G-Global. XXI ǵasyr álemi: «Otbasy bank» jáne onlaın format

Forýmda iri qarjy kom­pa­nııalarynyń top-mened­jer­leri qarjylyq tehnolo­gııa­lar­dyń damýy, sıfrly ıpoteka, ekojúıeler, sıfrly va­lıýtanyń paıda bolýyn tal­qy­la­dy. Pandemııa kezinde jumys baǵytyn indet týdyrǵan talapqa oraı beıimdep, klıentterge qashyqtan qyzmet kórsetýdi úılestire bilgen kompanııanyń biri – «Otbasy bank». Forýmǵa qatysqan atalǵan banktiń Bas­qar­ma Tóraǵasy Lázzat Ibra­gı­­movanyń aıtýynsha, klassı­k­alyq bank úlgisinen onlaın-servıske deıingi jol – sıfrlandyrý baıanyna aınalǵan uly kezeń ispetti.

– Klıentterimiz qyzmetterdiń onlaın formatqa kóshirilgenin qalaıdy. Biz pandemııa talaptaryna daıyn boldyq jáne aldyn ala qashyqtan oqytý qyzmetin engize bastadyq. Onyń aıasynda vıdeo arqyly banktiń barlyq ónimderi boıynsha kýrstar, dıalogtyq trenajerler bar. Sondaı-aq bir kúnniń ishinde kontakt ortalyqty qashyqtan qyz­met kórsetý re­jimine kóshir­dik. Vıdeobankıng pılotty jobasy iske qosylyp, Quanysh chat-boty jumys isteı bas­­­tady. Al karantın bastalǵan mezette komandalyq rýhty kóte­rip, ujymdy judyryqtaı ju­myl­­dyrý qajet boldy. Pan­de­mııa ýaqytynda alǵash bolyp klıent­terdiń aı saıynǵy tólemin ke­ıinge qaldyrýdy engizdik. Vıdeo­bankıng operatorlarynyń sany 8-den 100-ge deıin kóbeıdi. Vıdeo-servıs arqyly jasalatyn ope­rasııa sany 1-den 7-ge deıin art­ty, – deıdi Basqarma tóraǵasy Lázzat Ibragımova.

Bank pandemııa kezinde alǵash bolyp ınternet-bankıng arqyly nesıeni qaıta qurylymdaý múm­kindigin berdi. 2020 jyldyń sá­ýirinde ótinimder qabyldana bas­tap, ol ótinimder sms arqyly rastaldy jáne eshqandaı qujat talap etilmedi. Qysqa ýaqytta arnaıy platforma ázirlenip, tabysynan aıyrylǵan jáne áleýmettik az qamtylǵan otbasy­lar­dyń onlaın rejimde nesıe tólemin keıinge shegerý múm­kin­di­gi paıda boldy. 125 myń adam ınternet-bankıng qyzmetin paıdalandy, nesıe tólemin keıinge shegerýge 29 046 ótinim túsip, onyń 29 037-si óńdelgen.

«Otbasy bank» – «Báıterek» holdınginiń quramyna enetin tolyqqandy memlekettik bank jáne biz óz ımıdjimiz úshin ja­ýaptymyz. Álem ózgerip jatyr jáne biz qazir ásirese, ıpoteka boıynsha jańasha negiz qa­lyp­tas­tyrýymyz kerek. Na­ryq­taǵy eń iri oıynshy bolýymyz bizdi osyǵan mindetteıdi. Kún saıyn 500-ge jýyq nesıe beremiz, 2 mıllıondaı klıentimiz bar. Banktiń sıfrly evolıýsııasy birtindep júzege asty. Aldymen mamandar qolaıly ıpotekalyq ónimder jasady, fılıaldyq jáne agenttik jeli qurdy» deıdi Basqarma tóraǵasynyń orynbasary Nurlan Aqshanov.

Basqarma basshysynyń aıtýynsha, banktiń oqytý baǵdar­la­masynan ótip, kópshilikke depozıt ashýǵa, alǵashqy jarnany tıimdi jınaýǵa kómektesken qa­ra­paıym qazaqstandyqtar agent­tik jelilerdiń konsýltant­ta­ryna aınalǵan. Mundaı qar­jy kómekshilerine degen su­ra­nystyń óskeni sonsha, 2013 jyly bankte 226 konsýltant bolsa, qazir olardyń sany 1 649 adamǵa jetipti. Olar tipti shalǵaı aýyldar men kásiporyn ujymdaryna baryp aqshany saýatty jınaýdyń qyr-syryna baýlyǵan. Qazir depozıtten keıingi operasııalardyń 56 paıyzy, depozıt ashý prosesiniń 27 paıyzy vıdeobankıng arqyly júzege asyrylady.

«Búginde olardyń fýnksııasy tek depozıt ashýmen shektelmeıdi. Eń tájirıbeli bank konsýltanttary nesıe ótinimderin qa­byldap, ol boıynsha aldyn ala maquldaý shyǵara alatyn da bol­dy. Beriletin qarajattyń mól­sherin bilgennen keıin osy qujat arqyly qazaqstandyqtar 2 aı boıy baspana izdeı alady. Qazir berilgen zaımdardyń 18 paıyzy osy onlaın qyzmettiń enshisine tıedi», dep derek keltiredi Bas­qarma tóraǵasy.

