Alty mıllıon alaý raýshan

  Zaman dıdaryndaǵy ózgerister ómirge jańa lep, utqyr umtylystar ala keletini bar. Anaý bir jyldar­daǵy qıyndyqtardan keıin Stepno­gor JEO-ǵa jańa ınvestor kelgen. Arada úsh jyl ótkende búkil aımaqty býǵa bólep turatyn úırenshikti kórinis aqyryndap seıile bastady. Sóıtsek, ilkimdi azamattar beı-bereket býdalanyp jatatyn býdyń ózin iske jaratatyn amal tapqan eken. Qalanyń óndiristik aımaǵynda osylaısha «Qunarly» gúl ósirý jylyjaı ortalyǵy paıda boldy. Bul – 2006 jyl edi. Keshen basshysy Tamara Ilııa­so­va óndiris úsh kezeńdik damý baǵy­tyn ustanatynyn aıtady. Qazir 3 gektardy alyp jatqan jylyjaı Gollandııanyń «Agrotech-Didam» kompanııasynyń ozyq tehnologııasyna negizdelgen jabdyqtardy paıdalanady. Munda jyl saıyn joǵary surypty 6 mıllıon dana raýshan (roza) ósirilip, jurtshylyqtyń kóńil qýanyshyna aınalýda. Endi ekinshi kezeńde jylyjaı aýmaǵy 6 gektarǵa ulǵaıtylyp, bolashaqta 12 gektarǵa jetkizilmek. Jyl boıy úzdiksiz jumys isteı­tin kásiporyn ónimderine suranys joǵary. Qazir Stepnogor gúlderin elimizdiń barlyq iri qalalary men Reseıdiń shektes oblystary paıdalanady. Analar kúnine arnalǵan shoq-shoq gúlderdi jylyjaı qyzmetkerleri suranysqa qaraı jiberip jatyr. Bul olardyń merekege tartýy dep bilemiz. Baqbergen AMALBEK, «Egemen Qazaqstan». Aqmola oblysy. Sýrette: «Qunarly» keshe­ni­niń kóńil jadyratar raýshandary.