Ata-analar oqýlary «О́zin ózi taný» rýhanı-adamgershilik bilim berý baǵdarlamasynyń avtory Sara Nazarbaevanyń beınedárisimen ashyldy. Sara Alpysqyzy quttyqtaý sózin aıtyp, ata-analardyń bala tárbıesinde alatyn ornynyń mańyzdylyǵyna toqtaldy.
«Árbir bala ózinshe shaǵyn ǵarysh, álem desedi. Ol bul dúnıege jaı ǵana emes, óziniń erekshe mindetimen keledi. Adam balasy degenimiz – Joǵary dúnıeden jer betine jiberilgen tirshilik ıesi. Barlyq balalardyń qaıtalanbas daryndy ekenine, barlyǵyn Jaratýshy talanttan kende etpegenine meılinshe senemin. Biz tek bala boıyndaǵy sol qasıetti taýyp, asha bilmeımiz, ony ashýǵa umtylmaımyz. Tek tolyqqandy tutas rýhanııatpen sýsyndaǵan tárbıe ǵana adamnyń tuıyq qalpyn jeke tulǵa deńgeıine kóterip shyǵarýǵa qabiletti», dedi S.Nazarbaeva.
Ata-analar oqýlarynda Halyqaralyq Gýmandy pedagogıka ortalyǵynyń prezıdenti, akademık, professor, psıhologııa ǵylymdarynyń doktory Shalva Amonashvılı osyndaı oqýlardyń ótkizilýi qazirgi tańdaǵy qajet máselelerdiń biri ekenin atap ótti.
«Basty maqsat – meıirimdi jáne qaıyrymdy adam tárbıeleý. Eger ata-anasy oǵan úlken mura qaldyrmasa, meıirimdi de qaıyrymdy adam joǵalyp kete me? Árıne, joq, óıtkeni onyń rýhanı qundylyqtary bar. Kez kelgen bala sulýlyq sezimimen týylady. Al ata-analar bul sezimdi qoldap, damytýy kerek. Bul neni bildiredi? Aınalany sóz sulýlyǵymen, úıdegi qolaıly atmosferamen, jyly otbasylyq meıirimmen toltyrý. Sóıleý – Jaratýshynyń bergen úlken syıy, sondyqtan bos áńgimege ýaqytyńyzdy ketirmeńiz. Danalyqty sózben jetkizińiz, súıýge, keshirýge, janashyrlyqqa, rýhanı damýǵa baýlyńyz, sonda bala jaqsy sóz arqyly ósedi» dep Shalva Amonashvılı qundy ustanymdarymen bólisti.
Sondaı-aq oqýlardy ótkizý barysynda orta bilim berý basshylary, ózin ózi taný muǵalimderi, ata-analar zamanaýı tárbıeniń mańyzdy taqyryptary men máseleleri, ata-analardyń róli jáne otbasynyń rýhanı qundylyqtary aıasynda oılarymen bólisip, baıandamalaryn kópshilikke usyndy. Kópshilik tarapynan osyndaı óte mańyzy bar ata-analar oqýlarynyń aldaǵy ýaqytta da ótýin qalaıtyndyqtaryn bildirdi.
Oqýlar ZOOM platformasynda onlaın rejimde ótti, Fasebook-tegi «О́zin ózi taný. Bóbek» paraqshasynda oqýlardyń tikeleı translıasııasy boldy. ZOOM platformasynda jáne tikeleı efırde shamamen 2000 adam qatysty.
Elena LOSEVA,
«Bóbek» ortalyǵy bas dırektorynyń orynbasary
