«Qazaqstan Respýblıkasy Indýstrııa jáne ınfraqurylymdyq damý mınıstriniń 2020 jylǵy 31 jeltoqsandaǵy elimizdegi áýe keńistiginde pılotsyz ushý apparattaryn paıdalaný qaǵıdalaryn bekitý týraly № 706 buıryǵyna sáıkes, «Áziret Sultan» memlekettik tarıhı-mádenı qoryq-mýzeıi aýmaǵynda dron apparatyn ruqsatsyz ushyrýǵa tyıym salyndy. Bul sheshim halyq kóp shoǵyrlanatyn aımaqtyń qaýipsizdigi jáne tarıhı eskertkishterdi qorǵaý maqsatynda mańyzy zor», delingen habarlamada.
Pılotsyz ushý apparatyn kúzetiletin obektilerdiń ústinen ushyrý úshin Qazaqstan Respýblıkasynyń Ulttyq qaýipsizdik organdarymen jáne Memlekettik kúzet qyzmetimen keminde 5 jumys kúni buryn maquldanýy tıis.
«Áziret Sultan» memlekettik tarıhı-mádenı qoryq-mýzeıiniń qorǵaý aımaǵy 88,7 gektardy quraıdy. Atalǵan aýmaqqa Qoja Ahmet Iаsaýı, Rábııa Sultan Begim keseneleri men segiz qyrly saǵana, jerasty qylýeti, juma meshiti, Kúltóbe qalashyǵy jáne han ordasy men han meshiti syndy tarıhı obektiler kiredi.
