Eske sala keteıik, jańa jyl merekesi qarsańynda «Astana Opera» teatry klassıkalyq mýzykaǵa arnalǵan «Messo» telearnasynda 1200 mýzykanttyń oryndaýynda G.Malerdiń №8 sımfonııasy jazbasynyń kórsetilimin júrgizgen bolatyn. Konsert Eýropanyń jáne álemniń 38 elinde kórsetilip, shamamen 40 mıllıon adamnan turatyn kórermender aýdıtorııasy qazaqstandyq mýzykanttardyń oryndaýyndaǵy osynaý uly shyǵarmamen tanysty.
«Eń aldymen, meni osy jobanyń aýqymy tańǵaldyrdy, mundaı ǵalamat konsert uıymdastyrý úlken eńbekti talap etkeni anyq. Orkestrdiń, hordyń jáne solısterdiń án shyrqaýy eń joǵary deńgeıde oryndaldy. Ataqty dırıjer Alan Bóribaevty bizde, ıaǵnı Eýropada ǵana jaqsy kórmeıdi, ol búginde barlyq jerde suranysqa ıe. Bul konsertte maestro qazaqstandyq ártisterdiń zor áleýetin ashty jáne bizge Qazaqstan odan saıyn jaqyn bola túskeni sózsiz», dep óz áserimen bólisedi Fransııada turatyn jeli qoldanýshysy Krıstıan Erskın.
Qazaqstandyq ónerdiń joǵary deńgeıi men eldiń shyǵarmashylyq áleýetine telearnanyń basqa da súıikti kórermenderi baǵa berdi. «Bul G.Malerdiń shyǵarmashylyǵyndaǵy eń jaqsy kóretin sımfonııalarymnyń biri. Ol qazaqstandyqtardyń oryndaýynda erekshe shyqty, bul rette ártisterdiń sheberligi, shyǵarmany tereń túsinýi mańyzdy ról atqardy dep oılaımyn, keshti tamasha ótkizdim. Osynaý keremet konsertti tamashalap úlgermegen barlyq adamǵa baǵdarlamany qarap, onyń kelesi kórsetilimin mindetti túrde jiberip almaýǵa keńes beremin», dep atap ótti Fler de Gız.
Aıta ketý kerek, G.Malerdiń №8 sımfonııasy «Messo» telearnasynda byltyrǵy jeltoqsan aıynan bastap kórsetiledi. Kórsetilimderdiń kezekti toptamasyn kórermender Qazaqstan ýaqyty boıynsha: 4 aqpanda 7:45-te, 9 aqpanda 14:40-ta, 11 aqpanda 12:30-da, 18 aqpanda 10:45-te tamashalaı alady.
