Kásibi mehanık bolǵandyqtan, temirdiń tilin jaqsy biletin áýesqoı ónertapqysh úı sharýasyna jaraıtyn shaǵyn traktor qurastyryp alýdy burynnan oılastyryp júrse de, bul oıyn júzege asyrýdy osydan bes aı buryn ǵana iske asyra bastaǵan. Eń áýeli kúsh agregattary qajet boldy. Beldeme men transmıssııalyq júıeniń jańasyn satyp alý asa qymbatqa túsedi. Asylbek Esmaǵambetov bul bólshekterdi metall synyǵyn qabyldaıtyn oryndardan izdep tapqanyn aıtady.
– Qajet bólshekterdi izdep tabý úshin biraz ter tógýge týra keldi. Birde metall qabyldaý pýnktterin aralap júrip keńes zamanynan qalǵan aýyr júk kóteretin eski kardyń bólshekterin kórip qaldym. Onyń beldemesi men ammortızatorlary ǵana jaramdy bolyp shyqty. Sonyń ózin qaıta jaratý úshin kóp eńbektendim. Traktordyń qańqasyn agregattarǵa laıyqtap shaǵyndap qana jasadym. Al basqarý júıesin áıgili Mercedes kóliginiń rýl tartqyshy men «Moskvıchtiń» basqarý baǵanasynan jasadym. Basty maqsatym shaǵyn ǵana bıýdjettik traktor jasaý boldy. Onyń syrtqy ádemiligine asa mán bergen joqpyn, paradqa aıdap shyqpaımyn ǵoı, aýladaǵy sharýany tyndyryp alsam da jarap jatyr, – deıdi A. Esmaǵambetov.
Asekeńniń traktor qurastyrý barysynda qolda bar dúnıesin qııýlastyryp, joqtan jonyp bar jasaǵany kórinip tur. Mysaly, jyldamdyq aýystyratyn tórt satyly qorap buryn eski «Gaz-51» kóliginde turypty. Ajyratqyshty qoldan jasaýǵa týra kelgen. Tejegish júıesi de qyryq jylǵy qyzyl kombaınnan alynǵan.
– Bastan-aıaq qurastyryp shyǵýǵa tórt aı ýaqyt ketti. Qolym bosaı qalsa boldy, osymen aldanamyn. Keıde kúıeý balam men inilerim kelip kómektesti. О́ıtkeni jalǵyz adamǵa keıbir aýyr bólshekterdi ornyna qoıyp, bekitý qıynǵa soǵady, – dedi ónertapqysh.
Traktordyń tumsyǵyna sheberdiń ózi jasaǵan eni bir metrden sál ǵana asatyn qysta qar arshýǵa qolaıly kúrek tirkelipti. Kóktemde kúrektiń ornyna soqa tirkelip, shaǵyn traktor baqshada jer jyrtýǵa paıdalanylady. Qajet bolǵan jaǵdaıda teleshki tirkep, júk tasýǵa da bolady.
Qostanaı oblysy
