Reseı Prezıdenti Vladımır Pýtın óziniń jedelhatynda Memleket basshysyn Táýelsizdik kúnimen shyn júrekten quttyqtap, Qazaqstannyń ekonomıkalyq, áleýmettik, ǵylymı-tehnıkalyq jáne basqa da kóptegen saladaǵy qol jetkizgen tabystaryn atap ótken. Reseı Prezıdenti elimizdiń álemdik arenadaǵy joǵary bedeline erekshe toqtalǵan.
«Memleketterimiz arasyndaǵy qarym-qatynastar strategııalyq seriktestik pen odaqtastyq negizde qarqyndy damyp keledi. Túrli saladaǵy ekijaqty yntymaqtastyq, sondaı-aq EAEO, UQShU, TMD, ShYU, BUU sııaqty halyqaralyq qurylymdar aıasyndaǵy ózara is-qımyldarymyz óz nátıjesin berýde. Birlesken kúsh-jiger arqyly biz dostas halyqtarymyzdyń ıgiligi jolynda, sondaı-aq Eýrazııa qurlyǵyndaǵy turaqtylyq pen qaýipsizdikti qamtamasyz etý úshin Reseı men Qazaqstan arasyndaǵy baılanystardy dáıekti túrde damytatynymyzǵa senimdimin», delingen Vladımır Pýtınniń jedelhatynda.
QHR Tóraǵasy Sı Szınpın óziniń quttyqtaýynda Táýelsizdiktiń 30 jyly ishinde Qazaqstan memlekettiń múlde jańa kelbetin qalyptastyrǵanyn, álemdegi ozyq damyǵan 30 eldiń qataryna kirý úshin nyq qadam basyp kele jatqanyn jazǵan.
«Men Qytaı-Qazaqstan qarym-qatynastarynyń damýyna erekshe mán beremin. Sizben birge Qytaı men Qazaqstan arasyndaǵy dástúrli dostyqty nyǵaıtýǵa, eki eldiń strategııalaryn ushtastyrýǵa, máńgi jan-jaqty strategııalyq áriptestik qatynastardy eki memlekettiń jáne olardyń halyqtarynyń ıgiligi úshin jańa deńgeıge kóterýge daıynmyn», delingen jedelhatta.
AQSh Prezıdenti Djozef Baıden Qasym-Jomart Toqaevty jáne Qazaqstan halqyn Táýelsizdiktiń 30 jyldyǵymen quttyqtap, Qazaqstannyń Ortalyq Azııada jáne jahandyq deńgeıde beıbitshilik pen turaqtylyqty saqtaý jáne ony órkendetý jolyndaǵy otyz jyldyq kóshbasshylyǵyn atap ótý merekesine tilektestik bildirdi.
«Qurama Shtattary Qazaqstanmen aradaǵy strategııalyq seriktestikti nyǵaıtýǵa, aımaqtyq turaqtylyqqa úles qosý maqsatymen yntymaqtastyqty damytýǵa, klımattyq daǵdarysty eńserýge, demokratııalyq ınstıtýttardyń tıimdiligin arttyrýǵa jáne adam quqyqtaryn qurmetteýge baǵyttalǵan yqpaldastyqty ilgeriletýge nıetti», delingen Amerıka basshysynyń jedelhatynda.
О́zbekstan Prezıdenti Shavkat Mırzııoev Qazaqstanda júrgizilip jatqan júıeli ári aýqymdy reformalardy, sondaı-aq Qasym-Jomart Toqaev usynǵan aımaqtyq jáne jahandyq mańyzy bar bastamalardy joǵary baǵalady.
«Osynaý zor jetistikterge Memleket basshysy retinde Sizdiń tıimdi qyzmetińiz ben baı tájirıbeńizge súıene otyryp júrgizgen salıqaly saıasatyńyz negiz boldy. Qurmetti Qasym-Jomart Kemeluly, Táýelsizdiktiń 30 jyldyǵyn saltanatty túrde atap ótip jatqan Qazaqstan halqynyń qýanyshyna búkil О́zbekstan halqy shynaıy túrde ortaqtasatynyn aıtqym keledi», delingen jedelhatta.
Qyrǵyzstan Prezıdenti Sadyr Japarov elimizdiń Táýelsizdik jyldarynda saıası, ekonomıkalyq jáne áleýmettik salalardaǵy, sondaı-aq syrtqy saıasattaǵy qol jetkizgen keremet jetistikteri men aýqymdy reformalarynyń arqasynda álemdik qoǵamdastyqta salmaqty orynǵa ıe bolǵanyn atap ótken.
