Elimiz damýdyń jańa kezeńine aıaq basyp otyr

Jalpy qańtarda bolǵan qaıǵyly oqıǵalar elimizde júıeli jáne shynaıy ózgerister qajet ekenin kórsetip berdi. Sondyqtan Memleket basshysy uzaq ýaqyt boıy qoǵamda talqylanyp kelgen asa mańyzdy máselelerge jeke-jeke toqtaldy.

Prezıdentimiz Qasym-Jomart Kemeluly Toqaev atap ótkendeı, memle­ket­tik basqarý júıesi qaıta qurylýǵa tıis. Kúshtik qury­lym­dardy reformalaý jáne armııa­myz­dyń áskerı áleýetin arttyrý máselesi de óte ózekti. Sondaı-aq memlekettiń ekonomıkadaǵy úlesin jáne áleýmettik teńsizdikti azaıtý­dyń mańyzy zor. Bul rette «Samuryq-Qazyna» qory men tutas kvazı­memlekettik sektordyń jumy­syn qaıta qaraý kún tártibine shyǵyp otyr. Shaǵyn jáne orta bıznesti jappaı damytý jáne óńirlerdiń damýyndaǵy teńgerimsizdikti joıýǵa tıisti jaǵdaı jasalady.

Memleket basshysy elimizdiń saıası júıesin odan ári demokratııalandyrý qajettigine basa mán berdi. Bul baǵyttaǵy naqty bastamalar sarap­shy­larmen jáne qoǵammen jan-jaqty py­syqtalyp, osy jyldyń qyrkúıe­ginde kópshilikke tanystyrylady.

Jalpy alǵanda usynylǵan sharalar júıeli sıpatqa ıe. Olar memlekettik basqarý júıesin, ekono­mıkanyń qurylymyn, áleýmettik salany túbegeıli ózgertýge, azamat­tary­myzdyń ómir súrý sapasyn jaqsartýǵa arnalǵan.

Osylaısha, elimiz damýdyń jańa ke­ze­ńine aıaq basyp otyr. Bul – tutas mem­lekettik basqarý júıesin merıto­kratııa, ádilettilik jáne ashyqtyq qaǵı­da­larynyń negizinde qaıta qurý kezeńi.

Osy jolda Parlament Senaty Memleket basshysynyń barlyq bas­tamasyn qoldaı otyryp, zań­na­ma­lyq turǵydan olardy sapaly ári ýaqtyly qamtamasyz etý úshin qa­jet­ti jumystardy júrgize beredi.

Jańa Qazaqstandy birge quraıyq!

Máýlen ÁShIMBAEV,

Parlament Senatynyń Tóraǵasy