Balqash kólinen zańsyz 1,5 tonna balyq aýlandy

Balqash kólinen zańsyz 1,5 tonna balyq aýlaǵan azamat quqyq qorǵaý qyzmetkerleriniń qolyna tústi. Bul týraly «24 kz» habarlady. Atalǵan kóldegi balyq qoryn kóbeıtý máselesine baılanysty jyl boıyna osy jerden balyq aýlaýǵa tyıym salynǵan-dy. Bir tańqalarlyǵy, ustalǵan kúdiktiniń jeke basyn anyqtaıtyn qujaty da bolmaı shyqty. «Jedel izdestirý sharasy kezinde Balqash kólinen zańsyz 1,5 tonna balyq aýlaǵan azamat ustaldy. Odan tárkilengen barlyq aıǵaq zattar zerthanaǵa jiberildi. Qazir kúdiktige qatysty tergeý amaldary júrgizilýde», - deıdi Qaraǵandy oblystyq ishki ister departamenti tabıǵatty qorǵaý polısııasy bóliminiń basshysy Bolat Taqyshev. О́tken jyly Qorshaǵan ortany qorǵaý mınıstriniń keńesshisi Aınur Qýatova Balqash kóline baılanysty mynadaı málimdeme jasaǵan bolatyn: «Halyqaralyq sarapshylardyń boljamyna júginsek, bizben irgeles Qytaı­dyń sýǵa degen jyl saıynǵy suranysy 2030 jylǵa qaraı qazirgi kúngi 555 mlrd.tekshe metrden 818 mlrd.tekshe metrge deıin ósetinin zertteýshi mamandar boljap ber­di. Al munyń ózi Balqash kólin 80 paıyz sýmen qamtyp otyrǵan Ile ózeni sýynyń kólemi de anaǵurlym azaıatyndyǵyn ań­ǵartady. Mundaı úreı­li bol­jam Bal­qash máselesin memleketaralyq deńgeı­de sheshýdi talap etedi». Mine, osydan keıin mundaǵy balyq qoryn kóbeıtý isi bolashaqta óte kúrdeli bolatyny ańǵarylyp tur. Sondyqtan tabıǵat janashyrlary kóldegi baılyqty qorǵaýǵa jumylýda... Ámirhan Almaǵanbetov. Derekkóz: «24 kz». Foto: «24 kz».