Memleket basshysynyń tapsyrmasy boıynsha bıyl elordada qoljetimdi jeńildikti turǵyn úı sany 10 myń páterge deıin ulǵaıtyldy.
Jańa qonystanýshylarǵa kiltterdi elorda ákiminiń orynbasary Nurlan Nurkenov tabys etti. Úıler Esil aýdanynda ornalasqan (E34 jáne E44 kóshelerinde).
«Táýelsizdiktiń 30 jyldyǵy kúni qalanyń jańa aýdanynda jańa páterlerdiń kiltin tapsyrý men úshin úlken qurmet. Búgin osy úıdiń mańynda biz eń zamanaýı jabdyqtarmen jabdyqtalǵan 4 myń oqýshyǵa arnalǵan BINOM mektebin ashtyq. Árıne, bul aýdanda áli kóp jumys bar. Injenerlik ınfraqurylym boıynsha jumystardy jalǵastyramyz, joldar men ótpe joldardy, qoǵamdyq kólik jumysyn uıymdastyramyz. Biraq, eń aldymen, biz jurt ómir súrip, balalaryn oqyta alýy úshin turǵyn úı men mektep ashamyz.
Bolashaqta bul aýdan elordadaǵy eń jaıly oryndardyń birine aınalatynyna senimdimin. Barshańyzǵa amandyq, densaýlyq, baqyt, tabys tileımin! Qonys toıy qutty bolsyn!», dedi Nurlan Nurkenov kiltterdi tapsyrý kezinde.
Qonys ıelerin «Otbasy bank» AQ ortalyq fılıaly dırektorynyń orynbasary Janar Izimbetova da quttyqtady.
«Sizderdi Qazaqstan Respýblıkasynyń Táýelsizdik kúnimen, sondaı-aq qonys toılaryńyzben quttyqtaımyn! Jańa úılerińizde bereke men molshylyq bolsyn! Qurmetti qonys ıeleri, sizderdi jańa baspanalaryńyzben quttyqtaımyn! Úılerińizge jylýlyq, densaýlyq jáne jaılylyq tileımin!», dedi ol.
Bıbigúl Turabaeva elordada 2007 jyldan beri turǵyn úı kezeginde tur. Búgin ol baspanaly bolǵan baqytty jandardyń qatarynda.
«Men elorda turǵynymyn, №1 balalar aýrýhanasynda medbıke bolyp jumys isteımin. 2007 jyldan bastap turǵyn úı kezeginde turmyn. Búgin mereke kúni baspanaly bolyp otyrmyn. Osyndaı mańyzdy oqıǵa búgin bolǵanyna qýanyshtymyn. Qazaqstannyń barlyq azamatyn Táýelsizdiktiń 30 jyldyǵymen quttyqtaımyn! Barshańyzǵa beıbitshilik, jaqsylyq tileımin!», dep qýanyshymen bólisti Bıbigúl Turabaeva.
Lázzat Janpeıisova úshin búgin qos mereke – onyń balalary búgin qonys toıyn toılap jatyr.
Memleket basshysynyń tapsyrmasy boıynsha elordada qoljetimdi jeńildikti turǵyn úı kólemin ulǵaıtý boıynsha júıeli jumys júrgizilýde. Bıyl Nur-Sultanda 10 myń jeńildikti áleýmettik páter salyndy. Tek sońǵy úsh jylda qoljetimdi turǵyn úı sany 5,5 esege artty.
Mysaly, 2018 jyly 1800 áleýmettik páter berilgen bolsa, 2019 jyly – 2 900 áleýmettik páter, 2020 jyly – 7 000-nan astam páter salynyp, paıdalanýǵa berildi. Bıylǵy meje – 10 000 áleýmettik páter
Sonymen qatar, Elbasynyń bastamasymen qolǵa alynǵan «Jumys isteıtin jastarǵa jalǵa beriletin turǵyn úı» baǵdarlamasy bıyl da jalǵasyn tabady; sol sııaqty jastarǵa arnalǵan Elorda Jastary arnaıy turǵyn úı baǵdarlamasy iske qosyldy.
