Eki mıllıonnan asyp jyǵylatyn turǵyny bar megapolısti bir sát elektr qýatynsyz elestetýdiń ózi qıyn. Energııa tapshylyǵy ásirese shahardyń shet aýdandarynda baıqalǵan. Keı núktelerde jarty saǵatqa, al keı aýmaqtarda 1-2 saǵat kóleminde toq bolmaǵan. Baǵdarshamdardyń isten shyǵýyna baılanysty jol qozǵalysynda azdy-kópti keleńsizdik týyndaǵanymen, qalanyń tynys-tirshiligin qamtamasyz etetin salalardyń jumysynda pálendeı irkilis bola qoıǵan joq. Almaty qalasy men oblys aýmaǵyn túgeldeı derlik elektr energııasymen qamtyp otyrǵan «Alataý Jaryq» kompanııasy atalǵan jaıǵa qatysty anyqtama berdi.
«Alataý Jaryq kompanııasy» AQ «Soltústik-Ońtústik» joǵary voltti elektr taratý jelisinde oryn alǵan apattyq jaǵdaı saldarynan elektr qýatynan ajyratylǵan Almaty qalasynyń tutynýshylaryn jaryqpen qamtamasyz etý tolyq kólemde qalpyna keltirdi. Aǵymdaǵy táýliktiń 13 saǵat 53 mınýtynda barlyq ajyratylǵan abonentterge elektr energııasy berildi. Energııamen jabdyqtaýdaǵy úzilis 1 saǵat 48 mınýtty qurady. Apat kezinde megapolıstiń ákimshilik aýdandary boıynsha barlyǵy 92 myńnan astam tutynýshy jaryqsyz qaldy. Onyń 88,5 myńy – turǵyn úıler men páterlerge tıesili», dep málimdedi jaýapty mekemeniń baspasóz qyzmeti.
Dál osy ýaqyt aralyǵynda jalǵyz Almatyda ǵana emes, Almaty oblysynyń aýmaǵynda, sondaı-aq Jambyl, Túrkistan, Qyzylorda oblystarynyń keı jerlerinde energııa tapshylyǵy týyndaǵan. Turǵyndardy alańdatqan ahýalǵa qatysty sál keıinirek málimdeme jasaǵan Energetıka mınıstrligi bul jaıt Ortalyq Azııanyń energııa júıesindegi apattyq teńgerimsizdikke baılanysty bolǵanyn jetkizdi. Jelide Qyrǵyz Respýblıkasy men О́zbekstan Respýblıkasynyń birqatar óńirinde de elektr qýaty ýaqytsha isten shyqqany týraly aqparat taraǵan bolatyn.
«Atalǵan jaıtqa baılanysty «Qazaqstannyń Soltústik-Shyǵys-Ońtústik» jelisine 500 kv elektr energııasynyń tranzıtine shamadan tys júkteme tústi. Osyǵan baılanysty ońtústik aımaq tutynýshylarynyń edáýir bóligin ajyratý arqyly «Qazaqstannyń Soltústik-Shyǵys-Ońtústik» tranzıtiniń apattyq bólinýi oryn aldy. Shekteýler kólemi 1500 megavattan asty. Atap aıtqanda, Almaty qalasy men Almaty oblysynda – 1000 MVt, Jambyl oblysynda – 300 MVt, Túrkistan oblysynda – 500 MVt jáne Qyzylorda oblysynda – 20 MVt. Jıiliktiń tómendep ketýi saldarynan О́zbekstan, Qyrǵyzstan energııa júıeleri tolyq óshirildi. Avtomatıkanyń iske qosylýyna baılanysty Jambyl GRES, Shymkent JEO-3, Qyzylorda JEO-6 jáne Almaty oblysynyń elektr stansasynyń óshirilýine jol berilgen joq», dep málimdedi Energetıka mınıstrligi.
Sala mamandary mundaı jaılardyń oryn alýy qalypty qubylys ekenin, sondyqtan buǵan alańdaýǵa negiz joqtyǵyn, qalany jaryqpen qamtý júıesi kún sanap jetilip kele jatqanyn jetkizdi.
Dese de Almatyda energııa salasyna qatysty ózekti másele joq emes. Elimizdegi eń alyp megapolıstiń keı aýdandaryndaǵy jerasty elektr jelileriniń tozyǵy jetip turǵanyn buǵan deıin mamandar pikirimen alǵa tartqan edik. Júrgizilgen zertteýge sáıkes qalanyń keıbir jerasty núktelerindegi búginge deıin qoldanylyp kele jatqan elektr symdary sonaý Ekinshi dúnıejúzilik soǵysqa deıin ornatylǵany anyqtalǵan. Bul symdar qansha jerden tózimdi ári berik desek te, toqtyń aty toq. Sondyqtan bul máselege jeńil-jelpi qaraýǵa bolmaıdy. Álemniń «aqyldy qalalarynyń» qataryna qol sozǵan Almaty úshin bul kesheýildetpeı sheshimin tabýǵa tıis máseleniń biri. О́rkenıetke qosylǵysy keletin megapolıs aldymen qýat kózderin rettep alǵany jón.
ALMATY
