Kásip bastap ózin de, ózgeni de jumyspen qamtımyn degen jandarǵa atalǵan Korporasııa jeńil paıyzben nesıe berip, jumysynyń jolǵa túsýine qolǵabys etip keledi. Naqtyraq aıtsaq, mıkroqarjylandyrý uıymdary birneshe salalarda bıznesti damytýǵa kómektesedi. Jeńildetilgen nesıe isin jańa bastaǵan kásipkerlerge, shaǵyn bıznes ókilderine, onyń ishinde otbasylyq jáne áleýmettik kásipkerlikti damytyp júrgen tulǵalarǵa óz bıznes-jobalaryn júzege asyrýǵa kómektesedi. Mysaly, kyzmet kórsetý salasynyń ókilderi de jyldyq 6% mólsherlememen jeńildetilgen nesıe ala alady. «Atameken» UKP jáne jergilikti atqarýshy organdardyń qatysýymen Korporasııanyń seriktesi retinde 15 mıkroqarjy uıymy qurylǵan, olar Qazaqstannyń barlyq óńirinde óz jumystaryn júrgizýde.
«Agrarlyq nesıe korporasııasy» AQ marketıng jáne PR qyzmetiniń basshysy Rýslan Eskendirdiń aıtýynsha, óńirlerdegi bıznesti qoldaý úshin Agrarlyq nesıe korporasııasy tarapynan 22,5 mlrd teńge mólsherinde mıkroqarjy uıymdaryn qorlandyrýǵa arnalǵan kredıttik jeliler ashylǵan.
– Osy baǵdarlamany iske asyrýda «Agrarlyq nesıe korporasııasy» kásipkerlik sýbektileriniń keń aýqymyn qoljetimdi qarjylandyrýǵa járdemdesedi. О́z kezeginde bul aýyldyq jerlerde azamattardyń ál-aýqatynyń deńgeıin arttyrýǵa áser etedi: jumys oryndary paıda bolady, jańa óndirister ashylady, qyzmet kórsetý salasy damıdy, deıdi R.Eskendir.
Mıkronesıe alǵysy keletin azamattar aldymen «Bastaý Bıznes» jobasynyń nemese basqa da memlekettik baǵdarlamalar sheńberindegi kásipkerlik negizderin oqytý kýrstarynda bilim alýy tıis, sondaı-aq kepil múlki bolýy qajet. Mal sharýashylyǵy salasyndaǵy jobalar boıynsha nesıe 7 jylǵa deıingi merzimge berilse, basqa salalarda 5 jylǵa deıin nesıe alý múmkindigi bar. Bıznes-jospardy sátti qorǵaǵan qatysýshy MQU-da nesıe resimdeı alady.
Mıkronesıeniń eń joǵary somasy ákimshilik baǵynystylyǵyna qaramastan, aýyldyq eldi mekenderde jáne shaǵyn qalalarda – 2,5 myń AEK-ke deıin, ıaǵnı 7,2 mln teńge bolsa, Shymkent, Aqtaý, Atyraýdan basqa qalalarda, monoqalalarda – 6,5 myń AEK-ke deıin nemese 18,9 mln teńge kóleminde. Al Shymkent, Aqtaý, Atyraý qalalarynda – 8 myń AEK-ke deıin, ıaǵnı 23,3 mln teńgege teń.
Qazirgi tańda óńirlerdegi bıznesti mıkronesıeleýge agrarlyq nesıe korporasııasy 22,5 mlrd teńge bólgen. Mańǵystaý oblysyna bólingen 1 mlrd teńge qarjynyń alǵashqy jylyna qaralǵan 500 mln teńgeniń búginde teń jartysynan astamy, ıaǵnı 283 mln teńgesi ıgerilgen. Atalǵan Korporasııanyń Mańǵystaý óńirindegi jumys barysymen tanysý arnaıy týr uıymdastyrý arqyly júzege asyryldy. Týr barysynda BAQ ókilderi «Jumyspen qamtý jol kartasy» baǵdarlamasy aıasynda shaǵyn bızneske mıkronesıe berý rásimderimen tanysyp, Agrarlyq nesıe korporasııasynyń qorlandyrý quraldary arqyly MQU-nan mıkronesıe alǵan birqatar kásiporynǵa bardy. Kásibin bastaýǵa jasalǵan múmkindikti mańǵystaýlyq kásipkerler ár salada kıim-keshek jáne azyq-túlik dúkenderin ashý, avtoservıster men hımııalyq tazalaý qyzmeti, mal sharýashylyǵy salasynda paıdalanýda.
