Taıaýda «Asyl Ana 2020» qoǵamdyq qorynyń eriktileri shala týǵan nárestelerge júnnen shulyqtar men kıim-keshek toqyp, olardy Prıshahtınsk eldi mekenindegi perınataldy ortalyqqa tabys etti. Atalǵan qordyń basshysy Aıjan Baıdeldınovanyń aıtýynsha, búginde árbir onynshy bala merziminen buryn jaryq dúnıege keledi eken.
– «Shalabaılar» dep ýaqytynan buryn týǵan balalardy aıtady. Biz Prıshahtınsk perınataldy ortalyǵynda salmaǵy 500-den 2 200 gramm bolyp ómirge kelgen sábılerge júnnen toqylǵan jyly jáne túrli-tústi jıyntyqtardy syıǵa tarttyq. Kip-kishkentaı shulyqtar men bas kıimderdi, keýdesheler men kórpeshelerdi bizdiń kóp balaly analarymyz toqydy, – deıdi ol.
Mamandar qylshyqty jún shalabaılardy jylytyp qana qoımaıdy, sonymen qatar olardy qozǵalyp jatýǵa ıtermeleıdi eken. Osylaısha, qan aınalymyn qalpyna keltiretin kórinedi.
Qazirgi tańda «Asyl Ana 2020» qoǵamdyq qorynyń 2 300-ge jýyq múshesi bar. Olardyń barlyǵy óńirdiń qoǵamdyq ómirine belsendi qatysady. Qor birneshe jyldan beri oblystaǵy áleýmettik turǵyda az qamtylǵan turǵyndarǵa qol ushyn sozyp keledi. «Jaqsylyq jasa – Delaı dobro» qaıyrymdylyq jármeńkesin de ótkizip turady.
Qaraǵandy oblysy
