О́ner • 08 Jeltoqsan, 2021

«Qazaqfılm» Máskeýdegi kıno naryǵyna qatysyp jatyr

Máskeý halyqaralyq «Reseı kınobıznesi» kıno naryǵy jáne forýmynyń negizgi iskerlik baǵdarlamasynyń jumystaryna qatysyp jatqan Sh.Aımanov atyndaǵy «Qazaqfılm» AQ óndiris jónindegi vıse-prezıdenti Aıdar Batalov Ortalyq Azııa elderiniń jobalaryn tanystyrý sheńberinde kópshilikke elimizdiń basty kıno alańy – «Qazaqfılmdi» tanystyryp, kınostýdııanyń qyzmetteri men jańa jobalary týraly egjeı-tegjeıli baıandap berdi, dep habarlaıdy Egemen.kz.

Gaýhar QAPASh

Aıdar Batalov óziniń alǵy sózinde Máskeýdegi kıno naryqtyń uıymdastyrýshylaryna shaqyrǵandary úshin alǵysyn aıtyp, búgingi kúni Covid-19 pandemııa saldarynan zardap shekken kıno óndirisi úshin osyndaı is-sharalardy ótkizýdiń mańyzdylyǵyn atap ótti.

Sonymen qatar kınostýdııanyń vıse-prezıdenti Qazaqstan men Reseıdiń birlesip fılmder shyǵarý týraly (ko-prodýksııa), sondaı-aq Reseı Federasııasy aýmaǵynda qazaqstandyq fılmderdiń dıstrıbýsııasy týraly aıtty.

«Qazaqfılmniń» tarıhy týraly baıandaǵan Aıdar Batalov, Táýelsizdik jyldar ishinde kınostýdııada 200-den astam kórkem, 300 derekti, 100 qysqametrajdy jáne 70 anımasııalyq fılm túsirilgeni týraly aıtty. Odan bólek, A.Batalov sońǵy jyldary ekranǵa shyqqan «Qazaqfılmniń» jańa týyndylary týraly sóz qozǵap, kınostýdııanyń aldaǵy jyldarǵa josparlanǵan tusaýkeserler týraly aıtyp berdi. Prezentasııanyń sońynda Aıdar Batalov jınalǵandarǵa óndiristegi fılmderdiń úzindilerin kórsetip, rejısser Danııar Qamshybaevtyń «Zere» fılmin tamashalaýǵa shaqyrdy.

«Joǵary deńgeıde túsirilgen túrli janrdaǵy fılmderdi kórdik. Reseıde, ásirese qazaq komedııalaryn unatady. Pandemııa kezinde úıde otyrǵanda bárimiz tamashaladyq. Árıne qazaqstandyq kıno aýqymdy tarıhı qoıylymdarymen de áıgili. Máselen bárimiz «Tomırıs» fılminiń Reseıde shyǵýyn kútip, kartınany ınternet platformalarda kórdik», dedi «Reseı kınobıznesi» forýmynyń bas dırektory Ekaterına Bordachıova.

Aıta ketsek, halyqaralyq «Reseı kınobıznesi» kıno naryǵy jáne forýmy Máskeý qalasynyń Kásipkerlik jáne ınnovasııalyq damý departamenti, sondaı-aq Máskeý qalasynyń Mádenıet departamenti qoldaýymen alǵash ret ótkizilip otyr. Jalpy kınonaryq sheńberinde 200-den astam kınojoba usynylyp, 10 fılmniń jabyq kórsetilimi ótedi.

Jeltoqsannyń 9-na deıin jalǵasatyn Máskeýdegi forýmǵa qatysyp jatqan «Qazaqfılm» kınostýdııasynyń, «Ulttyq kınony qoldaý memlekettik ortalyǵy» KEAQ ókilderi, táýelsiz prodıýserler men rejısserlerdiń qatysýy Koreıa Respýblıkasy Úkimetiniń qoldaýymen uıymdastyrylǵan «Ortalyq Azııadaǵy kınoındýstrııany nyǵaıtý» jobasy sheńberinde Almaty qalasyndaǵy Birikken Ulttar Uıymynyń Bilim, ǵylym jáne mádenıet máseleleri jónindegi Klasterlik Bıýrosynyń (IýNESKO) qoldaýynyń arqasynda múmkin bolyp otyr.