«Tarıhı berik dostyq baılanystarǵa negizdelgen qyrǵyz-qazaq qatynastary aldaǵy ýaqytta da halyqtarymyzdyń múddesi úshin nyǵaıyp damı beretinine senimdimin. Qazirgi ýaqytta qarym-qatynastarymyz odaqtastyq jáne strategııalyq seriktestik rýhyna tolyq saı keledi. Biz ózara kúsh jumyldyra otyryp, barlyq qol jetkizilgen ýaǵdalastyqtardy, barlyq baǵyt boıynsha alǵa qoıǵan maqsat-mindetterimizdi júzege asyratynymyzǵa senimdimin», delingen Qyrǵyzstan Prezıdentiniń jedelhatynda.
Túrikmenstan Prezıdenti Gýrbangýly Berdimuhamedov óz quttyqtaýynda Qazaqstannyń saıasatta, ekonomıkada jáne áleýmettik-gýmanıtarlyq salalarda úlken jetistikterge qol jetkizgenin jáne álemdik arenada alǵa qaraı nyq qadam basyp kele jatqanyn atap ótken.
«Túrikmenstan men Qazaqstan arasyndaǵy tatý kórshilik, dostyq jáne ózara túsinistik qaǵıdattaryna negizdelgen baýyrlastyq qatynastar halyqtarymyzdyń jarqyn bolashaǵy jolynda qarqyndy damı beretinine senimdimin», delingen Túrikmenstan Prezıdentiniń quttyqtaýynda.
Tájikstan Prezıdenti Emomalı Rahmon Qazaqstannyń memlekettilikti qalyptastyrýdaǵy, áleýmettik-ekonomıkalyq jáne qoǵamdyq-saıası damý isindegi jetistikterin, sondaı-aq halyqaralyq arenadaǵy bedelin joǵary baǵalaǵan.
«Biz Tájikstan men Qazaqstannyń strategııalyq seriktestigin nyǵaıtýǵa jáne kópǵasyrlyq dostyq arqaýyn jan-jaqty bekemdeýge, memleketterimiz arasyndaǵy ózara túsinistik pen qoldaýǵa basa mán beremiz. Biz kúsh jumyldyra otyryp, halyqtarymyzdyń ıgiligi úshin eki eldiń kópjosparly memleketaralyq yntymaqtastyǵyn ilgerilete beretinimizge senim bildiremin», delingen Tájikstan Prezıdentiniń quttyqtaýynda.
Belarýs Prezıdenti Aleksandr Lýkashenko elimizdiń tarıhı ólshemmen alǵanda qysqa merzim ishinde zor jetistikterge qol jetkizgenin, barlyq etnos ókilderi arasynda tózimdilikti, dinaralyq jáne mádenıetaralyq kelisimdi qamtamasyz etýdiń jarqyn úlgisin pash etkenin atap ótken.
«Qazaqstan senimdi túrde zamanaýı jáne básekege qabiletti memleket qalyptastyrýda. Mınsk men Nur-Sultan arasyndaǵy ózara senim men qurmetke negizdelgen strategııalyq odaqtastyq qatynastardyń odan ári keńeıip, jańa jasampaz jobalarmen tolyǵa beretinine senimdimin», delingen Belarýs basshysynyń jedelhatynda.
Fransııa Prezıdenti Emmanýel Makron óz quttyqtaýynda Qasym-Jomart Toqaevty jáne dostas Qazaqstan halqyn shyn júrekten quttyqtap, baq-bereke tilegen. Fransýz kóshbasshysy Fransııa men Qazaqstan arasyndaǵy strategııalyq seriktestiktiń qarqyndy damyp kele jatqanyn atap ótken. Sonymen qatar ol tehnologııalyq ınnovasııa, energetıka, «jasyl» ekonomıkalyq ósim men ornyqtylyqty ilgeriletý, kólik jáne taý-ken ónerkásibi, densaýlyq saqtaý, mádenı-gýmanıtarlyq yntymaqtastyq salalaryndaǵy ekijaqty yqpaldastyqty nyǵaıtý úshin zor múmkindik bar ekenine nazar aýdarǵan.
«Eger Sizdiń tyǵyz jumys kesteńiz múmkindik beretin bolsa, ekijaqty kún tártibindegi mańyzdy máselelerdiń bárin jan-jaqty talqylaý úshin О́zińizben Parıjde kezdesýge qýanyshty bolar edim», dep jazǵan Emmanýel Makron.
Germanııa Prezıdenti Frank-Valter Shtaınmaıer de óziniń júrekjardy quttyqtaýyn joldaǵan.
