Teńizshi qyz

Tentek tolqyndary aq ezýlene kókke atylǵan Kaspııdiń jaǵasyndaǵy kórikti qala – Aqtaýdyń turǵyndary úshin jolaq keýdeshesinen teńiz ıisi múńkigen teńizshiler tań emes. Sý betin aıyra tilip shartarapqa mańyǵan kemeler ekıpajyndaǵy aǵa-inilerin, jubaılaryn shyǵaryp salyp, kútip alý – Aqtaý aılaǵynda jıi qaıtalanyp jatatyn kórinis. Alaıda, kózsińdi qubylystyń ishinde de tańdanatyn tustar joq emes eken. Ol óńkeı jigittermen birge qara shashy jelbirep, moıyldaı qara kózi nurlana jymıyp qarakózdi qyz balanyń teńiz saparyna shyǵýy. Qydyryp júrgen emes, áskerı tártippen sap túzep, moınyna mindetti jaýapkershilikti alǵan arý. 25 jastaǵy Janar Ibraeva – Aqtóbe óńiriniń týmasy. Joǵary oqý ornynan zańger mamandyǵyn alǵan jas qyzdy bala kezinen qııalyn baýraǵan teńiz tolqyndary qol bulǵap, kók aıdynǵa shaqyra bergendeı. Jany qalaǵan qyzmet ózine tartpaı tynbaıdy eken, Janar aqyry óz mamandyǵynan bas tartyp, teńizge bet burdy. Jańadan kelgen jasty, ásirese, qyz balany teńizge birden shyǵarý ońaı emes. Sondyqtan Janar alǵashynda teńiz qurylymynda qyzmet etti, osylaısha armanyna birte-birte jaqyndaı tústi. Jetti de. Ol sońǵy bir jyldan beri Kaspıı teńiziniń qazaqstandyq bóliginiń shekarasyn kúzetetin «Oral» kemesinde baılanysshy bolyp qyzmet etedi. Telegeı teńiz ortasyndaǵy sý kólikterin kádýilgi ómirmen baılanystyryp turatyn qyzmettiń jaýapkershiligi aıtpasa da túsinikti. Janar qıyn salany birden meńgerip ketken kórinedi. Sol sebepti, qıyn qyzmetti erlerge tán qaısarlyqpen, tabandylyqpen múltiksiz atqaryp júrgen arýdy áriptesteri – ekıpajdaǵy 30 adam túgel maqtan tutady. Teńizdegi shekara shebin qorǵaıtyn otandyq ónim «Oral» kemesiniń Janar úshin orny bólek. О́ıtkeni, Oral qalasynda sýǵa alǵash túsirilgen sátinen bastap osy keme bortynda keledi. Ár salanyń óz yrym-tyıymy, nanym-senimi bolady. Teńizshiler arasynda kúni keshege deıin «Kemede áıel adam bolmaýy kerek, bolsa baqytsyzdyqqa dýshar bolasyń» degen jazylmaǵan «zań» bar bolatyn. Kerisinshe, kelgeli tek jaqsylyqtardyń jarshysy bolǵan súıkimdi qazaq qyzy – ekıpajdaǵy jalǵyz qyz retinde qurmetke ıe, teńizshiler erkesi, demek ol áıelge qatysty álgi túsinikti tas-talqan etti deýge bolady. Muny «Oral» kemesiniń kapıtany Q.Sharshanqulovtyń: «Kemeni teńizge túsirgennen bas­tap qyz bala áskerı qyzmetshi bolyp ketedi. Er adamdardan kem bolmaı, abyroımen qyzmet atqarýda», degen sózderi de dá­lel­deı tústi. Al Janar bolsa óz basynan ótken eń qyzyqty da qıyn sát retinde teńizshiler dástúrine saı aıdynǵa shyqqan soń teńiz sýyn ishken kezin kúlip eske alady. Tuzy basym teńizdiń kermek sýyn ishý turmaq, aýyz tııýdiń ózi qıyn bolsa da «tártipke» saı Janar da ishken. «Kemedegiler úshin ómir men ólimniń araqashyqtyǵy kemeniń qalyńdyǵyndaı» degen uǵym bar. Árıne, jamandyqtyń beti ári bolsyn. Budan aıtpaǵymyz, osynshalyqty qıyn jumystan baqyt tapqan Janar qyzdyń táýekelshil talabyna tánti bolasyń. Gúlaıym ShYNTEMIRQYZY, «Egemen Qazaqstan».   Mańǵystaý oblysy.