Ekonomıka • 20 Qańtar, 2022

Qyzmettiń qosymsha túrlerimen aınalysýǵa ruqsat berildi

73 ret kórsetildi

Qazaqstan Respýblıkasy Indýstrııa jáne ınfraqurylymdyq damý mınıstrligi 2021 jyly respýblıkanyń birqatar arnaıy ekonomıkalyq aımaqtary úshin qyzmet túrleriniń tizbesin keńeıtti, dep habarlaıdy Egemen.kz QR IIDM baspasóz qyzmetine silteme jasap.

Bul syrtqy ekonomıkalyq baılanystardy jandandyrý, ekonomıkany qoldaý jáne óńirlerdiń áleýmettik problemalaryn sheshý, arnaıy ekonomıkalyq aımaqtardyń (budan ári – AEA) jumysyna ınvestısııalar, tehnologııalar men qazirgi zamanǵy menedjmentti tartý úshin jasaldy.

О́tken jyly «Aqtaý teńiz porty» arnaıy aımaǵynyń qyzmet túrleri keńeıtildi. Endi atalǵan AEA mynadaı jobalarmen aınalysa alady:

jylý elektr stansııalarymen elektr energııasyn óndirý;

elektr energııasyn berý jáne taratý;

turǵyn jáne turǵyn emes ǵımarattar qurylysy;

qonaq úıler jáne turýǵa arnalǵan oryndar qyzmetterin usyný;

jeke nemese jalǵa alynǵan jyljymaıtyn múlikti jalǵa alý jáne basqarý;

demalys pen oıyn-saýyqty uıymdastyrý boıynsha qyzmetter.

Qarqyndy damyp kele jatqan aımaqtardyń biri – «Saryarqa» AEA. Onda daıyn metall buıymdary men qurylys materıaldary: sharly krandar, jylý oqshaýlaǵysh qubyrlar, otqa tózimdi materıaldar, jezden jasalǵan buıymdar, dirilge jáne otqa tózimdi buıymdar shyǵarylady.

Endi «Saryarqa» AEA-da isten shyqqan kólik quraldaryn, arnaıy tehnıka jáne aýyl sharýashylyǵy mashınalaryn, tońazytqyshtar men tońazytqysh jabdyqtaryn jınap, óńdep jáne qaldyqtardy joıyp, qalpyna keltirýge bolady.

«Qyzyljar» AEA qyzmet túrleriniń tolyqtyrylǵan tizbesine aǵash massasy men sellıýloza; qaǵaz jáne karton; gofrokarton; qaǵaz jáne karton ydysy; sharýashylyq-turmystyq jáne sanıtarlyq-gıgıenalyq maqsattaǵy qaǵaz buıymdary; farmasevtıkalyq ónimder men preparattar; veterınarııaǵa arnalǵan dárilik preparattar óndirisi kirdi.

Qyzmettiń basym túrleriniń tizbesi «TURKISTAN» AEA-da da keńeıtildi. Obektilerge keshendi qyzmet kórsetý; aýmaqtardy abattandyrý qyzmetteri; jıhaz ben ınterer zattaryn jóndeý; tamaqpen jáne sýsyndarmen qamtamasyz etý boıynsha qyzmet kórsetý; elektrondyq jáne optıkalyq jabdyqtardy jóndeý; basqa toptamalarǵa engizilmegen aqparattyq tehnologııalar men júıeler salasyndaǵy ózge de qyzmet túrleri qosyldy.

Budan basqa «Ulttyq ındýstrııalyq munaı-hımııa tehnoparki», «Aqtaý teńiz porty», «Saryarqa», «Taraz hımııalyq parki» jáne «Pavlodar» AEA-da  qyzmet túrleri «Kóp beıindi aýrýhana qurylysy jáne paıdalanýǵa berý» tarmaǵymen tolyqtyryldy.

Sonymen qatar, ótken jyly birneshe AEA aýmaǵy ulǵaıtyldy. «Saryarqa» AEA aýdany jylý elektr stansııasyn jáne ferroqorytpa men koks óndiretin zaýyttar salý úshin 345,5 gektarǵa ulǵaıdy. «Qyzyljar» AEA-na qaǵaz jáne qaǵaz ónimderin óndiretin zaýyt salý úshin 15 ga qosyldy. «Astana - jańa qala» AEA 83,7 gektarǵa ulǵaıyp, onyń aýmaǵynda temirjol mashına jasaý klasteri quryldy. Kezinde jeńildikter qurylys ındýstrııasyna qatysýshylardy qyzyqtyryp, qysqa merzim ishinde kóptegen turǵyn úıler jáne áleýmettik obektiler salyndy. Elordanyń sol jaǵalaýynda jańa ákimshilik-iskerlik jáne mádenı ortalyq quryldy.

Anyqtamalyq:

Búgingi tańda Qazaqstanda 13 AEA jumys isteıdi. 2002 jyldan bastap olarda 307 joba iske asyrylyp, 21 myńnan astam turaqty jumys orny ashyldy. AEA-nyń erekshe mártebesiniń arqasynda kásiporyndarda 30-dan astam jańa ónim túrleri, onyń ishinde optıkalyq qurylǵylar, túnde kórý aspaptary, bronetransporterler, lokomotıvter, jolaýshylar vagondary, premıým-klasty qubyrlar, maqta sellıýlozasy, polıpropılen jipter jáne t. b. shyǵarý jolǵa qoıyldy.

AEA qatysýshylary úshin bıznesti memlekettik qoldaý túrinde birqatar jeńildikter jasaldy. Atap aıtqanda, rezıdentter korporatıvtik, jer jáne múlik salyǵyn tólemeıdi. AEA aýmaǵynda satylatyn taýarlar úshin qosymsha qun salyǵynyń (QQS) mólsherlemesi 0-ge teń. Jer ýchaskelerine barlyq qajetti ınfraqurylym tartylady. Ýchaskeler AEA rejıminiń barlyq kezeńine tegin beriledi. Qatysýshylar jaldaý jáne jer salyǵyn tóleýden bosatyldy.

Sońǵy jańalyqtar

Uqsas jańalyqtar