.
Qazirgi tańda Qor portfelinde 483 ǵylymı joba júzege asyrylyp jatyr. Taǵy 212-si iske qosylýǵa daıyndyq ústinde.
2022 jyly «Samuryq-Qazyna» toby portfeldik kompanııalarynyń enshiles kásiporyndarynda keminde 10 jańa jobany synaqtan ótkizý josparlanyp otyr. Olardyń sany jyl saıyn ulǵaıyp otyrady: 2023 jyly – 20 joba, 2024 jyly – 30 joba, 2025 jyly – 40 jáne 2026 jyldan bastap 50 jańa jobadan synalmaq.
«О́ndiristik múmkindikterimizdi eskere otyryp, ǵylymı-zertteý jobalary laboratorııadan tikeleı zaýyt-fabrıkalarǵa synaqtan ótkizilýge jiberiledi. «Samuryq-Qazyna» Qory men memleketimizdiń utatyny – osynyń arqasynda ónimdilik artyp, tabys kóbeıedi, jańa jumys oryndary paıda bolady», dedi Erlan Durmaǵambetov.
Budan bólek, «Samuryq-Qazyna» ǵylymı izdenis pen tájirıbelik konstrýktorlyq jumystar men ınnovasııalar úshin sarapshylardyń kadrlyq rezervin qalyptastyrý sharalaryn qolǵa alǵan. Bul baǵytta mindetti baǵdarlamalar ázirlenip jatyr. Qordyń ǵylymı-tehnıkalyq bastamalar Ortalyǵy zııatkerlik menshik portfelin qalyptastyryp, bilim men resýrstardy kádege jaratý úshin jaýapty bolady.
