«Qazaqstan Respýblıkasynyń Syrtqy ister mınıstrligi Eýropalyq Parlamenttiń elimizdegi jaǵdaıǵa qatysty qabyldaǵan qarary birjaqty sıpatqa ıe ekenin jáne obektıvti emes tujyrymdarǵa negizdelgenin málimdeıdi.
Elimizde oryn alǵan qańtardaǵy qaıǵyly oqıǵalarǵa obektıvti baǵalaýdyń bolmaýy alańdaýshylyq týǵyzady.
Qazaqstan Respýblıkasynyń basshylyǵy tapsyrǵan resmı tergep-tekserý nátıjeleri jarııalanǵanǵa deıin mundaı qujattardy qabyldaý qısynsyz dep sanaımyz. Onyń nátıjeleri halyqaralyq qoǵamdastyqqa usynylatynyn taǵy da rastaımyz.
Qarar jobasyn ázirleý kezinde Eýropalyq Parlament depýtattary men onyń quramyndaǵy saıası toptar Qazaqstannyń resmı tulǵalarynan naqtylama aqparattar men túsindirýler suramaǵanyn atap ótemiz.
QR Adam quqyqtary jónindegi ýákili jáne memlekettik organdarmen tikeleı dıalog júrgizetin azamattyq qoǵam ınstıtýttary da atalǵan qujat avtorlarynyń olarǵa júginbegenin habarlaıdy.
Birqatar sheteldik buqaralyq aqparat quraldarynyń quqyq qorǵaý organdarynyń terrorıstik, ekstremıstik jáne qylmystyq toptarǵa qarsy zańdy áreketterin sıpattaıtyn jarııalanymdarynda aıtarlyqtaı qaıshylyqtar men dálsizdikter bar ekeni týraly QR Syrtqy ister mınıstrliginiń buryn aıtylǵan ustanymy elenbedi.
Qazaqstan BUU-nyń Adam quqyqtary jónindegi keńesiniń, bedeldi halyqaralyq uıymdardyń múshesi retinde, gýmanıtarlyq quqyq salasyndaǵy kópjaqty kelisimderdiń qatysýshysy bola otyryp, zańnyń ústemdigine jáne azamattardyń quqyqtary men bostandyqtaryn qorǵaý salasyndaǵy óz mindettemelerine tolyqtaı beıildi. Elimiz sondaı-aq halyqaralyq terrorızmge qarsy kúresti qosa alǵanda, jahandyq jáne óńirlik qaýipsizdikti qamtamasyz etý úderisine qomaqty úles qosyp keledi.
Qazaqstan Respýblıkasy Eýropalyq odaqtyń barlyq ınstıtýttarymen ózara túsinistik jáne qurmet qaǵıdattary negizinde ózara syndarly is-qımyl jasaýǵa múddeli.
Eýropalyq Parlamenttiń atalǵan qararyn asyǵys qabyldaýy demokratııalyq ınstıtýttardy nyǵaıtý jáne azamattyq qoǵamnyń damýyna baǵyttalǵan QR Prezıdentiniń reformalaryn qabyldaý jáne júzege asyrý úderisine keri áser etedi jáne zııan keltiredi», delingen habarlamada.
Eske sala keteıik, keshe Fransııanyń Strasbýrg qalasynda Eýropa Parlamentiniń bıylǵy alǵashqy plenarlyq otyrysy ótip, onda Qazaqstandaǵy qańtar oqıǵalary talqylandy. Jıynnan keıin arnaıy qarar qabyldandy.
