Baltakólde Batyr ana kóp

Árıne, baıaǵynyń altyn qursaqty batyr analary týraly áńgime bólek. Ol jyldary aýyldarda úı saıyn aldyńnan altyn alqa taqqan analar shyǵatyn. Árıne, qazir de Alla taǵalam aýyldaǵy analardyń qursaǵyna berekesin darytyp-aq tur. Biraq, qazir zaman basqa, jaǵdaı basqa, altyn alqaǵa degen talap basqa. Elbasy ­ N.Nazar­baev halyqqa arnaǵan Joldaýynda Máńgilik El bolý ata-babalarymyzdyń san myń jyldan bergi asyl armany ekenin aıta kelip: «Ol arman – turmysy baqýatty, tútini túzý ushqan, urpaǵy erteńine senimmen qaraıtyn baqytty El bolý edi» dep túıindeıdi. Shynynda, ulysymyzdyń uıytqysy sanalatyn Ońtústikte demografııalyq dúmpýdiń kún saıyn kúsheıip kele jatqany el turmysynyń túzelip, jaǵdaıy jaqsara bastaǵanynyń bir belgisi ekeni anyq. Biz áńgime etkeli otyrǵan Baltakól aýyly – ulylardyń otany Otyrar aýdanyna qaraǵanymen, oǵan kıeli Túrkistan qalasy arqyly barsańyz, tez jetesiz. О́tken jyly bul okrýg aýdan kóleminde baqsha ónimderin óndirý jaǵynan birinshi oryn aldy. Sóıtip, aýyl ákimi Ábdiraseıit Ákimbekten bas­tap, sharýa qojalyǵynyń tóraǵalary, birqatar mehanızatorlar aýdan ákiminiń alǵys hatymen marapattalyp, zattaı syılyqtarǵa ıe boldy. Baltakólde batyr ana kóp. Búginde bul aýyldyq okrýgte 408 otbasy tútin tútetip otyrsa, «Altyn alqa» taqqan – 66, «Kúmis alqa» taqqan 130 ana bar eken. Sonda árbir ekinshi úıde kópbalaly ana turady degen sóz. Taǵy bir qýanarlyǵy, keýdesine alqa taqqan analardyń kóbisi jas kelinshekter. Mysaly, osy okrýgke qarasty Kólqudyq aýylynyń turǵyny Botagóz Bekenova mektepte eńbek etip kele jatqanyna 13 jyldyń júzi bolypty. «Eki ul, tórt qyzym bar. Úlkenim Almaty qalasynda kolledjde oqıdy, eń kishkentaıym 2 jasta. Kúıeýim júrgizýshi bolyp jumys isteıdi. Memleket kópbalaly analarǵa jyl saıyn jaqsy jaǵdaı jasap keledi ǵoı. Ár balanyń óz nesibesi bar. Sondyqtan kópbalaly otbasy bolýdan qorqýdyń qajeti joq», deıdi ol. Sondaı-aq, kólqudyqtyq Gúlzada Aqjol, Gúlzııa Súttibaı árqaısysy – 6, Ǵaınıjamal Júnisova – 5, Gúlmıra О́mirzaqova – 4, Móldir Dúısenova 5 perzent tárbıelep otyr. «Úsh ul jáne egiz qyzdarym bar. Úlkenim birinshi synypta oqıdy. О́tken jyly «Qazaqstan» ulttyq arnasynda «Eń jas batyr ana» degen baıqaý uıymdastyryldy. Soǵan qatysýǵa nıet bildirgen edik. Jýrnalıster: «Sizderge ózimiz baramyz», dedi. Biraq, nege ekenin qaıdam, habarlaspady. О́zim aýyldaǵy mektepte jumys istep kele jatqa­nyma 10 jyl boldy. Bastaýysh synyp­tyń muǵalimimin», deıdi Ǵaınıjamal Júnisova. Gúlnar PARMANOVA. Ońtústik Qazaqstan oblysy, Otyrar aýdany.