«Súıinshi» baby-boksqa ıe bolǵan jas otbasynyń biri – oraldyq Qarlyǵa men Aısezim Rahmetýllınder. 23 jastaǵy Qarlyǵa Faızollauly Oral qalasyndaǵy saýda úıleriniń birinde ákimshi bolsa, Aısezim Talǵatqyzy – mektep muǵalimi. Dál 16 jeltoqsan kúni dúnıege kelgen tuńǵyshtaryna Hamza dep esim qoıypty. Qalalyq kópbeıindi aýrýhananyń perzenthana bóliminen shyqqan sábıdi ata-anasy birden Oral qalasyndaǵy ortalyq meshitke alyp baryp, ulttyq rásimmen azan shaqyryp at qoıǵyzyp alypty.
Jańaqalalyq muǵalim Qaharman Zınýllınder de dál 17 jeltoqsan kúni qýanyshqa keneldi. Buǵan deıin úsh balaly otbasy birden egiz sábımen tolyqty. Ulttyq jańarý kúni dúnıege kelgen ul men qyzǵa Tarǵyn jáne Torǵyn degen ádemi esim buıyrdy.
– Egiz balamyzǵa túrli esim tańdadyq. Tizimde Maǵjan men Marjan da boldy. Aqyry aqyldasa kelip, Tarǵyn men Torǵynǵa toqtadyq. Perzenthanadan shyǵarda keremet syılyqqa da ıe boldyq. О́te qýanyshtymyz. Qazir Jańaqaladaǵy óz úıimizge jetken betimiz osy, – deıdi Qaharman Saǵyndyquly bizben telefon arqyly sóıleskende.
Batys Qazaqstan oblysy
