О́mirden órilgen shynaıy shyǵarmanyń basty muraty adam kóńilin terbeý, sezimin shymshylaý. Jas sýretshi Nurbolat Asqardyń kenebindegi tanys ta beıtanys beıneler janymyzǵa jylylyq syılady. Á. Qasteev atyndaǵy óner mýzeıinde saltanat qurǵan kórme «Oshaq» dep atalypty. Ataýy men mazmuny úılesip tur. Jeroshaǵy byqsyp, qazany qaınaǵan qazaqy aýyldyń kánigi tirshiligi, áke tulǵasy, ana beınesi, aqshamdaǵy qońyr kesh adaldyqtyń ısin ańqytady. Sýretshi kenebindegi basty taqyryp otbasy, otbasylyq qundylyqtar jáne kúndelikti ómir tynysy. Nurbolat úshin otbasy – adam jan-dúnıesiniń qalyptasýynyń negizi. Bul negiz ishki álem men jeke kózqarasty, tipti adamdardyń keleshek taǵdyryn anyqtaıdy. О́ıtkeni otbasy – bul mahabbat, jeńis jáne adamdardyń rýhanı baılyǵy. Sýretshini árdaıym kúndelikti ómirdi erekshe maǵynamen toltyratyn qarapaıym ómir sıýjetteri qyzyqtyratynyn ańǵardyq.
Nurbolattyń qoltańbasy haqynda ónertanýshy Samal Mamytovanyń paıymy mynadaı: «Kez kelgen jeke kórmeniń negizgi maqsaty – sýretshiniń shyǵarmashylyǵyn múmkindiginshe tolyq kórsete otyryp, zeıindi kórermendi ol jasaǵan taqyryptardyń sheńberine shyǵarý. Avtordyń alǵashqy jumystarynan bastap onyń ómir sýretterin áserli ári kóńildi qabyldaýy stıl ereksheligin aıqyndap tur. Nurbolattyń keskindemesi – beıneli keskindeme men ımpressıonızmniń erekshe qospasy, ol ózine unaıtyn kórinisterdi jıi ózgertedi, «jyly» men «sýyq» tústerdi aıqyn túrde salystyra, túrli-tústi kontrasttardy qoldana otyryp tús «dybysyn» arttyrýǵa tyrysady. Onyń týyndylaryndaǵy saǵymnan bas tartýǵa kompozısııalyq sheshimder, faktýranyń túrliligi jáne iri jaǵystardyń yrǵaǵy áser etedi. Sýretshi adam janyna qajetti jylýlyqty, senim men meıirimdi «Oshaq», «Ana men bala», «Nemere», «Áńgime», «Oıý» jáne basqa da jumystaryna arqaý etedi. «Aq dastarqan» jáne «Tórteý» týyndysynda dastarqan basynda otyrǵan otbasy beınelengen. Kompozısııadaǵy jumsaq jyly túster jaılylyq pen jylylyqty berip qana qoımaı, sondaı-aq adamdardyń rýhanı baılanysyn, bir-birine degen iltıpat sezimderin ashyp kórsetedi».
Kúndelikti ómirden kórip júrsek te, tereń sezine bermeıtin keıbir sátterdiń naǵyz baqyt ekenin qylqalam qudireti qaperimizge salady. Anańnyń uıyqtap jatqan sýreti qandaı súıkimdi, ákeńniń shat-shadyman bop shalqyp otyrǵan júzi qandaı shyraıly. Áke tizesine basyn qoıyp alańsyz jatqan sábı netken baqytty. Oshaq basynda jegen ystyq baýyrsaq netken tátti. Aqshamdaǵy aýyl keshi sondaı ádemi... Bul Nurbolat kenebindegi janymyzǵa shýaq quıǵan áserli kórinister. Kórmedegi eń úzdik jumystardyń qataryna «Qaıyńdy», «Bozjyra», «Sýalma», «Taltús» peızajdaryn jatqyzar edik, onda sýretshi kún sáýlesi men aýany barynsha tazalyq pen qarqyndylyqqa toltyryp beredi.
– Bala kúnimizde sheshelerimiz «oshaqty teppe», «oshaqqa sý quıma», «oshaqtyń tóbesine shyqpa» degendi jıi aıtatyn. Biz osydan-aq oshaqtyń shańyraq úshin úlken kıesi baryn bilip óstik, oǵan qurmetpen qaradyq. Meniń uǵymymda oshaq pen otbasy egiz uǵym ári bul tatýlyq pen baqytty ómirdiń sımvoly. Shyǵarmama osyny arqaý etkim keldi. Kóbinese aýyl, otbasy qundylyqtary sekildi taqyryptar janyma jaqyn, – deıdi «Daryn» Memlekettik jastar syılyǵynyń laýreaty Nurbolat Asqar.
Otbasy qundylyqtaryn dáriptegen shyǵarmalar náziktikten nár alǵan. Kenepte kóktem kúniniń áýezdi dybystary, dala gúlderiniń hosh ıisi sezilip, qustardyń úni estiledi. Qarapaıym sıýjettik sýretterdiń ózinen ómir men bolmys, fılosofııalyq tolǵanystar, avtorlyq paıym baıqalady. Sýretshi búkil tirshilik bólshekteri men máńgilikti, tipti bir sáttik boıaýlardyń ózin ustap alýǵa yqylasty. Ár shyǵarmanyń bıigi qaıtalanbas súıkimdilikte jatyr. Sol súıkimdiliktiń ózegi – meıirim.
Meıirim shýaǵy...
ALMATY
