OTAN ÚShIN OTQA TÚS, KÚIMEISIŃ

Keshe Táýelsizdik saraıynda Otan qorǵaýshylar kúni men Uly Jeńistiń 65 jyldyǵyna arnalǵan saltanatty shara ótip, merekelik kesh “Erlik pen birlik – dástúr sabaqtastyǵy” konsertine ulasty. Táýelsizdik saraıynyń ishi ádet­tegiden ózgeshe aıshyqtalyp, sahna tórine qos merekeni ulyq­taı­tyn beıneler bederlenip, bir ja­ǵy­na Aqorda men Qazaq eliniń qa­zirgi qaısar da saq sarbazdarynyń qyrandaı tulǵalary tuǵyrǵa qonsa, ekinshi qaptalyna 1945 jylǵy Jeńis paradyndaǵy sardarlar kó­ri­nisi otty jyldar jańǵyryǵyn es­ke salyp, urpaqtar sabaqtas­ty­ǵyn pash etkendeı áser qaldyrdy. Keý­desi qaharmandyq pen qaısarlyq rýhymen órlengen, keshegi Otan úshin ot keshken qaharmandardyń jurnaǵyndaı elesteıtin maıdanger urpaq pen beıbit ómirde el irgesi beriktigin belsene qorǵaǵan qazaq sarbazdary qatar jaıǵasyp, Otan degen uly uǵymnyń qaı kezde de, qaı býynnyń ókiline de ortaq qundylyq ekeni sezildi. Merekelik keshti júrgizýshi zal­ǵa el Prezıdenti Nursultan Na­zarbaevtyń kirip kele jatqandyǵyn habarlady. Qazaqstannyń Mem­leket­tik týy sahna tórine kóterilip, baıtaq eldiń kógildir baıraǵy ás­ke­rı áýenimen asqaqtaı jelbiredi. Qazaq eliniń Ánurany áýelep, táýel­sizdik rýhymen jigerlengen qart maıdangerler men áskerı már­tebeleri memlekettik nagradalarmen tolyqsyǵan jas sarbazdar symdaı tar­tylyp, qazaq dalasyn asqaq­tat­qan sazdy qosyla shyrqaǵan. Qor­ǵa­nys mınıstri Ádilbek Jaqsy­be­kov qos mereke jaıynda baıandap ótkennen keıin (vedomstvo bas­shysynyń sózi gazette jeke berilip otyr — red.), eldik pen erlikti, qaısarlyq pen órlikti ulyqtaıtyn ánder ulan-ǵaıyr dalaǵa qanat qaǵyp kete bardy. Qorǵanys mınıstrligi ortalyq ansambli, estradalyq-sımfonııalyq orkestri, B.Baıqadamov atyndaǵy hor ka­pellasy men Kúlásh Baıseıitova atyndaǵy ulttyq opera jáne balet teatry hory (dırıjeri – Qazaq­stannyń eńbek sińirgen qaıratkeri A.Belıakov) A.Aleksandrovtyń áıgili “Svıashennaıa voına” ánin shyrqap, ekrannan talaı taǵdyrdy ot pen oqqa ushyrǵan, adamzat ta­rıhynda alapat joıqyn shyǵy­ny­men, qasiret-qaıǵysymen qan qaq­satqan soǵystyń solqyldaǵan ja­rasy jarııalanyp jatty. Respýb­lıkalyq konkýrstardyń laýreaty Erkin Shúkimanovtyń oryndaǵan R.Elebaevtyń “Jas qazaq” áni ar­qyly bul maıdannan qazaq halqynyń da az qasiret tartpaǵany baıandaldy. Nurjan Bajekenov pen Oleg Tatamırov shyrqaǵan R.Bo­ran­baev pen Q.Jumaǵalıevtiń “Batyr Baýyrjan” áni keıingi ósip kele jatqan jas sarbazdardy qa­harmandyqqa úndeıtin, sanalaryn shıratatyn ekpinimen erekshelendi. KSRO-nyń halyq ártisi Álibek Dinishev M.Tólebaev pen Q.Le­ke­rovtiń “Tos meni, tos”, A.Novıkov pen Iа.Shvedovtiń “Smýglıanka” ánderin qońyr únimen syzylt­qanda, tebirenbegen jan joq edi. Igor Blagodarnyı, Oleg Tatamı­rov pen Murat Nurǵazıev, D.Týh­manov pen V.Harıtonovtyń “Den Pobedy” ánin oryndap, keshegi oq boraǵan otty jyldardyń jańǵy­ryǵyn eske saldy. “Jas ulan” mek­tebiniń kýrsanttary Azat Ba­bajanov pen Ádilet Qurmashov N.Beketaevtyń “Jas ulan” ánin úlbiregen únderimen úzbeı shyrqap shyqty. Qurama hor men estradalyq-sımfonııalyq orkestr tartqan T.Muhamedjanov pen U.Esdáý­le­tovtiń “Zaman-aı” áni qazaq dala­synyń taǵy bir qasiretinen syr shertti. Mádına Sádýaqasova men Stepanıda Basıýk A.Jubanov pen N.Baımuhamedovtiń “Aq kógershin” ánin “Eligaı” balalar horymen birlese shyrqaýy jastyq úniniń jaryq sáýlesindeı tóńirekke sáýle quıdy. Qorǵanys mınıstrligi or­talyq ansambliniń ánshileri Qaırat Júnisov, Qaıyrbek Berdibaı, Dáýren Baıbórinov qazaqtyń óziniń tól áskerı ánder sherýinen úzindi usyndy. Qaraǵandy qalasynan kelgen “Áýen” ansambli I.Jaqanov pen Q.Begmanovtyń “Temirtaý túni” ánin selkeýsiz sezimmen serpile oryndaǵan. Maqpal Isabekova men Almas Kishkenbaevtyń T.Muhamed­ja­nov pen Q.Ábil jazǵan “Astana keshi” bir kezdergi qıyndyq pen soǵys órtin yǵystyryp, qazaqtyń keń saharasynda boı kóterip kele jatqan eńseli qalasyna nazar tik­tirgendeı edi. Qorǵanys mınıstr­ligi ortalyq ansambliniń ánshisi Ermurat Zeıiphan “Kók týdyń jelbiregeni” ánimen táýelsizdik týyn aspandatyp, aıbyndy qazaq áskeriniń aıshyqty naqyshtaryn áspettegen. Qurmet qaraýyly ro­tasy men Respýblıkalyq ulannyń prezıdenttik úrmeli aspaptar orkestri qarý-jaraqtarymen túrli qyzyqty amaldardy alǵa tosty. Azamat Jyltyrkózov pen Igor Blagodarnyı L.Hamıdı men D.Ábi­lovtiń “Otanym” ánin shyrqaýmen merekelik keshti qorytyndylap, Otan-Ana aldyndaǵy qaryz ben paryzdyń ár sarbaz úshin bıik qun­dylyq ekenin sezdirgen. Sarbaz­dar­ǵa samala keshte saýmal áýen syılaǵan ónerpazdardyń qurmetine Memleket basshysy Nursultan Nazarbaevtyń atynan sebet toly yqylas gúli tartý etildi. Qarashash TOQSANBAI.