Iri óndiristik jáne ónerkásiptik bıznes jobalarǵa arnalǵan aýmaq – «Almaty» ındýstrıaldy aımaǵy» JShS dırektory Ádil Amralın Indýstrııalyq aımaqtyń bıylǵy qyzmetiniń qorytyndylary týraly atap ótip, Táýelsizdiktiń 30 jyldyǵyna oraı eń iri ónerkásiptik nysan – úlken dıametrli dánekerlengen bolat qubyrlar shyǵaratyn «Asia Steel Pipe Corporation» JShS zaýyty iske qosylǵandyǵyn jetkizdi.
Kásiporynnyń ónimi munaı, gaz, sý, munaı ónimderin tasymaldaýǵa arnalǵan jáne ony taý-ken, qurylys, hımııa ónerkásibinde, energetıkada paıdalanýǵa bolady. Sondaı-aq korrozııaǵa qarsy jabyndylar óndirisi jolǵa qoıylyp, jobalyq qýaty jylyna 100 myń tonna qubyr ónimderin quraıdy. Zaýytta 300-den astam turaqty jumys orny bar.
Jyl sońyna deıin Indýstrııalyq aımaqta «Qaz-Dıa-Test» JShS medısınalyq dıagnostıkalyq test-júıelerin shyǵaratyn zaýyt ashý josparlanýda. Kompanııa ınfeksııalyq jáne onkologııalyq aýrýlarǵa jedel test júrgizýdi, qorektik ortalardyń alǵashqy otandyq, serııalyq ónerkásiptik óndirisin damytýdy josparlap otyr.
Á.Amralınniń málimetinshe, Indýstrııalyq aımaqta iske qosylǵan 7 jobanyń jalpy quny 48 mlrd teńgeden asady. Munda 700-den astam jumys orny ashylǵan. Taıaý kúnderi qosymsha 65 jumys orny ashylyp, jalpy somasy 4,6 mlrd teńgeni quraıtyn jańa joba iske qosylatyn bolady. Osy jyldyń aqpan aıynda quny 11,3 mlrd teńgeden asatyn mys jáne alıýmınıı sozba sym shyǵaratyn Eýrazııalyq metallýrgııa zaýyty («KMK Investment» JShS) alǵashqylardyń biri bolyp ashyldy. Kásiporynda qosymsha 80 jumys orny ashylyp, óndiristik qýaty jylyna 25 myń tonna ónimdi quraıdy. Eýrazııalyq energokombınat birneshe óndiristi qamtıdy. Birinshi kezeńde 2018 jyldyń qyrkúıeginde ınvestısııalyq kompanııa óndiris qýattylyǵy jylyna 100 myń km kabelden asatyn «Evrazkabel» kabeldik-ótkizgish ónimderin shyǵaratyn zaýytty iske qosqan bolatyn. Keıingi jyldary ınvestısııalyq kompanııa Almaty ındýstrııalyq aımaǵynda polıetılender men propılender, qorytpalardan jasalǵan asa jeńil kabeldik naýalar óndirisin jolǵa qoıǵan. Sonymen qatar ınnovasııa boıynsha ǵylymı-zertteý ınstıtýtyn ashýdy josparlap otyr.
Indýstrıaldy aımaqta astana kúnine oraı ashylǵan avtoklavty gazobeton óndiretin eki kásiporyn – «SK Rahat» JShS jáne «G.S.G. Vysotnık» JShS qazirgi ýaqytta áleýmettik jáne kommersııalyq turǵyn úıler alańdaryn sapaly qurylys materıaldarymen qamtamasyz etip keledi. «SK Rahat» JShS óndirisiniń birinshi kezeńiniń qurylysyna 1,5 mlrd teńge ınvestısııa salynsa, onda jylyna 180 myń tekshe metr ónim shyǵarý josparlanyp otyr. Munda jańadan 40 jańa jumys orny ashylǵan. «G.S.G. Vysotnık» JShS ınvestısııa somasy 1,4 mlrd teńgeni quraıdy. Ashylǵan jumys oryndarynyń sany – 85, munda jylyna 100-120 myń tekshe metrden astam ónim shyǵady.
Á.Amralın sonymen birge shaǵyn jáne orta bıznesti júrgizýge arnalǵan eń úzdik formattardyń biri – shaǵyn óndiristik parkterdi iske asyrý jónindegi jobalar ekendigine toqtaldy. «Olar Indýstrıaldy aımaqta da, Almaty qalasynda da ashyldy. Bıyl Alataý aýdanynda «Asia Prom Textile» JShS jáne Indýstrıaldy aımaqta «ADS Industries» JShS eki óndiristik park iske qosylǵan. Investısııa somasy 500 mln teńgeden asady. Al ashylǵan jumys oryndarynyń sany – 170.
Aldaǵy kúnderi qosymsha 3 ónerkásiptik park iske qosý josparlanyp otyr, onyń ishinde ındýstrııalyq aımaq aýmaǵynda «ALAESTATE» JShS jáne «KazStroyTrade» JShS jáne Túrksib aýdanynda «CityBus» JShS, jalpy Investısııa somasy – 980 mln teńge. Sonymen qatar munda 200-den astam jumys orny ashylady. Búginde Almatynyń ónerkásiptik parkterindegi óndiris oryndarynyń jalpy alańy – 17 435 sharshy metr, al ınvestısııalardyń jalpy somasy 1,2 mlrd teńgeni quraıdy.
ALMATY
