Fransııanyń talǵampaz kórermenderin tańǵaldyrǵan qazaqstandyq ártister otandyq klassıkalyq mýzykanyń úzdik úlgilerin pash etti. Bul – qazaqstandyq trıonyń Fransııa elindegi úshinshi konserti.
Ujymnyń halyqaralyq gastroli Nansı qalasyndaǵy Merııanyń tarıhı saraıynda ótti. Ataqty ortaǵasyrlyq Stanıslav alańynda ornalasqan bul zal baı tarıhymen jáne qaıtalanbas akýstıkasymen erekshelenedi. Konsertti tamashalaýǵa kelgen kórermenderdiń qarasy qalyń boldy.
Trıo ártisteri – QR eńbek sińirgen qaıratkeri, ujymnyń negizin qalaýshy Tımýr Ýrmancheev (fortepıano), halyqaralyq baıqaýlardyń laýreattary Murat Narbekov (vıolonchel) pen Sholpan Mankeeva (skrıpka) otandyq mýzykalyq ónerdi joǵary deńgeıde kórsete bildi. Olar Roza Baǵlanova atyndaǵy qazaq konserttiń qyzmetkerleri ekenin atap ótken jón.
Bul keshte qazaqstandyq kompozıtorlardyń týyndylary men eýropalyq klassıka jaýharlary shyrqaldy. Sheteldik kórermenderdi tamsandyrǵan ártister halqymyzdyń ulttyq qundylyqtary kórinis tapqan «Iаpýraı» jáne «Kóroǵly» týyndylaryn usyndy. Sondaı-aq S.Rahmanınov, K.Debıýssı, I.Brams syndy álemdik kompozıtorlarynyń úzdik shyǵarmalary oryndaldy.
Kórermen qaýym qazaqstandyq trıonyń sheberligine tánti bolyp, zor yqylas bildirdi.«Qazaqstanda klassıkalyq ónerdiń joǵary deńgeıde damyǵandyǵyn bilmeppin. Mýzyka arqyly Qazaqstan halqynyń tarıhyn sezine aldym. Trıo ártisteri bizge naǵyz mereke syılady, alǵysymdy bildiremin», dep jetkizdi óz pikirin Abdelrhani Azzab esimdi kórermen.
Aldaǵy ýaqytta «FORTE-TRIO» ujymy halyqaralyq gastrolder aıasyndaǵy sońǵy konsertterine daıyndyǵyn bastaıdy. Sońǵy konsert 22 jeltoqsan kúni Lıon qalasyndaǵy ataqty «Moliere» zalynda ótkizilmek.
