Aımaqtar • 16 Jeltoqsan, 2021

BQO Aqsýat aýylynda uıaly baılanys júıesi iske qosyldy

138 ret kórsetildi

Táýelsizdik kúni merekesi aıasynda Batys Qazaqstan oblysy Terekti aýdanyndaǵy Aqsýat aýylynda uıaly baılanys júıesi iske qosylyp, aýyl turǵyndary úlken qýanyshqa bólendi, dep jazady Egemen.kz.

Adam jaqsylyqqa tez úırenedi ǵoı. Uıaly baılanys júıesi qazir kúndelikti eń qajet suranystyń birine aınaldy. Ásirese pandemııa kezinde kóp sharýany qashyqtan bitirýge ábden úırenip aldyq. Osyndaı kezde turǵylyqty jerińde uıaly baılanys nashar bolsa, ınternet shaban bolsa – júıkeni júndeı tútetin másele osy. Oblys ortalyǵy Oral qalasynyń irgesindegi Aqsýat aýyly – «sham jaryǵy túbine túspeı turǵan» osyndaı sormańdaı aýyldyń biri edi.E

Bıyl jazda aýyl ákimderiniń saılaýy boldy ǵoı. Sol kezde Aqsýat aýyly ákimi laýazymyna eki úmitker talasty. Saılaý aldy nasıhat kezinde eki úmitker de halyqpen kezdesip, baǵdarlamalaryn tanystyryp jatty. Sol kezde aqsýattyqtardyń aldymen aıtqan suraýy – uıaly baılanys bolatyn.

Endi she? Oral qalasynan nebári 25 shaqyrym jerde ornalasqan Aqsýat aýyldyq okrýginde 3 myńǵa jýyq halyq turady. Munda 628 oqýshylyq eki orta mektep, 100-ge jýyq búldirshin oqıtyn eki bastaýysh mektep bar. Mektep ǵımaraty kúrdeli jóndeýden ótken. Tabysty kásipkerler, belgili maı zaýyty da osynda. Aýyldyq okrýgte aýyz sý qubyry, aýasyz elektr jelisi, gazdandyrý jáne jol qurylysy máseleleri sheshilgen. Kúre joldyń boıynsha, Jaıyqtyń jaǵasynda turǵan ásem aýyldyń bir «kemdigi» - dál osy baılanys bolatyn. Jáı sóıleskenniń ózinde aýadan «set aýlap» ketetin aqsýattyqtar úshin ınternet ıgiligi arman ǵana edi.

Aqsýat aýylyn osy armanǵa jańa ákimi Jannur Ahmetov jetkizdi.

- Bıyl elimizde alǵash ret aýyl ákimderiniń tikeleı saılaýy ótti ǵoı. Saılaý nátıjesi boıynsha shilde aıynda Aqsýat aýyldyq okrýginiń ákimi bolyp saılandym. Halyqpen kezdesý barysynda turǵyndar baılanys máselesin birneshe márte kóterdi. Jumysqa kirisken kezimde ózim de munyń qandaı kedergi ekenin túsindim. Sóıtip, birden baılanysty kúsheıtý úshin qajetti munara ornatý, qajetti qujattamany resimdeý boıynsha iske kiristim. Árıne, bul jumys halyqtyń tikeleı qoldaýymen jáne jeke kásipkerlerdiń kómegimen júzege asty. Táýelsizdik merekesi qarsańynda saılaýaldy baǵdarlamamnyń bir bóligin oryndalyp, halyqtyń amanaty oryndalǵanyna qýanyshtymyn, - deıdi aýyl ákimi Jannur Ahmetov.E

Shyny kerek, bıýdjeti shaǵyn, qysqa jipteı kúrmeýge kelmeıtin aýyl úshin bıiktigi 24 metrlik munara turǵyzý ońaı bolǵan joq. Áldebir mekemeniń qoldanylmaı jatqan munarasyn taýyp, kelisip, ony jergilikti kásipkerlerdiń kómegimen aýylǵa jetkizip kóterý úshin jańa ákim zyr júgirip, biraz ter tógipti. Buǵan deıin Tasqala kentiniń ákimi, Terekti aýdandyq ishki saıasat bóliminiń basshysy bolǵan tájirıbeli azamat úlken-kishimen tez til tabysyp, bul sharýany aýyl turǵyndarynyń, mesenattardyń kúshimen atqaryp shyqty. Sóıtip bes jyldan beri aqsaýttyqtar armandaǵan sapaly baılanys, júırik ınternet qoljetimdi boldy. Qazirdiń ózinde halyq «Jannurdyń munarasy» dep atap ketken qondyrǵydan «Beeline» baılanys jelisiniń sapaly mobıldi ınterneti tarap jatyr.

- Damyǵan zamanda baılanyssyz otyrý óte qıyn. Karantındik shekteýlerge baılanysty kóp qyzmet onlaın rejımge aýysty. Sabaq, jumys sekildi dúnıeler uıaly telefonǵa baılandy. Sol kezeńde qatty qınaldyq. «Sapaly baılanys júıesin qosý kerek» dep aýyl turǵyndarynan qol jınadym. Tórt júzden astam adammen kezdesip, qoldaý taptym. Qudaıǵa shúkir, tilegimiz oryndaldy. Endi aýylǵa jańa lep, jańa júıe keldi. Qýanyshtymyn, - deıdi aýyl turǵyny Álibek Aıtqalıev.

Joǵaryda aıtqandaı, «tasbaqa-baılanystyń» taqsiretin eń kóp tartqan muǵalim qaýymy bolatyn. Sondyqtan búgingi jańalyqqa júregi jaryla qýanǵandar da ustazdar boldy. 

- Bizdiń mektep jumysynyń kóp bóligi búginde jelige baılanysty. Keshegi qatań karantın tusynda aýyldaǵy stýdentterimiz kezekti oqý sessııalaryn tapsyra almaı qınaldy. Sondyqtan búgin bizde keremet kún! Osy munara ornatylyp, bárimiz qýanyp jatyrmyz. Telefon 4G ustap tur! Qaladan 25 shaqyrym jerdegi Aqsýat aýylynyń halqyn tolǵandyrǵan máseleler osylaısha ret-retimen sheshimin taýyp jatyr. Bul mereke aldyndaǵy keremet tartý boldy, - deıdi Gúlmıra Baqbasova.

Jańa munaranyń iske qosylǵanyn aýyl bolyp atap ótken aqsýattyqtardyń jıyny toıǵa ulasty. Saltanatty jıynda aýyl ákimi Jannur Bekbaýuly aýyldyń damýyna belsendi qolǵabys etip júrgen birqatar aýyl azamatyn marapattady. Olardyń qatarynda «Kárim» dúkeniniń ıesi R.Álibekuly, aýyl azamattary R.Aqmyrzaev pen Á. Aıtqalıevter de bar.

 

Sońǵy jańalyqtar

Shabyt shaqyratyn shahar

Elorda • Keshe

Aqjaınaq astana

Elorda • Keshe

Ozyq óndiris ornynda boldy

Aımaqtar • Keshe

Dımash pen Djekson

О́ner • Keshe

Uqsas jańalyqtar