Is-sharaǵa L. N. Gýmılev atyndaǵy Eýrazııa ulttyq ýnıversıteti KeAQ Basqarma tóraǵasy – rektor Erlan Sydyqov, Eltańba avtory Jandarbek Málibekov, áleýmettik-mádenı damý jónindegi prorektor Dıhan Qamzabekuly, oqý-isi jónindegi prorektor Erkin Ońǵarbaev, fakýltet dekandary, sala qyzmetkerleri jáne kórmege qoıylǵan fotosýrettiń avtorlary qatysty.
Kórmeniń ashylý saltanatynda sóz sóılegen EUÝ rektory Erlan Sydyqov Qazaqstannyń tanymal fotosýretshileriniń el Táýelsizdiginiń 30 jyldyq tarıhyna arnalǵan eńbekteriniń kórmesine qoıylǵan tarıhı sýretterde QR Tuńǵysh Prezıdenti – Elbasy Nursultan Ábishuly Nazarbaevtyń qaıratkerligi, el azamattarynyń eren eńbegi, peızaj, qoǵamdyq-saıası ómirdegi aıshyqty sátter ádemi beınelengenin tilge tıek etti jáne aldaǵy ýaqytta bilim odasynan «Habar» agenttigi men «Qazaqstan» teleradıokorporasııasy, Qazaq radıosynyń sheberlik shyńdaý stýdııasy sekildi fotozerthana ashylatynyn atap ótti.
«Fotokórmeniń maqsaty jas urpaqqa Táýelsizdigimizdi dáriptep, memleketimizdiń mereıin arttyrý jáne tarıhı sanany qalyptastyrý», degen akademık Erlan Sydyqov kórmege jınalǵan barlyq qatysýshylardy El Táýelsizdiginiń 30 jyldyǵy jáne kele jatqan jańa jyl merekesimen quttyqtady, sońynan foto avtorlaryna estelik syı tapsyrdy.
Kelesi kezekte sóz alǵan Eltańba avtory Jandarbek Málibekov kórmeden óziniń osydan otyz jyl burynǵy sýretin kórip, onyń tarıhy týraly syr shertse, QR Premer mınıstriniń fototilshisi Shúkir Shahaı ýnıversıtet basshysy Erlan Báttashulyna jáne Zerendide ótken respýblıkalyq fotosýretshiler baıqaýy men búgingi kórmeni uıymdastyrýǵa uıytqy bolǵan EUÝ Aqparat ortalyǵynyń fotografy Erbol Erdenbekke alǵys bildirdi.
Kórmege qoıylǵan memlekettik qurylymdar men buqaralyq aqparat quraldarynda jumys isteıtin tanymal fotograftardyń ishinde QR Premer mınıstriniń jeke fotografy Shúkir Shahaı, ardager fotograf Sovetbek Maǵzumov, QR Qorǵanys mınıstriliginiń fotografy Ermek Sarybasov, «Kazaqparat» agenttiginen Muhtar Holdarbek, Baýyrjan Jýasbaev, «Tengrınıýsten» Turar Qazanǵapov, respýblıkalyq «Egemen Qazaqstan» gazetinen Erlan Omarov, «Astana aqshamy» gazetinen Sultan Seıilov, Premer-mınıstr saıtynan Narıman Mýrzabaev, «National Geographic» jýrnalynan Erbolat Shadrahov, «Kazaqnıýsten» Doǵan Iyldyz, Zhastar Life portalynan Meıirbek Tajkýranovtardyń eńbekteri kórermen nazaryn ózine aýdardy.
«Sabaqty ıne sátimen» degendeı, shara barysynda rektor Erlan Sydyqov bastap, fotograftar Shúkir Shahaı, Erlan Omarov, Doǵan Iyldyz, t.b. qostap, Jýrnalıstıka jáne saıasattaný fakýltetin támamdaǵan bir top doktorantqa PhD doktory dıplomyn tapsyrdy, aldaǵy eńbekterine sáttilik tiledi.
Rahymjan TURYSBEK, fılologııa ǵylymdarynyń doktory, professor:
«Osynda qazaq dalasynyń, ásirese, Alataý men Atyraýǵa sozylyp jatqan sahara kórinisteri, tutas tabıǵat, jyl mezgilderi, sosyn adam men onyń eńbegi jan-jaqty kórinis tapqan.
Kórmeni aralap júrip, oıyma bir jaıt oraldy. Osydan onshaqty jyl buryn ýnıversıtet basshylyǵy biraz ǵalymdardy bilim ordasynyń atynan Eýropaǵa jiberdi. Sol Eýropaǵa barǵan kezde qazirgi Germanııanyń ataqty qalalarynyń biri Drezdende dúnıejúzindegi kórkemsýret galereıasyna jolymyz tústi. Bul galareıanyń ereksheligi – jer betindegi rýhanııatqa, ómirge, adamzattyq qundylyqtarǵa qushtar jandardyń bári sol jerge jyl on eki aı baryp turady. Sonda baıqaǵanym, ýnıversıtettiń aýmaǵyndaı jerdi alyp jatqan úsh qabatty úıdiń birinshi qabatynda biryńǵaı jer betindegi qarý-jaraqtar, ekinshi qabatynda biryńǵaı ydys-aıaqtar, úshinshi qabaty kórkemsýretke berilipti. Jer betindegi kórkemsýrettiń bári jınaqtalǵan.
Mine, búgin osy tusaýy kesilip, saltanatty jaǵdaıda ashylǵan «Táýelsizdik: eldiń fotoshejiresi» atty kórmeni aralaı júrip, alystaǵy Eýropadaǵy dúnıejúzilik kórmeniń áseri oıyma oraldy. Bizdiń qazaqstandyq sýretshilerdiń de eńbegi kem emes, otyz jyldaǵy tabysty sýret óneri arqyly kórsetip otyr».
Shúkir Shahaı, QR Premer-mınıstr fotosýretshisi:
«Búgingi kórmeniń ashylý sátinde Memleket jáne qoǵam qaıratkeri, kórnekti jazýshy, marqum Ábish Kekilbaevtyń aıtqan bir áńgimesi eske túsip otyr. «Tabıǵattan bir tamasha janýardy kórgen ańshylar ony atyp óltiredi, al sender, fotograftar sol ádemi, sulý janýardy erteńgi urpaqqa sol ádemi kúıinde jetkizesińder», dep edi. Budan asyryp ne aıtýǵa bolady?»
Shara sońynda kórmege qatysýshylar estelik sýretke tústi.
