Sahnadaǵy oqıǵa taq pen tájden, baq pen baılyqtan ábden zerigip, ishi pysqan ámirshi men onyń ýáziriniń arasyndaǵy áńgimeden órbıdi. Bárinen mezi bolǵan sultan el ishin aralap júrip eń bıshara bireýdi taýyp alyp, baıǵusty bir kúnge óz taǵyna otyrǵyzyp mazaq etpek bolady. Aqyry qarabaıyr kıinip ýázirin ertip alyp shahardyń ishin sharlap ketken ámirshi taqqumar taqyr kedeı Ábý Azaǵa kezdeısoq kezigedi. Izdegeni ońaı tabyla ketken sultan esi kete qýanyp, álgi bısharany sharapqa toıǵyzyp, sylqıta mas qylyp, patsha saraıdaǵy óziniń qus tósegine jatqyzyp qoıady.
Osylaısha, bir tańda qudireti sheksiz bıleýshi bolyp oıanǵan maskúnem Ábý endi qolyna tosynnan tıgen bılikti ýysynan shyǵarmaýǵa bekinedi. Bir sátte múlde ózgerip, qatal ámirshi, qanypezer sultan bolyp shyǵa keledi. Patsha saraıyn dereý qatań tártipke keltirip, ábden kúsheıip alǵan Ábý, tipti Mustafa qajy bolyp kıingen naǵyz ámirshiniń ózin mazaqqa aınaldyryp, áıeline deıin tartyp alady.
Ábý Azanyń rólin sheber somdap shyǵyp, kórermenderdiń ystyq yqylasyna bólengen teatrdyń kórkemdik jetekshisi, bas rejısseri Baatyrbek Shaambetov bul joly óziniń myqty rejısser ǵana emes, sheber akter ekenin de kórsetti.
Premera aıaqtalǵan soń oblystyq mádenıet basqarmasynyń basshysy Erlan Qalmaqov jańa komedııa qazaq teatrynyń qorjynyna qosylǵan jaýhar dúnıeniń biri degen baǵa berip, qoıylymǵa qatysqan ártister ujymyna júrekjardy alǵysyn aıtty.
– Búginde shyǵarmalary bizde ǵana emes, birneshe memlekettiń teatrlarynda sahnalanyp jatqan Barzý Abdýrazzakov Qostanaıda bir aı bolyp, osy teatr ujymymen shyǵarmashylyq jumys júrgizdi. Búgingi qoıylym osy zalda otyrǵan árbir kórermenge úlken oı salary sózsiz, – dedi basqarma basshysy.
Qostanaı oblysy
