Búgingi urpaqtyń úsh tildi meńgerýi, qaı jaǵynan alǵanda da, tıimdi bastama. Bul – bir jaǵy zaman talaby. Negizgi maqsatyna kelsek, birneshe tildi meńgergen, áleýmettik jáne kásiptik baǵdarǵa qabiletti, mádenıetti tulǵany damytý jáne qalyptastyrý. Elbasy Nursultan Nazarbaev: «Qazaqstan búkil álemde halqy úsh tildi paıdalanatyn mádenıetti el retinde tanylýǵa tıis. Bular: qazaq tili – memlekettik til, orys tili – ultaralyq qatynas tili jáne aǵylshyn tili – jahandyq ekonomıkaǵa oıdaǵydaı kirigý tili» degen bolatyn. Bul elimizdiń bolashaq urpaǵyn tárbıelep otyrǵan bilim salasy qyzmetkerlerine de syn bolmaq.
Árıne, el arasynda qazaq tili basqa eki tildiń qalqasynda qalyp ketpeı me degende qorqynysh joq emes. «Balanyń boıyna ultynyń ulylyǵy ananyń sútimen, tilimen darıdy. Sondyqtan bul júıe eń aldymen qazaq tilin jetik meńgertýdi kózdeıdi. Qazaq tili – ultymyzdyń rýhy, rýhanı baılyǵy, ony bilý árbir Qazaqstan azamatynyń boryshy. Ǵylymǵa, ınnovasııaǵa, tehnologııa men bızneske jol ashatyn orys jáne aǵylshyn tilderin de bilip úırenýimiz qajet», deıdi bul jóninde pedagogıka ǵylymdarynyń doktory, professor Asma Qalybekova.
Saryaǵash qalasyndaǵy №4 daryndy balalarǵa arnalǵan mamandandyrylǵan mektep-ınternaty jas urpaqqa úsh tildi úıretýdi keńinen qolǵa alýdy maqsat tutqan bilim oshaqtarynyń biri. 2007 jyly esigin aıqara ashqan bul mektepte búginde 350-ge jýyq
oqýshy bilim alyp júr. Olarǵa 40-qa jýyq ustazdar sabaq beredi. Mektep basshylyǵy naǵyz bilikti, tájirıbeli ustazdardy jınaı bilipti. Muǵalimderdiń arasynda ǵylym kandıdattary men professorlar da bar. Mektep dırektory Raýshan Djerenovanyń ózi pedagogıka ǵylymdarynyń kandıdaty, 70-ten astam eńbektiń avtory. Ǵalym basqaryp otyrǵan bilim oshaǵynyń jetistikteri jeterlik. Bıyl oblystyq olımpıadada osy mekteptiń úsh oqýshysy birinshi oryndy ıelendi. Eki oqýshy ekinshi oryn, bireýi úshinshi oryndy aldy. Taǵy bir qýanyshty jaǵdaı, jaqynda Sankt-Peterbýrg qalasynda fızıka páni boıynsha ótken baıqaýda taǵy bir oqýshy úshinshi dárejeli dıplomǵa ıe boldy. Osy bilim oshaǵynyń 7 oqýshysy Nazarbaev zııakterlik mektebine qabyldanýy munda bilim sapasynyń joǵary deńgeıde ekenin baıqatsa kerek. «Biz ál-Farabı atyndaǵy Qazaq ulttyq ýnıversıtetimen tyǵyz baılanysta jumys jasaımyz. Sondaı-aq, Almaty qalasyndaǵy Y.Altynsarın atyndaǵy №159 mekteppen kelisimshart jasastyq. Endi bizdiń muǵalimder men oqýshylar Almatyǵa baryp, osy bilim oshaqtarymen tájirıbe almasady. Biz qazir sońǵy tehnologııalardy engizýdiń arqasynda balalardyń bilim sapasyn kóterýimiz qajet. Ol úshin ǵalymdardy dáris berýge kóp tartýymyz kerek. Oqýshylar arasynda saýalnama júrgizgende kóbisi halyqaralyq qatynastar mamandyǵyn qalaıtynyn aıtty. Osy maqsatta, aldaǵy ýaqytta Astanadaǵy L.N.Gýmılev atyndaǵy Eýrazııa ulttyq ýnıversıteti sııaqty bedeldi oqý oryndarynyń ǵalymdarymen baılanys ornatsaq deımiz», deıdi mektep dırektory Raýshan Omarhanqyzy.
Qaıbir kúni pedagogıka ǵylymdarynyń doktory Asma Qalybekova osy mekteptiń oqýshylarymen úsh tilde bilim alý máselesi týrasynda keńinen áńgime qyldy. Jas urpaqtyń bul júıege degen qyzyǵýshylyǵy mol. Eń qýanyshtysy, jastardyń boıynan eline, jerine, Otanyna degen mol súıispenshilikti kórdik. Táýelsiz elimizdiń árbir abyroıly isin maqtan tutady. Bilimge yntasy erekshe, yqylasy mol 10-synyp oqýshysy Juldyz Qaıypjan til bilýdiń arqasynda bilim keńistiginde kóp bıikterge qol jetkizýge bolatynyn, ana tilin ardaqtaýmen qatar, el tarıhyn, ultymyzdyń salt-dástúrin tereńirek bilgisi jáne ony álemge keńinen nasıhattaǵysy keletinin aıtyp, aǵynan jaryldy. Laıym, jastarymyz tilegine jete bersin.
Oralhan DÁÝIT,
«Egemen Qazaqstan».
Ońtústik Qazaqstan oblysy.
Sýretterde: mektep dırektory R.Djerenova jáne mektep oqýshylary.
Sýretterdi túsirgen
Arman ÁBDIRAShULY.
