Atalǵan brıfıngke Premer-Mınıstrdiń orynbasary Eraly Toǵjanov, Densaýlyq saqtaý mınıstri Ajar Ǵınııat, Densaýlyq saqtaý mınıstrligi Sanıtarlyq-epıdemıologııalyq baqylaý komıtetiniń tóraǵasy Aıjan Esmaǵambetova qatysty.
– Jalpy, álem boıynsha aýrý sanynyń kezekti ret kúrt artýyna ózderińiz de kýá bolyp otyrsyzdar. Dúnıejúzilik densaýlyq saqtaý uıymynyń málimeti boıynsha, Eýropada sońǵy eki aptada aýrý sany ósti. Onyń ishinde halyqtyń 50%-y «Omıkronmen» aýyryp jatyr. Aýrýshańdyqtyń artýyna halyqtyń belsendi ishki jáne syrtqy kóshi-qony, uzaq merekelik kúnder, sondaı-aq eldegi tolqýlar da yqpal etken. «Omıkrondy» ádettegi maýsymdyq vırýstyq ınfeksııa dep oılaıtyndar bar. Bul shtamdy qarapaıym tumaý dep qabyldaýǵa bolmaıdy. «Omıkron» shtamynyń ereksheligi – tez juǵatynynda jáne ony qaıta juqtyrý qaýpi joǵary. Taralý koeffısıenti – 1-5. Ol «Delta» nusqasynan 70 ese jyldam taralady. Máselen, tek sońǵy táýlikte 9 700 jaǵdaı tirkelgen. Keıingi aıda koronavırýs ınfeksııasyn juqtyrý 20 esege ósti. Mundaı táýliktik kórsetkish pandemııa bastalǵan sátten beri tirkelmegen, – dedi E.Toǵjanov.
Sonymen qatar Úkimet basshysynyń orynbasary elimizdiń barlyq óńirindegi epıdemııalyq ahýaldyń nasharlaǵanyna toqtaldy. Onyń aıtýynsha, aýrýshańdyq deńgeıi boıynsha Nur-Sultan, Almaty qalalary, Qaraǵandy jáne Atyraý oblystary kósh bastap tur. Jeltoqsan aıynyń sońynda stasıonarlarda 3 myńnan az adam em alsa, búginde naýqastar sany 7 myńnan asty. Emhanalar deńgeıinde emdeletin naýqastar sany da 4,8 esege artty. Bir ǵana Nur-Sultan qalasy boıynsha stasıonarlarda em alatyn adamdardyń sany 200 adamnan 1 myńǵa deıin, ıaǵnı 5 esege ósken. Bul jaǵdaı densaýlyq saqtaý júıesine úlken júkteme artyp otyr. Osyǵan baılanysty vedomstvoaralyq komıssııa qosymsha shekteý sharalaryn qabyldady. Iаǵnı vaksınalaý mártebesine qaramastan, shetelden kelgenderdiń barlyǵynda teris PTR testiniń bolýy mindetteldi. Ashyq baǵdarlamasy boıynsha «jasyl» mártebe bolǵanda ǵana jumys isteýge ruqsat etilgen obektiler tizbesi keńeıtildi. О́ńirlerdegi epıdemııalyq ahýalǵa baılanysty oqýshylardy, stýdentterdi oqytýǵa dıfferensıaldy tásil qoldanylady. Halyq kóp jınalatyn oryndarǵa qosymsha shekteýler engizildi. Bul májbúrli sharalar, eń aldymen, azamattarymyzdy qorǵaýǵa baǵyttalǵan.
– Qazirgi «Omıkron» shtamy tez taralýymen qoımaı, jas talǵamaıtyndyǵymen qaýipti. Qalyptasqan ımmýnıtetti saqtap qalýdyń birden-bir joly – revaksınalaý. «Aldyn ala emdelgenniń esesi ketpes» deıdi halqymyz. Sondyqtan vaksına alyp úlgermegen árbir qazaqstandyq tez arada vaksına qabyldaýy kerek. Vaksına alǵanyna 6 aı ótken azamattar – revaksınalanýy qajet. Eń bastysy, Qazaqstanda qoldanylatyn barlyq vaksına tıimdi ári qaýipsiz, – dedi E.Toǵjanov.
Sondaı-aq ol jýrnalıster tarapynan Pfizer vaksınasyna qatysty qoıylǵan suraqtarǵa da jaýap berdi.
– Birinshiden, Pfizer qazir qoljetimdi. 4 mln dozadan astam Pfizer ekpesin satyp aldyq. Qazir vaksınanyń bul túri qoljetimdi adamdardyń naqty sanaty bar. Olar – 12-15 jas aralyǵyndaǵy jasóspirimder, júkti jáne bala emizetin áıelder. Ujymdyq ımmýnıtet qalyptastyrý qajettigin eskersek, 60-tan asqan adamdarǵa da múmkindik berdik. Bul – el halqynyń 1 mln-nan asa adamy degen sóz. Sondyqtan Pfizer vaksınasy atalǵan sanattarǵa tolyq qoljetimdi. Basqa da vaksına túrleri bar ekenin eshkim umytpaý kerek. Ekpeniń qoljetimdiligi týraly másele kún tártibinde turǵan joq. Buǵan qosa qosymsha 1 mln doza satyp alamyz. Al aqyly Pfizer vaksınasy týraly másele ylǵı kóterilip júr. Birneshe ret jaýap berdik dep oılaımyn. Pfizer-di aqyly satpaý týraly sheshim qabyldanǵan. Joǵaryda Pfizer vaksınasyn 60-tan asqandarǵa taǵy bólemiz dedik qoı. Sonyń ornyn toltyrý úshin sáýir aıyna qaraı
1 mln dozasyn alǵyzamyz, – dedi Premer-Mınıstrdiń orynbasary.
Brıfıng barysynda eldegi tártipsizdikter kezinde zardap shekkender týraly maǵlumat suraldy. Bul derekterdi Densaýlyq saqtaý mınıstri Ajar Ǵınııat keltirdi.
– О́ńirlerdiń densaýlyq saqtaý basqarmalarynyń shuǵyl derekteri boıynsha, tótenshe jaǵdaı rejimi engizilgen kezden bastap, jalpy eldegi terrorıstik aktilerdiń saldarynan 2 739 zardap shegýshi medısınalyq kómekke júgingen. Búgingi tańda 200 adam stasıonarlyq em alyp jatyr. Adamdar jazylyp shyǵyp, ári qaraı ambýlatorlyq emdelýge baǵyttalýda. Qazir jansaqtaý bólimderinde aýyr jaǵdaıda jatqan 14 naýqas bar. Onyń ishinde tórteýi – Almatyda, bireýi – Almaty oblysynda, beseýi – Qyzylorda oblysynda. Medısınalyq uıymdarda kóz jumǵandarǵa kelsek, búginde 177 naýqas qaıtys boldy. Sońǵy 3 kúnde reanımasııada jatqan eki naýqastyń jaǵdaıy nasharlap, kóz jumdy. Bizdegi derek boıynsha, mıtıngige qatysýshy bir júkti áıel zardap shegip, Talǵar aýdandyq ortalyq aýrýhanasyna túsken. Ony dárigerler qutqaryp qalǵan. Almatyda 5 jáne 12 jastaǵy eki bala qaıtys boldy degen málimet bar, – dedi A.Ǵınııat.
