Búginde Hromtaý aýdanynyń Qopa jáne Tamdy aýyldarynda iri qaradan aýrýdyń tirkelgeni týraly aqparat tekserilip jatyr.
«Janýarlardan aýyz qýysynan silekeı aǵý men aqsaý sııaqty klınıkalyq belgiler baıqalǵan. Mal ıeleri veterınarlyq dárigerlerdi kútpeı, dúrbeleń týdyrǵan. Basqa adamdardyń keńesine qulaq asyp, ózderi dıagnoz qoıyp, vırýsqa qarsy preparattardy satyp alyp, malyn emdegen. Búgin Nur-Sultan qalasyndaǵy Veterınarııa boıynsha ulttyq referenttik ortalyǵyna qan men silekeı synamalaryn jiberý úshin oblystyq Veterınarııa basqarmasynyń jáne veterınarııalyq stansııanyń mamandary aýylǵa bardy. Sondaı-aq veterınarııalyq zerthananyń nátıjeleri shyqqanǵa deıin halyq arasynda túsindirý jumystary júrgizilip, janýarlarǵa aýyz qýysyn óńdeýdi qalaı júrgizý keregi kórsetiledi», dedi oblystyq Veterınarııa basqarmasynyń basshysy Qusaıyn Sársembaı.
Onyń aıtýynsha, Hromtaýdaǵy mal aýrýy Alǵa aýdanyndaǵy oqıǵaǵa uqsas. Buǵan deıin olarǵa ınfeksııalyq rınotraheıt dıagnozy qoıylǵan bolatyn.
