Úsh bólimnen turatyn jınaqqa 1986 jylǵy jeltoqsan kóterilisine qatysýshy jastardy basý maqsatynda partııa, memleket jáne quqyq qorǵaý organdary tarapynan júzege asqan is-qımyldarǵa qatysty resmı qujattar enip otyr. Jınaqty qurastyrǵan – Parlament Májilisiniń depýtaty, tarıh ǵylymdarynyń kandıdaty Berik Ábdiǵalıuly. Bul jınaqtyń «Arys» baspasynan jaryqqa shyǵýyna qoldaý kórsetken – «Altyn Qyran Foundation» qoǵamdyq qory. Ǵylymı qaýymdastyq, sondaı-aq stýdentter men tarıhqa qyzyǵýshylyq bildiretin oqyrman qaýymǵa arnalǵan jınaq materıaldary hronologııalyq negizde berilgen.
Jıyndy ashyp, sóz sóılegen Ulttyq kitaphananyń ǵylymı hatshysy, Halyqaralyq «Alash» ádebı syılyǵynyń laýreaty Bolat Júnisbekov Jeltoqsan kóterilisine qatysty derektermen bólisti. Búginde jeltoqsandyqtardyń múddesin qorǵaýǵa atsalysatyn 17 uıym jumys isteıdi. Al Ulttyq kitaphana qorynda 3500-den astam derek bar. 1994 jyldan 2010 jylǵa deıin jeltoqsanshylarmen tyǵyz baılanysta jumys istegen Bolat Júnisbekuly sol kezde sottalǵandar sanynyń 99 adam ekenin atap ótti. Osy azamattardyń aty-jónderi tolyqtaı qujattyq hronıkalar jınaǵynda kórsetilip otyr.
«Bul jınaq jeltoqsanǵa obektıvti baǵa berýde, sol kezeńniń tarıhı shyndyǵyn tanýǵa yqpal etetin basylym», dedi tarıhshy Hangeldi Ábjanov.
Tarıhshynyń aıtýynsha, keńestik jyldary zııaly qaýymnyń eki toby qalyptasty. Biri saıası basqarýshy ıntellıgensııa bolsa, ekinshisi quqyq qorǵaý ıntellıgensııasy. Munda myńdaǵan derek bar. Onda kimniń ustalǵany, qandaı jaraqat alǵany bári jazylǵan. Bul kitap aqıqatty qalpyna keltirýge kómektesedi.
Jıynda tarıh ǵylymdarynyń kandıdaty, jazýshy Beıbit Qoıshybaev, kompozıtor, jazýshy Hasen Qojahmetov, qalalyq qoǵamdyq keńes múshesi Qusman Shalabaev, sonymen birge Jeltoqsan uıymdarynyń jetekshileri, taǵy basqalar sóz sóılep, mundaı basylymnyń jaryq kórýi aldaǵy ýaqytta tarıhı durys tujyrym jasaý men óskeleń urpaqqa Táýelsizdiktiń qadirin uǵyndyrýda taptyrmas qural ekendigin atap ótti.
Jeltoqsan kóterilisiniń barysyn kezeń-kezeńimen baıandaıtyn mazmundy jınaq 1 myń tırajben jaryqqa shyqty.