Banktiń IT-blogynyń synaqqa saqadaı-saı bolýy bankti qyz­metker tapshylyǵynan qutqaryp qalǵan. О́ıtkeni indettiń «Otbasy bank» qyzmetkerlerin aınalyp óterine eshqandaı kepildik joq. Sondyqtan der ýaqytynda qolǵa alynǵan vıdeobankıng búkil ujymǵa artylar mindetti oıdaǵydaı atqaryp shyǵa aldy jáne onyń múmkindikteri qa­zir jetildirilip jatyr. Bank qyz­metkerleri úıde otyryp-aq klıentterge qyzmet kórsetýin jal­ǵastyra berdi. Osylaısha qarjylyq uıym óziniń qyzmet tizbegin buzyp alǵan joq.

Prezıdent Qasym-Jomart To­qaevtyń halyqqa arnaǵan Jol­d­aýynda zeınetaqy qo^­ryn­daǵy artyq aqshany paıdalaný múmkindigin usynǵany belgili. Bul shara qazirdiń ózinde kóp adamnyń ıgiligine jarap úlgerdi. Osyǵan oraı baǵdarlamanyń bas operatory bolý mindeti de «Otbasy banktiń» moınyna júkteldi. Aýyr da mańyzdy mindetti ujym oıdaǵydaı atqara alyp jatyr deýge tolyq negiz bar. Osy jyly «Otbasy bank» birjolǵy zeınetaqy tólemin paıdalaný boıynsha arnaıy platforma (enpf-otbasy.kz) ázirledi. Banktiń óńirlik damý jáne satylym departamentiniń dırektory Rahılıa Baltabaevanyń aıtýynsha, osy platformany jasaý úshin aýtsorsıngke bir de bir tıyn berilmegen. Platforma – bank IT-mamandarynyń eńbegi.

«Qazir 300 myńnan astam qazaq­standyq zeınetaqy jınaq­taryn paıdalandy. Olardyń 12 paıyzy qarjysyn emdelýge jumsasa, 88 paıyzy zeınet qarjysyn baspana máselesin sheshýge baǵyttady. Iаǵnı «Otbasy bankine» ıpo­tekalyq zaım bo­­­ıynsha úlken klıent aǵyny ke­lip qosyldy. Bul ónimge degen su­ranystyń kóptigi áserinen Bas­pana Market biregeı servısi iske qosyldy. Munda satýshy men satyp alýshy kezdesip, óz prosesterin bastaı alady. Ol jerde turǵyn úıdi tańdap, páter brondap, óz shoty týraly tolyq aqpar alady», deıdi Rahılıa Baltabaeva.

Jalpy, qazir ınternet-ban­kıng arqyly 25 operasııa onlaın formatta júzege asady eken. Onyń ishinde depozıt ashý, depozıtten keıingi qyzmet kór­setý, aýdarymdar jasaý, túrli anyq­ta­malar alý qyzmetteri bar.

Lázzat Ibragımovanyń sózine qaraǵanda, keleshekte banktiń sıfr­ly qyzmet kórsetý júıesi túbe­geıli ózgerýi múmkin. Sebebi zamanaýı qajettilikter sony talap etedi.

– Úıde otyryp ıpoteka rásim­deý qazir de júzege asyp jatyr. Elimizde sıfrly ıpotekany iske asyryp jatqan birneshe servıs te bar. 2022 jyly biz de bul prosesti tolyqtaı aıaqtaımyz. Osy jerde aıta keter nárse, sı­frly transformasııa úshin jyl­damdyq óte mańyzdy. Me­nińshe, bankterdiń keleshegi fýnk­­sııalardyń bólinýimen jáne monoónimdi bankterdiń órken­deýimen mańyzdy. О́ıtkeni bir blok shaǵyn jáne orta bıznes­pen, kelesisi korporatıvti klıenttermen, úshinshi bólim jeke tulǵalarmen jumys isteıtin ýnıversaldy bankte asa úlken jyl­dam­dyqtaǵy prosesterdi úl­gerip qamtamasyz etý múmkin emes. Biz turǵyn úı jınaǵynyń jabyq jú­ıe­si bolǵandyqtan tek turǵyn úı sektorynda jumys isteımiz, qazir 2,5 mıllıondaı salymshymyz bar, tıisinshe jumys prosesin budan ary tereńdete túsip, turǵyn úı salasyna qatysty ekojúıe aıasyn keńeıte túskimiz keledi, – deıdi L.Ibragımova.

Eger 2021 jyldyń qyrkúıe­gine deıin azamat ıpoteka rásim­deý úshin bank bólimshesine 9 ret kelse, qyrkúıekten bastap 1-2 ret barý ǵana jetkilikti boldy. 2022 jyly ıpoteka máse­lesimen bank bólimshesine barý­dyń múlde qajettiligi bolmaıdy. Iаǵnı konsýltasııa berý jáne ótinimdi aldyn ala maquldaý; baspanany baǵalaý; QR habarlandyrý alý; satyp alý-satý kelisimin rásimdeý; bankke tıisti qujattardy usyný; ke­lisim­shartqa jáne zaım berýge qol qoıý prosesteri túgel on­laınǵa kóshiriledi. Qysqasy, bizdi sıfrly dáýirdiń teńdessiz ja­ńa­lyqtary kútip tur. Onyń barlyǵy bank qyzmetin sapaly etýge jáne klıent ýaqytyn únemdeýge baǵyttalǵan.