Memlekettik jáne vedomstvolyq arhıvter qyzmetkerleriniń biliktiligin arttyrý ortalyǵynyń saltanatty ashylýynda Eraly Toǵjanov sala qyzmetkerlerine alǵys aıtyp, olarǵa qoldaý kórsetilýi tıis ekenin atap ótti.
«О́tken kúnniń aıǵaqtarynyń bári – bolashaqtyń negizi. 2020 jyldan bastap arhıv isi qyzmetkerleriniń jalaqysy 50 paıyzǵa deıin kóterildi. Aımaqtarda 30 paıyzǵa deıin artty. 2022 jyldan bastap jalaqy taǵy da 20 paıyzǵa ósedi dep josparlanýda. Arhıv salasy qyzmetkerlerine jan-jaqty qoldaý kórsetýimiz kerek. Ekinshiden, sol jumysty atqaratyn qyzmetkerlerdiń de deńgeıi joǵary bolýy kerek. Sol sebepti búgin arnaıy oqý ortalyǵy ashylyp jatyr. Ortalyqtyń ashylýymen barshańyzdy quttyqtaımyn. Mamandardy Eýrazııa Ulttyq ýnıversıteti daıarlap jatyr, degenmen, ol – az. Arhıv salasynda júrgen azamattar Ulttyq arhıv janynan ashylǵan osy ortalyqta dáris bere alady, tájirıbesimen, bilimimen jergilikti jerdegi azamattarmen bólisedi degen senimdemin», dedi Eraly Toǵjanov.
Mádenıet jáne sport mınıstri Aqtoty Raıymqulova arhıv salasy kadrlarynyń biliktiligin arttyrý jáne qaıta daıarlaý, onyń ishinde salalyq mamandyqtar boıynsha – restavrator, ǵylymı-tehnıkalyq jáne aýdıovızýaldy qujattardy óńdeý boıynsha alǵash ret ashylǵan ortalyqtyń mańyzdylyǵyn atap ótti.
«Qazirgi arhıv salasy - álemdik órkenıettiń barlyq salasyna saı keletin sheteldik arhıv mekemelerimen, ǵylymı ortalyqtarymen tyǵyz baılanysta qyzmet etip jatqan júıe dep aıtýǵa ábden laıyq. Memlekettik jáne vedomstvolyq arhıvter qyzmetkerleriniń biliktiligin arttyrý ortalyǵynyń negizgi mindeti - arhıv salasynyń joǵary deńgeıli kásibı mamandaryn daıarlaý, kadrlyq áleýetin kásibı deńgeıge kóterý, arhıv isi jáne qujat aınalymy salasyndaǵy mamandardyń kásibılik, jeke quzyrettilik sapasyn arttyrý, kadrlardyń jeke damý baǵdarlamasyn ázirleý. Ortalyqtyń tolyq kýrsyn aıaqtaǵan mamandar tıisti úlgidegi sertıfıkatty alady», dedi mınıstr.
