Aldyn alsa aıyǵady

Densaýlyq saqtaý mınıstrliginde Elba­synyń tapsyrmasymen ázirlengen res­pýb­lıkada onkologııalyq kómekti damytý baǵ­darlamasyn iske asyrýdyń birjyldyq qory­tyndysy shyǵarylýyna arnalǵan otyrys ótti. Oǵan Densaýlyq saqtaý vıse-mınıstri Erik Baıjúnisov, elimizdiń bas onkolog dárigeri Qýa­nysh Nurǵazıev, Astana qalasy Onkologııalyq dıspanseriniń bas dárigeri Muhtar Tóleýtaev jáne ózge de sala basshylary qatysty. Elimizde obyr dertinen bolatyn ólim-jitim qan aınalymy júıesi syrqatynan keıin ekinshi orynda eken. Jyl saıyn respýblıkamyzda 33 myń obyr dertine shaldyqqan adamdar anyqtalsa, olardyń qatarynda birinshi orynda sút bezi, odan keıin ókpe, as qorytý aǵzalary jáne teri qaterli isikteri oryn alatyn kórinedi. Osyndaı syrqatqa shaldyqqan 145 myńnan astam naýqastyń 10 myńy myna ómirden óte shyǵady. Onyń basty sebebi, azamattar aýrýy úshinshi, tórtinshi satyǵa jetkende ǵana qaralady. Aldyn alýǵa baılanysty obyrdy erte anyqtaýǵa baǵyttalǵan 6 skrınıng engizilgen. Olar jaqsy nátıjeler berýde, dedi sharany uıymdastyrýshylar. Mamandar Qazaqstanda atalǵan dertti álemdik standarttar deńgeıinde emdeý úshin barlyq jaǵdaılar jasalyp jatqanyn da nazardan tys qaldyrmady. Bıylǵy jyly 5 óńiraralyq joǵary tehnologııalyq onkologııalyq ortalyqtar qurylmaq. Onda pasıentterdi emdeý men dıagnostıkalaýdyń eń zamanaýı ádisteri júzege aspaq. Budan basqa Astanada súıek obyryn emdeýde biraz jetistikterge qol jetken. Sonymen birge, Astana men Almatydaǵy ortalyqtarda leıkozǵa shaldyǵyp emdelgen balalardyń 75 paıyzy oń nátıje kórsetken. Qazaqstan tolyǵymen obyrdy emdeýdiń halyqaralyq standarttaryna kóshkenin atap ótkenimiz abzal. Tek byltyrǵy jyldyń ózinde 150 jas maman Eýropa, Azııa jáne AQSh-tyń jetekshi klınıkalarynda bilim jetildirse, sondaı-aq 520 mamany onkologııa jáne radıologııanyń ózekti máseleleri boıynsha tájirıbe almasyp qaıtqan. Saladaǵy barlyq qyzmetti tıimdi úılestirý úshin Densaýlyq saqtaý mınıstrligi janynda arnaıy shtab qurylyp, onkologııalyq qyzmet boıynsha úlken mindetter júktelgen. Qaterli dertti erte anyqtaýdy nasıhattaý maqsatynda aǵymdaǵy jyldyń 1 naýryzynan 15-ine deıin elimizdiń barlyq onkologııalyq ortalyqtarynda árbir adam qajetti tekserýlerden óte alatynyn eske sala ketsek deımiz. Ábdirahman QYDYRBEK, «Egemen Qazaqstan».