Aqtaý qalasynyń 19 shaǵyn aýdanynan ashylǵan Hi MOM balalar kıim dúkeniniń ıesi Janbópe Quraqbaeva – «Bastaý Bıznes» jobasy aıasynda bilim alyp, «Agrarlyq nesıe korporasııasynyń» jeńildetilgen qarjysyna qol jetkizgen kásipker.
– «Bastaý Bızneste» oqyp, kóp nárse úırendim. Dúken ashsam degen nıetim bolǵanymen, jumysty odan ári qalaı alyp júrý kerektigin bilmeı daǵdarǵan men kýrsta bilim alyp, shaǵyn nesıe alý múmkindigine ıe bolý arqyly óz maqsatyma qol jetkizdim. Joldasym ekeýmiz úsh aı jeńildik merzimimen nesıege 6 mln teńge aldyq. Bul qarjy bizdiń jumysymyzdyń kólemin úlkeıtýge, taýar túrlerin arttyrýǵa úlken kómek boldy. Qazirgi tańda dúkende eki adam jumys isteıdi, taǵy úsh adamdy eńbekpen qamtýǵa nıettimiz. Kelýshiler az emes, kıimderimiz sapaly, – deıdi J.Quraqbaeva.
Kelesi kezekte saparymyz Munaıly aýdanynda jalǵasty. Bul aýdanda biz jeńildetilgen nesıe alyp, kólik jóndeý qyzmetin kórsetetin jáne azyq-túlik dúkenin ashqan kásipkerlermen júzdestik. Isin jolǵa qoıa alǵan olar jeńildetilgen nesıege rıza. Tek olardy bul múmkindikti turǵyndardyń jappaı túsine bermeıtindigi alańdatady eken.
Túpqaraǵan aýdany Saıyn aýylynyń turǵyny Q.Danshabaevtyń mal sharýashylyǵyn damytýyna atalǵan korporasııadan jeńildetilgen nesıe alýynyń áseri kóp bolǵan.
– Onyń tıimdiligi aldymen – jeńildetilgen nesıede, ekinshisi – tólem ýaqytyna beriletin demalysta. Men 6 paıyzben 4 mln teńge alyp, Oraldan alty bas sıyr, bes tonna kebek satyp aldym. Sıyrlar buzaýlaıtyn kún de alys emes. О́zim burynnan túıe, qoı men eshki, jylqy ustaımyn. Endi olardyń sany sıyrlarmen tolyqty, deıdi kásipker Qýanysh Danshabaev. Tek bular emes Mańǵystaý oblysynda Túpqaraǵan aýdany Saıyn aýylyndaǵy «Esen Seıit» sharýa qojalyǵy mıkroqarjy uıymdarynan 8 bas túıe satyp alýǵa jáne ony ósirýge shaǵyn nesıe alsa, Qaraqııa aýdany Munaıshy aýylyndaǵy «Alpamys» jeke kásipkerligi 6 asyl tuqymdy sımmental sıyr satyp alyp ósirýge nesıe alǵan.
– Bul baǵdarlamanyń maqsaty – turǵyndardyń ózin ózi jumyspen qamtýyna múmkindik berý arqyly jumyssyzdyqty eńserý, halyqqa qoldaý kórsetý. Baǵdarlama jumyssyz adamdarǵa barynsha tıimdi, olarǵa jeńildik kezeńi de qarastyrylǵan. Mysaly, nesıege alynǵan mal jeńildik kezeńinde tóldep, kóbeıedi, keıin ony bordaqylap satý arqyly qarajat tabýǵa bolady. Kepilge qaladaǵy, aýyldaǵy nysandardy, tehnıkalardy, respýblıkamyzdyń ózge óńirlerindegi múlikterdi qoıýǵa bolady. Baǵdarlamanyń baǵyty tek aýyl sharýashylyǵymen shektelip qalmaıdy, tehnıka alý, naýbaıhana, dúken, shashtaraz, tigin sehyn ashý jobalaryn jáne t.b qarjylandyra alamyz. Qazirgi tańda biz Mańǵystaý oblysy boıynsha 283 mln teńgege 60-tan astam jobany qarjylandyrdyq, aldaǵy josparda 150-200 jobany nesıelendirýdi mejelep otyrmyz. Qarajat bar, kelem deýshilerge esik ashyq. Baǵdarlama bıyl alǵashqy jyl júzege asýda, keler jyly suranys bolsa jalǵasyn tabady dep oılaımyz, – deıdi «Agrarlyq nesıe korporasııasynyń» Mańǵystaý oblysy boıynsha fılıal dırektory Áset Baıbosynov.
Turǵyndardyń múmkindikti molynan paıdalanyp, jeńildetilgen nesıemen kásibin jolǵa qoıýy – eldiń áleýmettik- ekonomıkalyq jaǵdaıyna qoldaý bolyp tabylmaq.
Mańǵystaý oblysy
