Qala ákimi Murat Áıtenov atalǵan ındýstrııaldy aımaqta júrgizilip jatqan ınjenerlik-kommýnıkasııalyq jeliler men kásiporyn qurylysyn aralap kórip, ınvestorlardyń usynystaryn tyńdady.
Qala basshysy el Prezıdentiniń ekonomıkany ártaraptandyrý jáne ımport almastyrý jónindegi tapsyrmasyn oryndaýdyń birden bir sharty – ol óńirde óndiristiń damýyna qolaıly jaǵdaı jasaý jáne ındýstrıaldyq aımaqtardy damytý bolyp tabylatynyn jetkizdi. Sondyqtan qalada qurylyp jatqan jańa ındýstrııaldy aımaqtardyń qurylysy men jumys istep turǵan aımaqtardyń kólemin ulǵaıtý jumysyn jeteldetýdi tapsyrdy. ınjenerlik ınfraqurylym júıelerin sapaly jáne qysqa merzimde aıaqtaýdy tapsyrdy.
Búginde aımaqta jalpy uzyndyǵy 13,8 shaqyrymdy quraıtyn avtomobıl joldary salynýda, onyń 2,4 shaqyrymy oryndalǵan. Budan bólek, tartylýy tıis bolǵan 12,5 shaqyrym aýyz sý júıesiniń 11 shaqyrymy, tabıǵı gazdyń 8,9 shaqyrymynyń 5 shaqyrymy, káriz júıesiniń eki shaqyrymy men elektr júıesi jumystarynyń 30 paıyzy oryndalyp otyr.
Aıta keteıik, jalpy aýdany 306 gektardy quraıtyn «Juldyz» ındýstrııalyq aımaǵynda jalpy quny 230 mlrd. teńge bolatyn 50 jobany júzege asyrý boljanýda. Nátıjesinde 5 myńnan astam jumys orny ashylady dep kútilýde.
Kásipkerlik basqarmasymen 30 áleýetti ınvestordyń ınvestısııalyq jobalar portfeli qalyptastyryldy. Bul jobalardy 2022-2025 jyldar aralyǵynda iske asyrý josparlanýda.
