Mindetter saralanyp, meje belgilendi

Almatyda qalalyq densaýlyq saqtaý basqarmasynyń 2013 jylǵy qorytyndysy boıynsha keńeıtilgen alqa májilisi ótti. Shahar basshysy Ahmetjan Esimov, qalalyq máslıhattyń hatshysy Tóleýbek Muqashev, Densaýlyq saqtaý vıse-mınıstri Erik Baıjúnisov, sondaı-aq, aýdan ákimderi, respýblıkalyq ǵylymı ortalyqtardyń, jekemenshik emdeý mekemeleriniń, emhana men aýrýhanalar basshylary men otandyq medısınanyń maıtalman ardagerleri qatysty. Jıynda ótken jyly qaladaǵy densaýlyq saqtaý salasyndaǵy jumystar, qol jetkizgen jetistikter men kemshilikter talqylanyp, aldaǵy 2014 jyly atqarylar mejeli mindetter aıqyndaldy. Ádettegideı, alqa májilisinde qa­lalyq Densaýlyq saqtaý bas­qarmasynyń basshysy Janat Qasymjanova baıandama jasady. – Byltyr almatylyqtarǵa 83 qalalyq, 15 respýblıkalyq ǵy­lymı-zertteý ınstıtýt pen or­talyq, 4 vedomstvolyq jáne 14 jekemenshik emdeý mekemesi me­dısınalyq qyzmet kórsetti, – dedi Janat Kákimseıitqyzy. – Kadrlyq áleýet te jetkilikti daıyndaldy. Osy rette árbir úshinshi dáriger men árbir ekinshi medbıke bilimin qaıta jetildirdi. Úsh jylda densaýlyq saqtaý mekemeleriniń júıesi jańardy. Máselen, sa­lynǵan 12 emdeý mekemesiniń 5-ýi stasıonarlyq, 7-ýi alǵashqy medıko-sanıtarlyq kómek nysandary. Sonymen qatar, úsh jylda densaýlyq saqtaý bıýd­jeti 33 paıyzǵa, al 2013 jyly 14 paıyzǵa artty. Baıandamashynyń aıtýynsha, qan tamyrlary júıesi 32 pa­ıyzǵa, ıaǵnı 100 myń adamǵa shaqqanda 231,3-ke, al ınfarkttan ólim kórsetkishi 12,7-den 10,4-ke tómendegen. Týberkýlezben aýyratyndar sany 12-ge, al ólim-jitimi 38 paıyzǵa azaıǵan. Sóıtip, respýb­lıkada joǵary kórsetkishke qol jetkizgen. Transplantasııa salasynda №7 qalalyq klınıkalyq aýrýhana elimiz boıynsha al­dyńǵy qatarda. 16 jeltoqsanda qalamyzda tuńǵysh ret baýyr almastyrý otasy, sondaı-aq, №4, №5, JShMK, ortalyq klınıkalyq aýrýhanalarda da biregeı otalardyń jasalýy – otandyq medısınanyń ilgerileýine qosylǵan úles deýge bolady. Mine, osyndaı júıeli atqarylǵan jumys nátıjesinde shahar urpaqtyń ómirge kelý boıynsha 2011 jylmen salystyrǵanda – 4, turǵyndardyń tabıǵı ósimi 11 paıyzǵa ósse, jalpy ólim-jitim 11 paıyzǵa, sábı ólimi 9,6-ǵa tó­mendegen. Almatylyqtardyń ómir súrý jasy 77,66-ǵa jetip, úsh jylda eki jas qosylǵan. Alqaly jıynda Densaýlyq saqtaý vıse-mınıstri Erik Baı­­júnisov aldymen Elbasy Jol­da­ý­ynda áleýmettik salaǵa, onyń ishinde medısınaǵa erekshe kó­ńil bólip, aldymyzǵa úlken min­detter qoıyp otyrǵanyn, osy jóninde mınıstrlik qandaı jos­parlar mejelep, sharalar atqa­ryp jatqandyǵy jaıly ke­ńinen baıandap ótti. Almatynyń densaýlyq saq­taý salasy ózge óńirlermen salys­tyrǵanda, alda ekendigine ekpin túsirgen vıse-mınıstr, ásirese, transplantologııada búginge deıin elimizde 177 aǵza almastyrylsa, osydan bes jyl buryn birdi-ekili oqıǵa ǵana bolǵanyn, bul rette Ulttyq hırýrgııa ortalyǵy kósh bastasa, Almatydaǵy professor Bolat Baımahanov basqarǵan №7 qalalyq klınıkalyq aýrýhananyń belsendiligi qýantyp otyrǵanyn alǵa tartty. – Megapolıste jetekshi beıindi  ınstıtýttar shoǵyrlanǵan, munda eń ozyq ǵylymı-zert­hanalyq ádister qoldanylýda. Byltyr sala 528 mamanmen to­lyqty. Dese de, alyp shaharda áli de medısına qyzmetkerleri jetispeıdi. Almaty qalasynda eki joǵary oqý orny bola tura maman tapshylyǵyn qalaı túsinýge bolady? Bilýimshe, jumys jár­meńkesi kezinde bir de bir ret osy salanyń mamandarynyń otyr­ǵanyn kórmedim. Sondyqtan al­daǵy ýaqytta qansha stýdent bar, onyń qanshasy Almaty qalasynda jumys istegisi keledi, barlyǵyn eseptep maman máselesin sheshý kerek, – dedi E.Baıjúnisov. Jıyndy qorytqan qala ákimi A.Esimov 2013 jyly kóptegen parametrler boıynsha megapolıstiń densaýlyq saqtaý salasy orta res­pýblıkalyq kórsetkishten asyp túskenin alǵa tartty. Ákim son­daı-aq, «Biryńǵaı ulttyq júıe ne­gizinde almatylyqtar kepildi me­dısınalyq kómekti tolyq aýqym­da alýy tıis», dep qadap aıtyp, Densaýlyq saqtaý mınıstrligi ózge óńirlerden kelýshiler sanynyń artýyna baılanysty almatylyq emhanalardy materıaldyq ja­ǵynan jaraqtandyrýdy ulǵaıtý qajet­tigin atady. «Memleket basshysynyń tapsyrmasy boıynsha ústimizdegi jyldyń 1 sáýirinen bastap den­saýlyq saqtaý salasy qyzmet­kerleriniń jalaqysyna 10 paıyz qosymsha tólenedi. Keler jy­ly sala qyzmetkerleriniń áleý­mettik paketi qaıta qaralyp, 2015 jyldyń 1 shildesinen jalaqy 28 paıyzǵa deıin ósedi», dedi Ahmetjan Esimov. Gúlzeınep SÁDIRQYZY, «Egemen Qazaqstan». ALMATY.