Q.Qýanyshbaev atyndaǵy memlekettik akademııalyq qazaq mýzykalyq drama teatry 2022 jylǵa eki premera daıyndap otyr. Biri Mıgel de Servantestiń álem ádebıetiniń jaqutyna aınalǵan «Don Kıhot» romanynyń jelisimen sahnalanbaq. Rejısseri – halyqaralyq túrli teatr festıvalderinde úzdik rejısserlik jumys júldesiniń ıegeri Álibek О́mirbekuly.
Sondaı-aq Ýılıam Shekspır shyǵarmalarynyń negizinde «Shekspırmen betpe-bet» spektakli daıyndalyp jatyr. Bul qoıylymdy Máskeý qalasyndaǵy E.Vahtangov atyndaǵy teatr rejısseri, Rımas Týmınastyń shákirti Gúlnaz Balpeıisova qoımaq.
Al M.Áýezov atyndaǵy Ulttyq drama teatry aldaǵy ýaqytta Ábdijámil Nurpeıisovtiń shyǵarmasy jelisimen «Qan men ter. Aqbala», Rahmetolla Raıymqulovtyń shyǵarmasy jelisimen «Maqshar túngi mahabbat» spektaklderin kórermenge usynbaq. Budan bólek Bernard Shoýdyń «Pıgmalıon» komedııasy men Muhtar Áýezovtiń «Aqan-Zaıra» dramasy josparlanyp otyr.
«Astana Opera» memlekettik opera jáne balet teatryn da qadam basqan jańa jyl óte mazmundy bolmaq. Máselen, Irjı Kılıannyń «Alty bı» baleti jáne óziniń óte jeńil salmaǵyna qaramastan, úlken alyptardy jeńip, alaıaq túlkiden qýlyǵyn asyryp, tutqyndardy bosatatyn Qańbaq shal oqıǵalary týraly Jolan Dástenovtiń «Qańbaq shal» balalar operasynyń premerasy josparlanýda. Budan bólek horeograf Raımondo Rebektiń qoıylymynda Sergeı Prokofevtiń «Kúlbıkesh» baleti men Djoakıno Rossınıdiń «Aljırdegi ıtalııalyq qyz» atty operasy daıyndalyp jatyr. Eń bastysy, teatrsúıer jandar úshin basty syılyq – Evgenıı Brýsılovskııdiń «Er Tarǵyn» ulttyq operasynyń premerasy bolmaq.
Sondaı-aq Nur-Sultan qalasy ákimdiginiń Mýzykalyq jas kórermen teatrynda da bıyl repertýarǵa birneshe jańa qoıylym qosylady. Júsipbek Aımaýytovtyń «Sylań qyz» satıralyq shyǵarmasy jelisimen daıyndalyp jatqan spektakldiń premerasy aqpan aıyna josparlanyp otyr (rej. A.Maemırov). Al N.V.Gogoldiń «Úılený» qoıylymy (rej.M.Jumabaev) men «Kún astyndaǵy Kúnekeı qyz» ertegisiniń premeralary sáýir-maýsym aılarynda ótpek.
