Barlyq kásipkerlik jáne áleýmettik nysandar shtattyq rejımde jumys istep tur.
Qala aýmaǵynda túngi 23.00-den tańǵy 7.00-ge deıin «komendanttyq saǵat» júzege asyrylýda, strategııalyq nysandardy kúzetý kúsheıtilgen. Qaladaǵy qoǵamdyq saıası jaǵdaı turaqty baqylaýda.
Qalada jappaı tártipsizdik sátinen bastap polısııaǵa 3 myń 568 adam jetkizildi. Búginge deıin 442 quqyq buzýshylyq anyqtaldy. Onyń 298-i boıynsha qamaýǵa alý, 44 aıyppul jáne 100 eskertý sharasy qabyldandy.
«Komendanttyq saǵatty» buzǵany úshin 204 quqyq buzýshy ákimshilik jaýapkershilikke tartyldy. Onyń 75-i qamaýǵa alyndy. Qala shekaralarynda ornatylǵan blokbeketterde 15 myńǵa jýyq avtokólik tekserilip, 9 adam ustaldy. Kólikterdi qaraý kezinde 2 gaz tapanshasy tárkilendi. Barlyq qozǵalǵan qylmystyq ister boıynsha 78 azamat qamaýǵa alyndy.
Qylmyskerlerdiń uıashyqtaryn anyqtaý maqsatynda ekstremızm jáne kóshi-qon jelisi boıynsha jedel is-sharalar júrgizilip jatyr. Sondaı-aq, qaladaǵy jaldamaly páterler tekserilýde. Onyń nátıjesinde bir turǵynnyń balkonynan trotýar tastary tabylyp, al basqa jaldamaly páterden Túrkistan oblysynyń 4 turǵyny ustaldy. Olardan Shymkent qalasynyń «Metro» saýda ortalyǵynda tártipsizdik kezinde urlanǵan azyq-túlik taýarlary tárkilendi.
Qazirgi ýaqytta qalalyq polısııa departamenti áskerı bólimder jáne TJD kúshterimen birlesip, tótenshe jaǵdaı rejıminde jumys isteýde.
Osy rette,qala bıligi turǵyndardy ózderi men jaqyndarynyń qaýipsizdigi úshin TJ rejıminiń barlyq erejesin saqtaýǵa, adam kóp jınalatyn oryndarǵa barmaýǵa, destrýktıvti kúshterdiń arandatýyna ermeýge shaqyrady.
