«Azamattyq qorǵanys organdarynyń qyzmetkerleri men qutqarýshylardy áleýmettik qamsyzdandyrý sharttaryn jaqsartý týraly saýaldaryńyz boıynsha mynany habarlaımyn. Qazir azamattyq qorǵanys organdarynda áskerı shen beriletin áskerı qyzmetker mártebesi qyzmettik mindeti azamattyq qorǵanys júeısin damytýmen baılanysty laýazymdar sanatyna ǵana beriledi», dep jazdy Asqar Mamın depýtattyq saýalǵa bergen jaýabynda.
«Azamattyq qorǵanys organdarynyń qutqarýshylaryna qyzmet synyby, árdaıym tótenshe jaǵdaıǵa shyǵýǵa daıyn júretini, radıostansııalarmen jumys istegeni, tym joǵary nemese tym tómen temperatýralarda jumys istegeni, qaza tapqandardyń denelerimen nemese máıit bólshekterimen jıi bet-bet keletin psıhıkalyq-emosıonaldy júktemesi úshin qosymsha aqylar men ústemeaqylar kózdelgen. Tótenshe jaǵdaılar mınıstrligi (TJM) múddeli memlekettik organdarmen birlesip, Azamattyq qorǵanys organdarynyń qyzmetkerleri men qutqarýshylaryn áleýmettik qamsyzdardyrý sharttaryn jaqsartý boıynsha júıeli jumys júrgizýde» delingen Premer-Mınıstrdiń jaýabynda.
Úkimet basshysynyń depýttarǵa bergen málimeti boıynsha, atalǵan áleýmettik qorǵaý sharalaryn jetildiretin norma jobasy Májilistiń qaraýynda jatyr. Ol qujat boıynsha endi qutqarýshylar ózderi turyp jatqan qyzmettik baspanany jeke menshikke tirkeý tetikteri qarastyrylǵan.
«Úkimettiń 2021 jylǵy 22 shildedegi №505 qaýlysymen Parlament Májilisine engizilgen «Qazaqstan Respýblıkasynyń keıbir zańnamalyq aktilerine quqyq qorǵaý qyzmetin ótkerý tártibin jetildirý máseleleri boıynsha ózgerister men tolyqtyrýlar engizý týraly» zań jobasynda quqyq qorǵaý organdary, onyń ishinde azamattyq qorǵanys organdary qyzmetkerleriniń áleýmettik kepildikteri men jeńildikterin jaqsartýǵa baǵyttalǵan túzetýler kózdelgen. Bul – ózderi turyp jatqan turǵyn úılerdi menshikke alý, qyzmetkerlerdiń balalaryna mektepke deıingi balalar mekemelerinde kezekten tys oryn berý, qyzmetker aýrýy saldarynan qaıtys bolǵan jaǵdaıda ótemaqy tóleý máseleleri», dep jazdy Asqar Mamın.
