Negizi qalanǵannan bergi 8 jyl aralyǵynda EdCrunch Glocal alańynda kásibı mamandar, bıznes salasynyń ókilderi bilim salasyndaǵy trendter boıynsha tájirıbe almasyp keledi. Is-sharaǵa Máskeý, Tel-Avıv jáne Sıngapýrdaǵy jergilikti stýdııalardyń spıkerleri arnaıy ınteraktıvti edcrunch.online alańy arqyly qosylyp, bilim keńistigindegi jańalyqtardy talqylady.
Konferensııada Bilim jáne ǵylym mınıstri Ashat Aımaǵambetov zamanaýı tehnologııalardyń áleýmettik ınstıtýttarǵa yqpaly týraly aıtyp ótti. Sarapshylardyń pikirinshe, Edtech naryǵy qazirgi kezde 227 mlrd dollardy qurasa, taıaý keleshekte bul kórsetkish birneshe ese ósedi.
«Bizdiń qazaqstandyq segment keıingi jyly qarqyndy ósip keledi. Sońǵy 2 jylda kóp nárseni qaıta qarastyrýǵa týra keldi. Bilim berý platformalary, Zoom, Teams onlaın-sabaqtary árbir qazaqstandyq oqytýshynyń tájirıbesine jyldam enip ketti. Qazaq tilindegi kontent ulǵaıyp keledi. Jergilikti EdTech kompanııalary kontentti óz betinshe ázirlep, úzdik halyqaralyq aqparatty da naryqqa beıimdeı bastady. Sıfrly keńistiktegi qoldanys, meńgerý daǵdylarynyń tómendigine qaramastan, qıyn jaǵdaıda zamanaýı múmkindikterdi tez meńgere aldyq. Eń bastysy, pandemııaǵa deıingi kezeńge keri jol joq. Bilim salasy damı otyryp, jahandyq trendterdi tez meńgere alady», dep atap ótti mınıstr.
«Balalardyń erte damýy», «XXI ǵasyr mektebi jáne daǵdylary», «Sıfrly ýnıversıtet, korporatıvtik oqytý», «EdCrunch Stage, EdTech naryq jáne ınvestısııalar», EdCrunch Night – edutainment event (bilim berý shoýy) sııaqty taqyryptardy arqaý etken konferensııada Almaty qalasynyń ákimi Baqytjan Saǵyntaev qalanyń bilim júıesindegi tehnologııalyq múmkindikterge toqtaldy. Búginde Almatyda myńnan astam bilim berý mekemesi jumys isteıdi. Osy oraıda mektepterdi zamanaýı qondyrǵylarmen qamtamasyz ete otyryp, sıfrly servısterdi damytý, muǵalimderge jaǵdaı jasaý talantty balalardy qoldaý jalǵasyn taba beredi.
«Jańa bilim berý tájirıbesin jobalaý» taqyrybyn talqylaýǵa álemniń kóptegen elinen jınalǵan 400-den asa spıker 100-den astam pikirtalas alańynda kezdesip, pedagogıkalyq dızaın salasyndaǵy ozyq tájirıbeler, bilim berý salasyna jańa tehnologııalardyń áseri, ǵylymı jetistikter taqyrybyn qamtydy.
Onlaın jáne oflaın formattaǵy konferensııaǵa Skolkovo basqarý mektebiniń praktıka professory P.Lýksha, Fincraft Group holdınginiń prezıdenti K.Raqyshev, rejısser-ssenarıst, Bazelevs kınokompanııasynyń negizin qalaýshy T.Bekmambetov, Tan Media Group ıesi A.Baıtasov, «Sábı» qaıyrymdylyq qorynyń prezıdenti Á.Tasmaǵambetova, «Iаndeks» bilim berý jobalarynyń prodıýseri A.Chýkovskaıa, Lancaster Group dırektorlar keńesiniń aksıoneri jáne tóraǵasy B.Kanıev, Altyn Qyran Foundation Qoǵamdyq qorynyń qamqorshylyq keńesiniń tóraǵasy I.Saljanov, Aitas KZ holdınginiń basshysy S.Tolyqpaev jáne basqa da bıznes ókilderi men bilim sarapshylary qatysyp, álemdik bilim keńistigindegi jańa tehnologııalardyń jetistigi týraly pikirlerimen bólisti.
ALMATY