«Koronavırýs pandemııasy ózara baılanystarymyzdy shektese de, elderimiz ótken jyly turaqty jáne jemisti qarym-qatynastardy jalǵastyrdy. Aýǵanstandaǵy jýyrda bolǵan oqıǵalar jáne kúnnen kúnge kúsheıip jatqan klımattyq ózgeristerdiń áseri Sizderdiń aımaqqa jańa ári kúrdeli mindet júktep otyr. Biz muny jaqsy sezinemiz. Germanııa aldaǵy ýaqytta osy jáne basqa da syn-qaterlerdi sátti eńserýde jáne Siz qoldaǵan reformalar baǵytyn jalǵastyrý jolynda Qazaqstannyń senimdi seriktesi bolyp qala beredi», dep Frank-Valter Shtaınmaıer óziniń jedelhatynda atap ótken.
Qazaqstan Táýelsizdiginiń 30 jyldyǵyna oraı ózderiniń quttyqtaý jedelhattaryn Ázerbaıjan Prezıdenti Ilham Álıev, Armenııa Prezıdenti Armen Sarkısıan, Grýzııa Prezıdenti Salome Zýrabıshvılı, BAÁ Prezıdenti Halıfa ben Zaıd Ál Nahaıan, BAÁ Vıse-prezıdenti, Premer-Mınıstri, Dýbaı ámirliginiń bıleýshisi Mýhammed ben Rashıd Ál Maktým, Abý-Dabıdiń Taq murageri, BAÁ Qarýly Kúshteriniń Joǵarǵy Bas qolbasshysynyń orynbasary Mýhammed ben Zaıd Ál Nahaıan, Saýd Arabııasynyń Koroli Salman ben Abdelazız Ál Saýd jáne Saýd Arabııasy Koroldiginiń Taq murageri Mýhammed ben Salman ben Abdelazız Ál Saýd, Iran Prezıdenti Ibrahım Raısı, Ispanııa Koroli VI Felıpe, Malaızııa Koroli II Abdýlla, Bahreın Koroli Hamad ben Isa Ál Halıfa, Marokko Koroli VI Mýhammed, Taıland Koroli Maha Vachıralongkorn, Sıngapýr Prezıdenti Halıma Iаkob, Fınlıandııa Prezıdenti Saýlı Nıınıstıo, Polsha Prezıdenti Andjeı Dýda, Avstrııa Prezıdenti Aleksandr Van der Bellen, Chehııa Prezıdenti Mılosh Zeman, Úndistan Prezıdenti Ram Nat Kovınd, Izraıl Prezıdenti Ishak Gersog, Mońǵolııa Prezıdenti Ýhnaagıın Húrelsúh, Brazılııa Prezıdenti Jaır Bolsonarý, Rýmynııa Prezıdenti Klaýs Verner Iohannıs, Latvııa Prezıdenti Egıls Levıts, Estonııa Prezıdenti Alar Karıs, Slovenııa Prezıdenti Borýt Pahor, Bangladesh Prezıdenti Mohammed Abdýl Hamıd, Vetnam Prezıdenti Ngýen Sýan Fýk, Kýba Prezıdenti Mıgel Dıas-Kanel, Palestına Prezıdenti Mahmýd Abbas, Serra-Leone Respýblıkasynyń Prezıdenti Djýlıýs Maada Bıo joldady.
Sonymen qatar quttyqtaý jedelhattaryn ShYU Bas hatshysy Vladımır Norov, TMD Atqarýshy komıtetiniń tóraǵasy – Atqarýshy hatshysy Sergeı Lebedev, UQShU Bas hatshysy Stanıslav Zas, Ekonomıkalyq yntymaqtastyq uıymynyń Bas hatshysy Hýsrav Nozırı, Eýropalyq qaıta qurý jáne damý bankiniń prezıdenti Odıl Reno-Basso, ESKATO-nyń atqarýshy hatshysy Armıda Salsıa Alısdjabana, ISESKO-nyń bas dırektory Salım ál-Malık, Eýropadaǵy qaýipsizdik jáne yntymaqtastyq uıymynyń az ulttar jónindegi Joǵarǵy komıssary Qaırat Ábdirahmanov, TúrkPA-nyń Bas hatshysy Mehmet Sýreııa Er, sondaı-aq BAÁ Premer-mınıstriniń orynbasary, Prezıdent isteri jónindegi mınıstr Mansýr ben Zaıd Ál Nahaıan, Izraıldiń Qarjy mınıstri Avıgdor Lıberman, Penza oblysynyń gýbernatory Oleg Melnıchenko, M.Lomonosov atyndaǵy Máskeý memlekettik ýnıversıtetiniń rektory Vıktor Sadovnıchıı joldady.
Quttyqtaý jedelhattary áli de kelip túsip jatyr.
