«Alash» ádebı syılyǵy men Valentın Pıkýl atyndaǵy jáne Oralhan Bókeı atyndaǵy syılyqtardyń laýreaty, jazýshy-dramatýrg Talaptan Ahmetjannyń 60 jasqa tolýy premeramen tuspa-tus kelip otyr.
T. Ahmetjanovtyń bul shyǵarmasy osyǵan deıin birneshe sahnada qoıyldy. Sezim syryn jyr etken qoıylym Túrkistan mýzykalyq drama teatrynda zamanaýı kelbetke ıe bolady. Qoıylymnyń rejısseri – Qazaqstannyń eńbek sińirgen qaıratkeri Nurqanat Jaqypbaı. Ol osymen úshinshi ret teatr sahnasynda «Sulý men sýretshini» sahnalaıdy. Úsheýi úsh túrli qoıylýymen erekshelenedi.
Kórkemdik jetekshisi – Aınur Kópbasarova. Qoıýshy sýretshisi – Qabyl Halyqov. Spektaklge arnaıy mýzyka jazǵan Túrkistan mýzykalyq drama teatry mýzykalyq bóliminiń meńgerýshisi, bas kompozıtory Hamıt Shanǵalıev. Baletmeıster – Madına Muratpekova. Bul spektakldiń basty jańalyǵy premerada álemge áıgili Amatı (Antonius Hieronymus Amati) tarıhı aspabymen Shveısarııanyń Sıýrıh qalasynda turatyn talantty mýzykant Eldar Saparaevtyń kelýi.
1628 jyly jasalǵan 400 jyldyq tarıhy bar vıolonchel aspabymen qoıylymnyń mýzykasy sahnada oınalady. 300 jyl Eýropanyń koroldik otbasylarynyń jeke kolleksııasynda saqtalǵan Amati tarıhı aspaby qazir murajaıǵa qoıylǵan. Álemde mundaı aspap, bar bolǵany úsheý-aq. Túrkistannyń tórinde oınalatyn Amatı (Antonius Hieronymus Amati) tarıhı vıoloncheli álemniń mádenı murasy. Álem moıyndaǵan mýzykant Eldar Saparaev Amatı aspabymen «Mahabbat munarasyna» jan bitiredi.
Basty rólderdi Aqbota Rahat pen Juldyz Abdıkarımova jáne Ádil Ahmetov, Nurqanat Jaqypbaev, Túrkistan teatrynyń akterleri oınaıdy.
