Atalǵan dop dodasy Qazaqstannyń eńbek sińirgen qaıratkeri Nesip Júnisbaıulynyń bastamasymen buǵan deıin qanatyn keń jaıyp, dástúrli túrde ótkizilip turǵan-dy. О́kinishke qaraı, sońǵy eki-úsh jylda uıymdastyrylmaı, umytyla bastaǵan edi. Alaıda ardager sport jýrnalısiniń bastamasymen týrnırdi qaıta qolǵa alyp, tynysyn ashty. Jambyl oblysy ákimdiginiń qoldaýymen joǵary deńgeıde uıymdastyrylǵan jarys Táýelsizdigimizdiń 30 jyldyǵyna arnaldy.
«Bir atanyń balalary fýtbol oınaıdy» týrnıri – balamasy joq otbasylyq jarys. Bul joly jergilikti otbasylardan bólek, Almaty, Túrkistan, Mańǵystaý, Qyzylorda oblystarynan 48 komanda qatysty. Kókeev, Máýlen ata, Eshenqul ata, Qylıshaev, Qaıypbergenov sııaqty birneshe otbasydan 300-den asa atasy men ákesi jáne balalary men nemereleri bar komandalar keldi. Bul – rekordttyq kórsetkish», dedi N.Júnisbaıuly.
Jýrnalıst-jazýshynyń aıtýynsha, elimizdiń fýtboly, egemendigimizge 30 jyl tolsa da, sol boıy kenje qalyp kele jatyr. ÝEFA-nyń quramyna kirgenimen, eýropalyq barlyq týrnırlerde qap-qap dop arqalap, jeńilisten kóz ashpaýdamyz. Osynyń barlyǵy halyqtyń namysyna tıetini sózsiz. Olaı bolatyn bolsa, qurama namysyn qorǵaıtyn fýtbolshylardy osy «Bir atanyń balalary fýtbol oınaıdy» atty týrnırden taýyp, tárbıeleımiz ǵoı degen úmitimiz de joq emes.
«Osy jarysty jyl saıyn Taraz qalasynda uıymdastyrsaq degen nıetimiz bar. Jalpy, otbasylyq týrnırimiz – jaı ǵana týrnır emes, ol – jastardyń tárbıesine orasan zor yqpal ete alatyn biregeı sport dodasy. Bul týrnır – tárbıe quraly. Otbasylyq týrnırde jeńimpaz ataný mańyzdy emes. Eń bastysy, salamatty ómir saltyna degen nıet kúsheıse deımiz. Olaı bolsa, siz ben bizdiń maqsatymyzdyń bir arnada toǵysqandyǵy, armanymyzdyń oryndalǵany. Irgeli iske qoldaý kórsetken Jambyl oblysynyń ákimi Berdibek Saparbaevqa, oblystyq sport basqarmasyna jáne barsha azamattar úshin alǵys aıtamyn», dedi ardager qalamger.
Al «Anaǵa taǵzym» ortalyǵynyń basshysy Elmıra Myrzaǵalı jeńimpaz komanda – Kókeevter otbasyna Jambyl Jabaevtyń sýreti beınelengen kilemdi syıǵa tartty: «Kıeli Taraz topyraǵynda eki kún boıy ótken fýtbol merekesinde jetisýlyq Kókeevter komandasy jeńis tuǵyryna shyqty. Atalǵan otbasyna qurmet kórsetip, Jambyl babamyzdyń sýreti beınelengen kilemdi syıǵa tarttym. Shirkin-aı, osy komandadaǵy sheber úsh oıynshynyń anasy Sáýle hanym syılyqqa qol sozbas buryn uly babasynyń sýretine qarap sálem salǵanda, ishim odan beter jylyp ketti. Jambyldyń 175 jyldyǵynda Áýlıeatada ótken jarystan tábárik bolsyn dep ala kelgen tartýymnyń Almaty oblysy Jambyl aýdanynyń týmalaryna, onyń ishinde Jambyl Kókeevteı fýtbolshynyń anasyna buıyrǵanyna razy boldym. Júzinen nur tógilgen ananyń nıeti uldaryn áli talaı shyńdarǵa shyǵaratynyna shúbásiz senemin», dedi E.Myrzaǵalı.
48 komanda 16 topqa bólinip, árbir toptan bir ǵana komanda 1/8 fınalǵa joldama aldy. Ári qaraı, olımpıadalyq júıemen jeńimpaz anyqtaldy. Fınalda osy týrnırdiń tyrnaqaldy dodasynda jeńimpaz atanǵan, odan keıin birneshe ret júldege ilikken Kókeevter (Almaty oblysy) otbasy jeńiske jetip, bas báıgeni ıelendi. Aqtyq synda olar Myrzabekovter (Túrkistan oblysy) áýletin 3:0 esebimen jeńip, osymen týrnırdiń alty dúrkin jeńimpazy atandy. Al úzdik úshtikten Imanqulovtardan (Almaty oblysy) 1:0 esebimen basym túsken Qylıshaevtar (Mańǵystaý oblysy) komandasy kórindi.
Birneshe atalymda úzdikter anyqtalyp, olardyń bárine syılyqtar tapsyryldy. Atap aıtqanda, otbasylyq teńbil dop týrnırinde «Eń jas oıynshy» – nebári segiz jastaǵy Jáńgir Kókeev, «Egde oıynshy» – «Qobylandy batyr» komandasynyń múshesi Ázimbek Tileshov, «Eń úzdik qaqpashy» – Súleı áýletinen Dúısenbaı Bólegenov, «Eń úzdik qorǵaýshy» – Imanqulovtar otbasynyń múshesi Dıas Ǵabıtuly, «Eń úzdik shabýylshy» mańǵystaýlyq Azamat Lespaev laıyq dep tanyldy. Sonymen qatar óz komandalastaryna, baýyrlaryna jankúıer bolyp kelgen balalar men analarǵa da syılyqtar berilip, týrnır joǵary deńgeıde ótti.
