Bul rette bir ǵana Magnum Cash&Carry saýda jelisiniń ózi shamamen 11 mlrd teńge shyǵynǵa ushyraǵan. Kompanııanyń PR-menedjeri Dmıtrıı Shıshkınniń habarlaýynsha, tártipsizdikter kezinde Almaty qalasyndaǵy Magnum-nyń 15 dúkeni tolyqtaı tonalǵan. Al 11 dúken ishinara shyǵynǵa batypty.
– Qazir múmkindigimizshe dúkenderdi qaıta ashyp jatyrmyz. Máselen, 10 qańtar kúni Almatydaǵy 56 dúken jumysqa kiristi. Jumys ýaqyty dúkenderdiń ornalasqan jerine baılanysty keshki 18.00-19.00-ge deıin dep kórsetilgen, – dedi ol.
Kompanııa ókili tártipsizdikter kezinde kompanııa qyzmetkerleriniń zardap shekkenin, ıá shekpegenin naqty aıta almady. Tek buzaqylar kelgen kezde qyzmetkerlerdiń bári derlik qaýipsiz jerge jetkizilgenin aıtty.
– 15 dúkendegi taýarlardyń bári tonaldy. Tótenshe jaǵdaı engizilgen sátten bastap dúken sórelerinen araq-sharapty tolyqtaı alyp tastadyq. Tehnıkalar da qoldy boldy. Kassalardy qıratty. Bárin qalpyna keltirý óte qıyn. Sondyqtan memleketten qoldaý kútemiz. Zardap shekken bızneske «Atameken» ulttyq kásipkerler palatasy, Saýda jáne ıntegrasııa mınıstrligi tarapynan qoldaý kórsetiledi degen senimdemiz. Qazir jumysty óz kúshimizben qalpyna keltirip jatyrmyz. Almatydaǵy qorymyzda taýar jetkilikti. Jaqyn kúnderi taýar tasymaldary qalpyna keledi degen senim bar, – dedi Dmıtrıı Shıshkın.
Ol kompanııa qyrýar shyǵynǵa ushyraǵanyna qaramastan, jergilikti tártip saqshylaryna, áskerılerge, órt sóndirýshilerge kómektesip jatqanyn, aýrýhanalardy azyq-túlikpen qamtamasyz etip otyrǵanyn málimdedi.
– Kompanııa oryn alǵan jaǵdaılarǵa qaramastan jumys oryndaryn tolyq saqtaıdy. Qyzmetkerlerdiń jalaqysy ýaqtyly tólenedi. Kompanııa qarjylyq jaǵdaıdy retteý úshin tıisti sharalardy qabyldaıdy. Ázirshe dúkenderdiń jumys kestesi bir qalypty emes. О́zgerip turady. Sondyqtan tolyq aqparatty kompanııanyń resmı saıtynan alýǵa shaqyramyz. Qaýipsizdikti qamtamasyz etý úshin kúzet qyzmeti kúsheıdi. Bul turǵydan bizge Almaty qalasynyń ákimdigi úlken qoldaý kórsetip otyr. Qaýipti aýmaqtardaǵy dúkenderdi áli ashpadyq, – dedi Magnum Cash&Carry saýda jelisiniń ókili.
О́tken nómirde habarlaǵanymyzdaı, qazirgi ýaqytta «Atameken» ulttyq kásipkerler palatasy bıznes ókilderine qoldaý kórsetý jelisin iske qosty. Ol birneshe baǵytty qamtıdy. Máselen, 10 qańtardaǵy derekke súıensek, tikeleı jelige kásipkerlerden 2 774 qońyraý túsken. Onyń 1 406-sy maroderlyq áreketterge baılanysty.
39 qońyraý fors-major kýáligin rásimdeýge arnalǵan. Budan bólek, blok-beketterdiń jumysyna qatysty 2 qońyraý, zardap shekken kásipkerlerdi qoldaý qory boıynsha
3 qońyraý túsken. Jeke tulǵalardan túsken qońyraýlardyń sany – 1 324.
«Atamekenniń» habarlaýynsha, elimizdiń 9 óńirinde 1 488 nysanda ornalasqan 1 319 zardap shekken bıznes sýbektisi anyqtalǵan. Onyń ishinde Almaty qalasynda 1 234 sýbekti zardap shekken. Bul rette 1 245 saýda ornyna, 25 qoǵamdyq tamaqtaný ornyna zalal kelgen. Sondaı-aq qarjy sektorynyń 37 sýbektisi, logıstıka qyzmetiniń 9 sýbektisi, BAQ salasynyń 2 sýbektisi zalal kórgen.
Osy oraıda zardap shekken bıznesti qoldaý maqsatynda «Kúshimiz birlikte» – «Sıla v edınstve» qory quryldy. Ony Almaty kásipkerler palatasy óńirlik keńesiniń tóraǵasy Maksım Baryshev basqarady. Qarjylaı qoldaý kórsetemin degen azamattar ulttyq palatanyń sall-ortalyǵyna jáne Almaty qalasynyń óńirlik keńesine habarlasa alady. Kelesideı telefon nómirleri táýlik boıy qyzmet kórsetedi: +7778 4101758; +7775 1261839 jáne +7777 79470077 (Baýyrjan Orazǵalıev, Almaty óńirlik kásipkerler palatasy).
«Kúshimiz birlikte» – «Sıla v edınstve» qoryna túsken qarajat Almaty qalasy jáne basqa da aımaqta zardap shekken kásipkerlerge arnaıy komıssııanyń sheshiminen keıin bólinetin bolady. Qor qarjynyń túsýi jáne bólinýi ashyq bolatynyna kepildik berip otyr. Barlyq qarjy operasııasy sıfrlandyrylǵan jáne jurtshylyqqa jarııalanyp otyrady.
Atalǵan qorǵa qomaqty qarjy aýdarǵan kásipkerlerdiń biri – belgili mesenat, «QazAzot» AQ basshysy Baharıdın Ablazımov. Ol zardap shekken kásipkerlerdi qoldap, 500 mln teńge kómek kórsetti. Bul qorǵa túsken alǵashqy qomaqty qarjy.
– Almatyda shaǵyn kásipkerlerdiń ashanalary, dúkenderi, shashtarazdary qıratylyp, órteldi. Qanshama zat qırady. Olarǵa kómektesetin qor ashyldy degen soń, ózimniń azamattyq boryshymdy osylaı ótegim keldi. О́zge de kásipkerlerdi buzaqylardyń áreketterinen keıingi shyǵyndy qalpyna keltirýge atsalysýǵa shaqyramyn. Bizdiń kúshimiz – birlikte, – deıdi Baharıdın Ablazımov.
