Ekonomıka • 03 Jeltoqsan, 2021

Zeınetaqy jınaǵyn alýdyń jetkilikti deńgeıi ósedi

16076 ret kórsetildi

Qazaqstanda zeınetaqy jınaǵyn alýdyń jetkilikti deńgeıi aıtarlyqtaı ósedi. Biryńǵaı jınaqtaýshy zeınetaqy qory eń tómengi jetkilikti deńgeı shegi (TJSh) qalaı esepteletinin túsindirdi, dep habarlaıdy Egemen.kz.

BJZQ málimetinshe, 2021 jyldyń qańtarynda «Qazaqstan Respýblıkasynyń keıbir zańnamalyq aktilerine ekonomıkalyq ósýdi qalpyna keltirý máseleleri boıynsha ózgerister men tolyqtyrýlar engizý týraly» zańy kúshine endi. Zańǵa sáıkes, azamattarǵa zeınetaqy jınaqtarynyń bir bóligin turǵyn úı jaǵdaıyn jaqsartý, emdelýdiń aqysyn tóleý, sondaı-aq, jeke basqarýshy kompanııalarǵa ınvestısııalyq basqarýǵa berý úshin paıdalaný quqyǵy beriledi. Bul quqyqty zeınetaqy jarnalaryn turaqty jáne tolyq kólemde aýdarý esebinen eń tómengi jetkilikti deńgeı sheginen asatyn jáne bolashaqta eń tómengi zeınetaqy mólsherinen kem emes zeınetaqy tólemin alýǵa múmkindigi bar salymshylar paıdalana alady.

«Azamattardyń paıdalanýy úshin qoljetimdi zeınetaqy jınaqtary tek mindetti zeınetaqy jarnalaryn jáne mindetti kásiptik zeınetaqy jarnalaryn ǵana emes, sondaı-aq, olardy ınvestısııalaýdan alynǵan ınvestısııalyq tabysty da qamtıdy. QR «Qazaqstan Respýblıkasynda zeınetaqymen qamsyzdandyrý týraly» zańynda: zeınetaqy jınaqtarynyń eń tómen jetkilikti shegi - Qazaqstan Respýblıkasynyń Úkimeti bekitken ádistemege sáıkes aıqyndalǵan, respýblıkalyq bıýdjet týraly zańda belgilengen jáne tıisti qarjy jylynyń 1 qańtarynda qoldanysta bolatyn eń tómen zeınetaqy mólsherinen kem emes aı saıynǵy zeınetaqyny qamtamasyz etý úshin qajetti mindetti zeınetaqy jarnalary jáne (nemese) mindetti kásiptik zeınetaqy jarnalary esebinen qalyptastyrylǵan zeınetaqy jınaqtarynyń eń tómen mólsheri dep aıqyndalǵan», delingen habarlamada.

TJSh aıqyndaý ádistemesi Qazaqstan Respýblıkasy Úkimetiniń 2013 jyldyń 2 qazanyndaǵy №1042 qaýlysymen bekitilgen.

Ádistemege sáıkes TJSh mólsheri árbir jas erekshelikteri úshin esepteledi jáne bolashaq zeınetaqy tólemderi men zeınetaqy jarnalarynyń ósýin eskeredi. Bul rette Qazaqstan Respýblıkasynyń «Respýblıkalyq bıýdjet týraly» zańyna sáıkes, jyl saıyn ındeksteletin eń tómengi jalaqy (ETJ), eń tómengi zeınetaqy (ETZ), eń tómengi kúnkóris deńgeıi (ETKD) sııaqty áleýmettik kórsetkishter qoldanylady. Osyǵan baılanysty TJSh mólsherin esepteý jyl saıyn atalǵan kórsetkishterdiń ósýin eskere otyryp júrgiziledi.

Sondaı-aq ádistemege sáıkes TJSh anyqtaý úshin Qazaqstan Respýblıkasy Eńbek jáne halyqty áleýmettik qorǵaý mınıstrliginiń usynysy boıynsha jáne Qazaqstan Respýblıkasy Ulttyq ekonomıka mınıstrliginiń kelisimi boıynsha jyl saıynǵy negizde qabyldanatyn kórsetkishter paıdalanylady.

Sońǵy jańalyqtar

Uqsas jańalyqtar